Sentyabrın 20-də Bakıda Nəqliyyat, Rabitə və Yüksək Texnologiyalar Nazirliyinin dəstəyi ilə “Caspian Energy Transport Forum”u öz işinə başlayıb.

Beynəlxalq tranzit üçün əlverişli coğrafi mövqeyə malik Azərbaycan Respublikasında nəqliyyat sahəsi xüsusi əhəmiyyət kəsb edir. Nəqliyyat sektorunda nəhəng regional layihələr həyata keçirilir. Bu layihələr sektorun inkişafına, ölkəmizin tranzit potensialının gücləndirilməsinə, nəqliyyat təhlükəsizliyinin təmin olunmasına xidmət edir.

AZƏRTAC xəbər verir ki, bu fikirləri “Caspian Energy Transport Forum”un açılışında nəqliyyat, rabitə və yüksək texnologiyalar naziri Ramin Quluzadə deyib.

Nazir qeyd edib ki, həyata keçirilən tədbirlər nəticəsində sərnişin və yükdaşıma asanlaşır. Bu da ölkə iqtisadiyyatı, regionların inkişafına birbaşa təsir göstərir.

"Caspian European Club" və "Caspian American Club" çərçivəsində keçirilən forumda, həmçinin Azərbaycan Respublikası Dövlət Dəniz Administrasiyasının, “Azərbaycan Dəmir Yolları” ASC-nin, “Azərbaycan Xəzər Dəniz Gəmiçiliyi” QSC-nin, “Azərbaycan Hava Yolları” (AZAL) QSC-nin, “Bakı Beynəlxalq Dəniz Ticarət Limanı” QSC-nin və “Bakı Metropoliteni” QSC-nin rəhbərliyi iştirak edir.