Menu
  • 20-04-2018
      • Bakı +14+18

  • 20-04-2018
    • $ 1.7
      2.1043

1   2   3   4   5   6

İQTİSADİYYAT

Lənkəran düyüsü “Made in Azerbaijan” brendi ilə...

14-01-2018 [ 10:12 ] [ oxunub:483 ]
A+ | A-

Prezident İlham Əliyevin tapşırıq və tövsiyələrinə əsasən son illər ölkəmizin cənub bölgəsində, o cümlədən Lənkəran rayonunda ənənəvi təsərrüfat sahəsi olan çəltikçiliyin inkişafına diqqət daha da artırılıb. Ölkəmizdə aqrar bölmənin inkişafına göstərilən dövlət dəstəyi bu rayonda da uzun müddət tənəzzül dövrünü yaşayan çəltikçiliyin inkişafı üçün geniş imkanlar yaradıb.

AZƏRTAC-ın bölgə müxbiri xəbər verir ki, ötən il dövlətimizin başçısının iştirakı ilə Lənkəranda çəltik emalı zavodu açılıb. Regionda əhəmiyyətli layihələrdən olan bu müəssisə indi tam gücü ilə fəaliyyət göstərərək məhsul istehsalçılarının işini daha da asanlaşdırıb. Lənkəran çəltik emalı zavodu gündəlik 10 ton emal və 20 ton qurutma gücünə malikdir.

Müasir texnologiyalardan, qabaqcıl təcrübədən istifadə etmədən əkinçiliyin bütün sahələrində olduğu kimi, çəltikçilikdə də uğur qazanmaq mümkün deyil. Bu baxımdan müəssisə düyü istehsalı sahəsində ixtisaslaşmış ölkələrin qabaqcıl texnologiya və təcrübələrindən yararlanır.

Girdəni və Siyavar kəndlərində əvvəllər əl əməyindən istifadə edilərək gündə 0,50 hektara yaxın sahədə çəltik əkilirdisə, hazırda yeni texnikalar vasitəsilə gün ərzində 2 hektar sahədə çəltik əkmək mümkündür. Texnika ilə əkilən sahələrdən yüksək məhsul əldə olunur və bu üsul təsərrüfat sahibləri üçün də iqtisadi baxımdan səmərəlidir.

Zavoda düyü təhvil verənlərdən biri də təsərrüfatçı Sərdar Səttarovdur. “Ötən il 2 hektar sahədə ilk dəfə çəltik əkmişdim. Məhsuldarlıq çox yaxşı oldu. Əldə etdiyimiz məhsulu çəltik emalı zavoduna təhvil verdik. Hər kəs bilir ki, yerli “Haşimi” düyüsü özünəməxsus dada və fərdi xüsusiyyətlərə malikdir. Buna görə də yaxşı qiymətə satılır”, - deyə o bildirib.

İstər daxili, istərsə də xarici bazarlarda ekoloji cəhətdən təmiz düyüyə böyük ehtiyac var. Bunu çəltik emalı zavodunun direktoru Emin Cəbizadə də təsdiqləyir: “Lənkəranda istehsal edilən düyüyə böyük tələbat var. Emal etdiyimiz məhsulları “Made in Azerbaijan” brendi ilə xarici bazarlara çıxarmaq üçün danışıqlar aparırıq. Yaxın gələcəkdə Lənkəran düyüsü bir çox xarici ölkə bazarlarına çıxarılacaq.”

Qeyd edək ki, zavodun aylıq emal gücü 300 ton, düyüqurutma gücü isə 900 tondur. Müəssisədə 15 nəfər daimi işlə təmin edilib. Gələcəkdə müəssisənin gücünün iki dəfə artırılması və işçilərin sayının 60 nəfərə çatdırılması nəzərdə tutulub.

Müəssisənin ərazisində, həmçinin hazır məhsul anbarı, satış mərkəzi və əlavə istehsal sahəsinin yaradılması da planlaşdırılıb.

FOTO QALEREYA

DİGƏR XƏBƏRLƏR