Paytaxtın Nəsimi rayonunda genişmiqiyaslı abadlıq, quruculuq, yenidənqurma və yaşıllaşdırma işləri davam etdirilir.

Bu il mayın 10-da IV mikrorayonda yerləşən Cavadxan, H.Seyidzadə və M.Kazımovski küçələrinin kəsişməsində yeni istirahət parkı istifadəyə verilib.

AZƏRTAC xəbər verir ki, həmin parkda sakinlərin asudə vaxtlarını səmərəli keçirməsi üçün 0,7 hektar sahədə və ətraf ərazidə abadlıq işləri aparılıb, müxtəlif növ həmişəyaşıl ağac və gül kolları əkilib. Bundan başqa 1000 kvadratmetrdən artıq ərazidə yeni ot örtüyü və 350 kvadratmetrdən artıq süni örtük döşənib, 500 metrdən artıq suvarma xətti çəkilib. Parkda sakinlərin istirahəti, uşaqların və gənclərin asudə vaxtlarını səmərəli keçirmələri üçün tam şərait yaradılıb. Burada müasir işıqlandırma sistemi, iki ədəd söhbətgah, 18 ədəd fitnes avadanlığı quraşdırılıb, 10 ədəd yeni oturacaqlar qoyulub. Uşaqlar üçün hər biri 80 kvadratmetr olmaqla üç ədəd əyləncə qurğuları montaj olunub, park boyu idman yürüşü üçün zolaq salınıb. Cavadxan küçəsi boyu 0, 03 hektar sahədə əsaslı təmir və abadlıq işləri davam etdirilərək parka əlavə olunub.

Sentyabrın 25-də yeni yaradılmış istirahət guşəsi sakinlərin istifadəsinə verilib. Parkda sakinlərin istirahəti, asudə vaxtlarını səmərəli keçirimələri üçün hər cür şərait yaradılıb, yeni avadanlıq və qurğular quraşdırılıb, yeni oturacaqlar qoyulub.

Bundan başqa parkda genişmiqyaslı yaşıllaşdırma işləri aparılıb, müasir tələblərə cavab verən səkkiz ədəd gecə işıqlandırılması sistemləri quraşdırılıb, 500 kvadratmetr sahəyə ot örtüyü döşənib, uzunluğu 150 metr olan beton qaçış-yürüş yolu əvvəlki parkdakı yürüş zolağına əlavə olunub, 1050 kvadratmetr əraziyə tamet daşları döşənib, 250 paqonmetr bardür daşları düzülüb.