Müstəqil dövlət kimi dünya siyasətinə təsir imkanları artan, qarşıda duran hədəflərə çatmaq üçün inkişaf konsepsiyasında nəzərdə tutulan strateji vəzifələri uğurla icra edən, nəhəng, qlobal layihələrin təşəbbüskarı olmaqla Avropanın enerji, nəqliyyat xəritəsinin yenidən tərtib edilməsində rolu artan Azərbaycanın beynəlxalq aləmdə mövqeyi möhkəmləndikcə bu tərəqqidən şoka düşən, qısqanan qüvvələrin xəbis niyyətləri də artır. Bütün azadlıqların təmin edildiyi, müasir demokratik ölkə kimi tanınan respublikamızda keçirilən beynəlxalq konfrans və simpoziumlarda, forumlarda iştirak edən dövlətlərin sayının artması xalq-iqtidar birliyi sayəsində siyasi sabitliyi ilə fərqlənən ölkəmizin demokratiya yolu ilə inkişafının göstəricisidir. Təbii ki, uğurlarımız dostlarımızı sevindirdiyi kimi, rəqiblərimizi, əzəli düşmənimiz erməniləri, onların havadarlarını məyus edir.
Son dövrdə Avropanın enerji təhlükəsizliyinin təminatında xüsusi rolu olan neft strategiyasının uğurla davam etdirilməsinin ölkəmizin dünyada möhkəmlənən mövqeyi kimi dəyərləndirilməsi, dünya ictimaiyyətinin Azərbaycana artan marağı, əməkdaşlıq əlaqələrinin genişlənməsi belə dairələrin maliyyələşdirdiyi antimilli qüvvələri, xəyanətkarları da narahat edir. Cənub Qaz Dəhlizinin, TANAP-ın açılış mərasimlərinin böyük təntənə ilə keçirilməsi, Azərbaycanın müdafiə qüdrətinin göstəricisi olan Silahlı Qüvvələrimizin 100 illiyi münasibətilə təşkil olunan möhtəşəm parad təbii ki, ermənipərəst dairələrin maliyyələşdirdiyi daxili və xarici satqınları qıcıqlandırmaya bilməzdi. Yəni, Azərbaycanın dinamik inkişafı, müstəqil dövlət kimi daxili və xarici siyasətinin dünya birliyi tərəfindən dəstəklənməsi ölkəmizdə çaşqınlıq yaratmaq istəyən antiazərbaycan dairələri həsəd girdabında boğur.
Adətən daxili çirkinliklərini beynəlxalq təşkilatlarda Azərbaycana qarşı apardıqları təxribatlarla bildirən belə naxələflər fürsət düşdükcə ölkəmizə qarşı pis niyyətlərini müxtəlif üsullarla yerinə yetirməyə cəhd göstərirlər. Son günlərdə isti iyulun hərərətinin ölkənin siyasi həyatında da hiss olunması belə dairələrin təxribatlarının nəticəsidir.
…Nələr baş verir? İyul ayının əvvəllərində ölkənin əsas enerji dayaqlarından sayılan Mingəçevir İstilik Elektrik Stansiyasında baş verən qəza nəticəsində respublikada yaranan enerji böhranı iqtisadiyyatın, məişətimizin digər sahələrində- su, nəqliyyat ilə təchizatda problemlər yarandı. İnsan amilinə diqqəti dövlət siyasətinin əsası adlandıran Prezident İlham Əliyevin yanında ölkənin enerji sistemində vəziyyətlə əlaqədar keçirilən müşavirədə baş vermiş qəzanın nəticələrinin aradan qaldırılması üçün lazımıi göstərişlər verildi, məsələni araşdırmaq, günahkarları müəyyənləşdirmək üçün Dövlət Komissiyası yaradıldı, gələcəkdə belə qəzaların təkrarlanmaması üçün tədbirlər planının hazırlanması tapşırıldı. Xalqın birgə dəstəyi ilə yaranan çətinliklər qısa müddətdə aradan qaldırıldı. Dövlət strukturları fövqəladə şəraitdə belə vəziyyətin normallaşması üçün qətiyyət göstərdilər.
«Onu da qeyd etməliyəm ki, Azərbaycan vətəndaşları bu məsələ ilə bağlı böyük məsuliyyət, böyük vətəndaş həmrəyliyi göstərmişlər. Bütövlükdə Azərbaycan cəmiyyəti bu çətin sınaqdan şərəflə çıxa bilmişdir» söyləyən cənab İlham Əliyevin sözləri xalq-iqtidar birliyinin ifadəsi olmaqla ölkədə gərginliyin aradan qaldırılmasına da mənəvi dayaq oldu. Məqam gözləyən düşmənlərimiz yaranan enerji böhranından istifadə edərək ölkədə sabitliyin pozulmasına cəhd göstərdilər. Az sonra Gəncə Şəhər İcra Hakimiyyətinin başçısı Elmar Vəliyevə, onun köməkçilərinə qarşı silahlı terror aktı törədildi. Azərbaycanın ən böyük mədəniyyət mərkəzi, ziyalılar, vətənpərvərlər yurdu, dövlətçiliyimizə sadiq insanlar yetirən Gəncədə baş verən, dövlətçiliyimizə qarşı tərədilən terroru ölkə ictimaiyyəti hiddətlə qarşıladı. Hadisəni törədən cinayətkarların cəzalandırılmasına etiraz edən radikal düşüncəli qrupun keçirdiyi aksiyaların qarşısını almağa cəhd göstərən asayiş qoruyucularına –polis xəbərdarlığına itaətsizlik nəticəsində yaranan qarşıdurmada polis polkovniki İlqar Balakişiyev və polis polkovnik –leytenantı Səməd Abbasov qətlə yetirildilər. Bu cinayət hadisələri, dövlət məmuruna, yüksək çinli polislərə qarşı törədilən terrorlar ölkədə mövcud olan sabitliyə qarşı yönəlmiş təxribatlar idi.
Azərbaycan Prezidentinin ictimai-siyasi məsələlər üzrə köməkçisi Əli Həsənov son hadisələrə münasibətini «Facebook» səhifəsində geniş şərh edərək terrora qarşı mübarizədə xalqı birliyə çağırdı. « İdeoloji təxribat deyəndə, bir məqamı da yada salmaq yerinə duşərdi. Yaxın tariximizdə Azərbaycan əsilli xarici vətəndaşın törətdiyi ilk terror aktı Azərbaycan Dövlət Neft Akademiyası hadisəsidir. Amma həmin terror öz hədəfinə çatmamış, terror aktı, onu törədən şəxs və arxasındakı qüvvələr cəmiyyət tərəfindən birmənalı olaraq lənətlənmişdilər. Bu dəfə də terror Azərbaycan əsilli xarici vətəndaş tərəfindən törədilib Amma qeyd etdiyim kimi, ona ictimai bəraət qazandırmaq üçün uzunmüddətli iş aparılıb. Bəzi sosial səhifələrdə « qalxın, digər şəhərlərdə də bunu təkrar edin» çağırışları terrorun yeni dalğasına çağırış kimi qiymətləndirilə bilər. Çünki bu aksiyalarda Azərbaycan vətəndaşlarının kütləvi iştirakını təmin etmək məqsədi güdülür.»
Gəncə hadisələrini törədənlərin də məqsədi ölkədə sabitliyin pozulması, xaos və qarşıdurma yaratmaq idi. Amma belə dairələrə cavabı iqtidarla birliyi ilə verən Azərbaycan xalqı cinayəti törədən Yunis Səfərov, Rəşad Böyükkişiyev, Bəkram Əliyev kimiləri lənətləyir, Azərbaycanda iğtişaşlar yaratmağa çalışanların niyyətlərinin baş tutmayacağına əmin olduqlarını bildirirlər.
Azərbaycan xalqı birliyi ilə ölkəmizə qarşı düşmən münasibət göstərən ermənipərəst qüvvələrə göstərdi ki, möhkəm təmələ əsaslanan ölkəmizin sabitliyini heç bir qüvvə poza, sarsıda bilməz.
Terrorları dini radikalizmdən istifadə edərək törədənlər Naradaran hadisələri zamanı da layiq olduqları cavabı aldılar. Nardaranda yuva quran və xarici havadarlarından dəstək alan təxribatçılar dövlətin gördüyü tədbirlər nəticəsində, qanun çərçivəsində cəzalarını aldılar. Ölkəmizdə qarışılqlıq salmaq istəyənlər niyyətlərinə çatmadılar.
Növbəti dəfə Gəncədə sabitliyi pozmağa cəhd edən radikal qüvvələr də cəzasız qalmadı və bundan sonra da qalmayacaq. Çünki Azərbaycanın xalq tərəfindən seçilən, siyasəti bütün dünya azərbaycanlıları tərəfindən dəstəklənən, humanist, insanlara dəyər verən, beynəlxalq ictimaiyyət arasında böyük hörmət və nüfuza malik cənab İlham Əliyev kimi Prezidenti var . Eyni mərkəzdən idarə olunan, sosial şəbəkələr vasitəsilə insanları itaətsizliyə sövq edən qüvvələr unudurlar ki, respublikanın ən böyük şəhərlərindən olan Gəncə 1993-cü ildəki Gəncə deyil. Hadisələr zamanı dövlətin siyasətini dəstəkləyən bütün Azərbaycan xalqı dövlətçiliyin qorunması, müstəqilliyimizin əbədiliyi naminə Prezident İlham Əliyevin ətrafında sıx birləşərək aprel ayının 11-də dövlət başçımıza göstərdikləri yekdil etimadı bir daha təsdiqlədilər. Xalq Azərbaycanı dünya birliyində qüdrətli ölkələr sırasına çatdıran inkişafın davamına tərəfdar çıxaraq antiazərbaycan qüvvələrə «yox» dedi. Müstəqillimizin əbədiliyini qoruyan, bunun üçün ölkədə davam edən quruculuq və inkişafa, sabitliyə vətəndaşlıq mövqeyindən yanaşan, demokratiyanın yaratdığı söz, vicdan azadlıqdan məmnun qalan insanlar yenə də iqtidarın siyasətini dəstəklədilər. Xarici ölkələrdə «mətbəx mühacirləri» kimi tanınan, Azərbaycana qarşı aksiyalarda iştirak edənlərə nifrətlərini həmrəylikləri ilə bildirdlər.
Azərbaycanın tolerantlıq, multikulturalizm ənənələrinə sadiqliyi dövlət siyasətinin əsasını təşkil etdiyindən ölkəmizdə bütün millətlərə dini mənsubiyyətlərə görə fərq qoyulmur. Ölkəmizdə yaşayan, milliyyətindən asılı olmayaraq hər bir azərbaycanlı adət – ənənələrinin qorunmasında, yaşadılmasında sərbəstdir. Əksinə dini radikalizmdən istifadə edərək belə terrorları törədənlərin əməlləri mərhəmət, sülh prinsiplərini təbliğ edən İslam dininə qarşı cinayətdir. Ölkəmizdə «İslam Həmrəyliyi ili»nin elan olunması, dini və tarixi abidələrə diqqətin artırılması, Bakının İslam Mədəniyətinin Paytaxtı elan olunması (2009-cu il) , 2018-ci ildə Naxçıvanın bu ada layiq görülməsi, Azərbaycanın tolerantlıq və multikultural təcrübəsinin dünyada təbliğ olunması ölkəmizdə din-dövlət münasibətlərinin sağlam prinsiplərə əsaslandığını göstərir. Bu baxımdan tam əminliklə deyə bilərik ki, terroru törədən cinayətkarlar və onların havadarları İslam aləmindən, islami dəyərlərdən xəbərsizdirlər. « Bizim müstəqillik tariximizdə ölkəmizə qarşı bir neçə dəfə təxribatlar törədilmişdir, o cümlədən silahlı təxribatlar, terror aktları, dövlət çevrilişlərinə cəhd. Onların biri də baş tutmadı. Bunun başlıca səbəbi ondan ibarətdir ki, Azərbaycanda xalq-iqtidar birliyi var. Mən dəfələrlə bu barədə öz fikirlərimi bildirmişdim, bir daha demək istəyirəm, xalq- iqtidar birliyi sabitliyimizin əsas şərtidir. Xalq –iqtidar birliyini heç bir qüvvə- nə xarici, nə də daxili qüvvə sarsıda bilməz.»
Prezident İlham Əliyevin respublikanın hüquq mühafizə orqanları rəhbərlərinin iştirakı ilə keçirdiyi iclasda söylədiyi bu fikirlər bütün Azərbaycan xalqının ümumi rəyinin ifadəsidir. Çünki Azərbaycanda təhlükəsizlik ən yüksək səviyyədə qorunur. Dünya dövlətləri arasında iqtisadi inkişaf baxımından yüksək pillərdə yer alan, siyasi, diplomatik, hərbi potensialı artan respublikamızın sivilizasiyalararası dialoq mərkəzi, qitələrarası körpü kimi tanınması sübut edir ki, Azərbaycan dünyada az-az rast gəlinən nadir, sabit ölkələrdəndir. Bunu gözü götürməyən qüvvələrin ölkəmizə olan düşmən münasibəti siyasi qısqanclıqdan qaynaqlanır. İllərdən bər ermənipərəst dairələrin apardıqları təxribatların nəticəsiz qalması da göstərir ki, beynəlxalq aləmdə siyasəti dəstəklənən Azərbaycana qarşı kampaniyalar, müxtəlif xarici mərkəzlər tərəfindən idarə olunan «qara piar»lar səmərəsizdir. « Bizim siyasi iradəmizə heç bir qüvvə təsir edə bilməz. Bizi tutduğumuz yoldan heç kim döndərə bilməz. Azərbaycanın müasir tarixi mənim dediklərimi dəfələrlə sübut edib Kim ki, bizə qarşı çirkin niyyətlərlə hərəkət edib, özü bu hərəkətlərin qurbanı olub, Əvvəllər də belə olub, bu gün də belədir, bundan sonra da belə olacaq» söyləyən dövlət başçımızın bildirdiyi kimi Azərbaycan xalqı sülh , əmin-amanlıq, təhlükəsizlik şəraitində yaşayıb, yaradır, qurur. İnkişafımıza, sabitliyimizə əngəl olmaq istəyənlər isə məsuliyyətdən boyun qaçıra bilməyəcək, cəzasız qalmayacaqlar. Onların son addımları da göstərir ki, terrorçular əməllərinə görə məhkəmə, ədalət, qanun qarşısında cavab verəcəklər. Həmişə olduğu kimi, Azərbaycan dövləti bu dəfə də gücünü, qüdrətini, terrora qarşı mübarizədə dəyişilməz əzmini göstərəcək. Qarayaxma kampaniyasının «öncülləri», AXCP sədri Əli Kərimli, «Milli Şura»nın kağız üzərində rəhbəri Cəmil Həsənli başda olmaqla özgə qapılarında dilənən, Azərbaycanın milli maraqlarını satan antiazərbaycan «demokrat məxluqların», üzüdönüklərin, vətənsizlərin- Orduxan Teymurxanın, Tural Sadıqlının, Emin Millinin, Vidadi İsgəndərlinin nəsibi Azərbaycan xalqının qəzəbi, lənətidir.
«2003-cü ildən sonra Azərbaycanın dinamik inkişafı təmin edilmişdir. Biz güclü, qüdrətli dövlət qura bilmişik. Bu gün Azərbaycan, sözün əsl mənasında, müstəqil siyasət aparan ölkədir. Bu gün dünya xəritəsində belə ölkələrin sayı o qədər də çox deyil. Xüsusilə biz ərazisi, əhalisi o qədər də böyük olmayan ölkələrə fikir versək görərik ki, müstəqil siyasət aparmaq iqtidarında olan ölkələr o qədər də çox deyil. Biz tam müstəqil siyasət aparırıq. Bizim siyasətimiz milli maraqlar üzərində qurulubdur. Azərbaycan xalqının maraqları bizim siyasətimizin mənbəyidir, onun əsasıdır» söyləyən cənab İlham Əliyev dəfələrlə bildirib ki, kənardan bizim siyasətimizə təsir etmə imkanları sıfıra bərabərdir. Dövlət siyasətimiz Azərbaycan xalqı tərəfindən dəstəklənir və müdafiə olunur. Xalq-iqtidar vəhdəti qazanılan uğurların əsas səbəbidir.
Xuraman İsmayılqızı,
«İki sahil»