Ölkədə həyata keçirilən irimiqyaslı iqtisadi islahatlar nəticəsində indi kənd yerində yaşayanlar üçün iş həmişə olur. Yəni, dövlətin xüsusi qayğısı ilə Azərbaycan kəndlisi torpağını əkib-becərməklə özünə firavan gün-güzəran qurur.
Lənkəran rayonunun Separadi kəndində də belədir. Burada iş sıradan gileyli adam tapmaq çətindir. Kənddə çox gəlir gətirən ənənəvi sahələrə diqqət yetirməklə əhalinin məşğulluğu təmin olunur. Həm də iqtisadiyyat qalxdıqca kənd günbəgün inkişaf edir, yeni tikililər hesabına ev-ev böyüyüb abadlaşır. Lap yaxın vaxtlarda burada 2 müasir tipli məktəb binası, tibb məntəqəsi tikilib, yollar yenidən qurulub, demək olar ki, artıq narahatlıq doğura bilən heç bir sosial problem qalmır. Kənddə yaşamaq üçün hər cür şərait vardır. Bu da adamların qurub-yaratmaq həvəsini artırır. Separadinin iqtisadi, sosial, mədəni mənzərəsi ürəkaçandır. Bütün bunlara görə camaat, hər şeydən əvvəl, ulu öndər Heydər Əliyevin əsasını qoyduğu mükəmməl strateji kursu dönmədən davam etdirən ölkə Prezidenti İlham Əliyevə öz dərin minnətdarlığını bildirir.
Separadidə 100 hektara yaxın sitrus bağı salmaqla daha 200 nəfər işlə təmin olunub. Hazırda yaxşı qazanc əldə etməkdən ötrü əkilən hər bir tingə xüsusi qayğı göstərilir. Ümumiyyətlə, separadililər İşləyib halal zəhmətlə həyatlarını rahat təmin edə bilirlər. İşgüzar, zəhmətsevər, torpağının qədir-qiymətini bilən adam üçün hər vaxt iş tapılır. Fərəhli haldır ki, bu istiqamətdə başlanmış tədbirlər davamlıdır.
Zəfər Orucoğlu,
Azərbaycan Jurnalistlər Birliyinin üzvü
