Mən fəxr edirəm ki, müharibədə Ali Baş Komandan olduğu kimi, informasiya cəbhəsində də Ali Baş Komandan olan cənab Prezident İlham Əliyev dünya siyasətində liderlik edir

Azərbaycan Respublikasının Prezidenti – Silahlı Qüvvələrin Ali Baş Komandanı cənab İlham Əliyev həmkarları üçün əlçatmaz olan fitri istedadı, uzaqgörən müdrik siyasəti, dərin zəkası, zəngin intellektual səviyyəsi və yüksək mədəniyyəti ilə dünyanın aparıcı telekanallarına, xüsusilə də əvvəlcədən öyrədilib göndərilmiş “erməni virusu”na yoluxdurulmuş qərəzli jurnalistlərə böyük səbir və təmkinlə verdiyi çoxvektorlu möhtəşəm müsahibələri ilə dünya siyasətində liderlik edir. Siyasi möhtəkirlərə, ədalətsiz beynəlxalq birliklərə liderliyin kökündə ədalətin olduğunu özünün timsalında fakt olaraq göstərir və onları ədalətə səsləyir.

Zəngin, siyasi bilik tələb edən sərrast hazırcavablığı ilə dünyanın diqqətini özünə cəlb edən cənab İlham Əliyev işğalçı Ermənistanın davamlı hərbi təcavüzünə məruz qalan Azərbaycanın öz torpağında özünü müdafiə etdiyini, BMT Təhlükəsizlik Şurasının 30 ildir icra edə bilmədiyi məlum 4 qətnaməsinin tələblərini yerinə yetirdiyini və bu haqq mübarizəsində terrorçuları zərərsizləşdirərək heç bir beynəlxalq hüququ və müharibə qaydalarını pozmadığını, ermənilərdən fərqli olaraq dinc əhaliyə təhlükə yaratmayaraq 1949-cu il Cenevrə Konvensiyasına riayət etdiyini elan edərək təkzibedilməz faktlarla dünya ictimaiyyətinin gözü qarşısında mənfur qüvvələri ifşa etdi.

Sosializm sisteminin süqutuna səbəb olan kapitalizmin baş ideoloqu, yeni dünya nizamının əsasnaməsi sayılan məşhur “Texnotron era” adlı kitabın müəllifi, məşhur siyasətçi və dövlət xadimi Zbiqnev Bjezinski ulu öndər Heydər Əliyev haqqında demişdir: “Heydər Əliyevin ölümü ilə dünya siyasətində bir boşluq yarandı!” Ancaq dünyada gedən ictimai- siyasi proseslər onu göstərir ki, əgər o, sağ olsaydı, yəqin ki, deyərdi, cənab İlham Əliyevin simasında o boşluq artıq dolmuşdur...

Belə ki, dünyada gedən ictimai-siyasi prosesləri bizim əleyhimizə yönəldən və Azərbaycan haqqındakı həqiqətləri özümüzdən də yaxşı bilən, Dağlıq Qarabağ ətrafında cərəyan edən bütün hadisələri, əvvəldən axıra qədər bizdən də artıq izləyən və həqiqətləri beynəlxalq ictimaiyyətdən gizlədərək erməni feyklərinin yayılmasına dəstək verən və açıqdan-açığa onları müdafiə edərək ədalətsiz qərarlar qəbul edən ermənipərəst dünya birliklərinin qərəzli hücumlarına sinə gərmək, onların Dağlıq Qarabağ həqiqətləri ətrafında yaratdıqları 30 illik informasiya blokadasını darmadağın etmək, nəinki riyakar Paşinyanın dövləti və hərbi cinayət törədərək soyqırım siyasəti aparan faşist olduğunu, hətta əsrlərdir ki, ermənilərin özləri haqqında dünyada yaratdıqları mifi belə darmadağın etmək və heç vaxt olmadığı kimi beynəlxalq ictimaiyyətin gözündən salmaq, doğrudan da, iti zəka, fitri istedad, zəngin siyasi bilik və hünər tələb edir. Məhz, bu keyfiyyətlər onu düşmənlərin hədəfinə çevirdi.

Sultan (qızıl) Əbdülhəmidi yıxmadan Osmanlı İmperiyasını devirə bilməyən qüvvələrin törəmələri ulu öndər Heydər Əliyevi vəzifəsindən uzaqlaşdırandan sonra Dağlıq Qarabağ işğalına nail olan qüvvələr, bu gün torpaqlarımızı işğaldan azad edə biləcək yeganə qüvvə cənab İlham Əliyev olduğunu çox gözəl bildiklərindən bütün güc və bacarıqlarını onun hakimiyyətini devirmək istiqamətinə yönəltdilər.

Mən bütün məsuliyyətimlə deyərdim ki, ataya ağıl öyrədən, onu yaşca böyük qəbul edib, ağılca böyüklüyünü qəbul etməyən, vaxtında dərk edə bilməyən gənc gələcəkdə xoşbəxt ola bilməz. Onu başa düşəndə artıq gec olur. Bizim bir millət kimi tarixlər boyu uduzmağımızın səbəbi birliyimizin olmamasındadırsa, onun da səbəbi öz liderimizi vaxtında görüb dəyərləndirə bilməməyimiz olub. İştirakçısı olduğumuz məlum hadisələrdən, bəlalardan, oddan-alovlardan bizi xilas edən böyük şəxsiyyətlərimizi etiraf edək ki, lazımi qədər dəyərləndirə bilməmişik. Bir az geriyə baxıb başımıza gələn hadisələri təhlil edəndə öz-özlüyümüzdə bunların təsdiqini tapmış oluruq. Belə ki, 30 ildir yalan vədləri və mənasız bəyanatları ilə vaxtı uzadan ATƏT-in Minsk qrupunun məqsədi məhz cənab İlham Əliyevin Prezidentlik səlahiyyətlərinin qurtarmasına hesablanmışdı. Lakin gördülər ki, Azərbaycan xalqı müdriklik edib referendumla onun prezidentlik səlahiyyətlərini artırdı və başa düşdülər ki, bu müddətdə onların məkrli planları işləməyəcək və bu vaxtı gözləməyərək çoxdan xərçəng kimi içimizə yayılan “beşinci kalon” və onun simptomlarını işə saldılar və tələm-tələsik cənab İlham Əliyevin hakimiyyətini devirməyi ön plana çəkdilər. Çünki bilirdilər ki, cənab İlham Əliyev nəinki Qarabağı, hətta keçmiş əsrlərdə ermənilərə verilmiş torpaqlarımızı da geri alacaqdır. Lakin, ölkədə gedən məqsədyönlü kadr islahatları öz işini gördü. Prezidentlə öz xalqı arasında uçurum yaradan qüvvələr aradan qaldırıldı, xalq öz liderinə qovuşdu, onu olduğu kimi görə bildi, sanki onu yenidən kəşf etdi.

Qədirbilən müdrik Azərbaycan xalqı öz liderini yaxından tanıdı, ona güvəndi və sevdi. Bütün Azərbaycan xalqı bir yumruq kimi onun ətrafında birləşdi. Azərbaycan tarixində misli-bərabəri görünməyən, müharibədə qələbəmizə zəmanət verən və heç vaxt sarsılmayacaq bugünkü möhtəşəm ümumxalq birliyi yarandı!

İndi Vətənini və xalqını sevən bütün Azərbaycan xalqı bir nəfər kimi cənab İlham Əliyevin xalqımızın dili ilə desək, başına and içir. Bu, məni qələbəmiz qədər sevindirir. Sevinirəm ona görə ki, bütün xalqımız öz lideri ilə arasında yaradılan gözəgörünməz “Çin səddini” yarıb keçə bildi, onda olan bu yüksək dəyərləri görə bildi və möhtəşəm ümumxalq birliyi yarandı.

Unutmamalıyıq ki, cənab İlham Əliyev ən azı beş cəbhədə vuruşur. Birinci arxa cəbhə - “beşinci kalon”un tör-töküntüləri ilə, ikinci - döyüş cəbhəsində, üçüncü  - informasiya cəbhəsində, dördüncü  - dünya siyasət meydanında, beşinci  - dost kimi görünən düşmən qüvvələrlə...

Belə ki, müzəffər ordumuz Laçın və Şuşaya yaxınlaşdıqca həmin qüvvələrin əsl sifətləri göründü. Öz ərazisində terrorçulara qarşı mübarizə aparan Azərbaycanı hərbi təxribata çəkməyə başladılar. Azərbaycanın müharibə zonasından kənarda olan şəhər və kəndlərini, dinc əhalini Ermənistan ərazisindən ballistik raketlərlə atəşə tutulmasına rəvac verildi. Bütün bunları nəzarətdə saxlayaraq təxribatlara getməyən və nəyi necə, nə vaxt etmək lazım olduğunu çox gözəl bilən siyasi lider, Ali Baş Komandan cənab İlham Əliyev Kollektiv Təhlükəsizlik Müqaviləsi Təşkilatına üzv olan dövlətlərin müharibəyə cəlb edilməsinə imkan vermirdi, pusquda dayanıb bu məqamı həsrətlə gözləyən o qüvvələrin gizli planlarının qarşısını aldı. Heç bir beynəlxalq hüquq və müharibə qaydalarının pozuntularına yol vermədi, Ermənistanın məğlubiyyətini özünün məğlubiyyəti hesab edən ölkələr ermənilərə sevgidən yox, özlərinin nüfuzdan düşməməsi üçün işğalçı dövlətə bütün vasitələrlə kömək etmək səylərini artırdılar. Hətta Ermənistanda olan 70 il Sovet Rusiyasının bəslədiyi ordunu belə sərhədlərimiz boyu yerləşdirdilər. Lakin bütün bunlara baxmayaraq, gözləmədikləri ciddi müqavimətlə rastlaşdılar. Çünki Azərbaycanın güclü ordusu və bu ordunu yaradan müdrik siyasi rəhbəri cənab İlham Əliyevdir. Bu gün Azərbaycan xalqı xoşbəxtdir ki, onun Prezidenti ulu öndər Heydər Əliyev siyasi kursunu davam etdirən, Vətənini və xalqını canından, qanından və bütün varlığından artıq sevən cənab İlham Əliyevdir.  Zahirən kiçik görünən və daxilən üçüncü dünya müharibəsi qədər ağır olan bu döyüşdə qalibiyyətimizin səbəbkarı kimi düşmən qüvvələrin hədəfində Qarabağdan qabaq məhz Odur! Onu göz bəbəyi kimi qorumağa borcluyuq!

O bir Allah vergisidir!

Onu düşməndən qoruyaq!

Özü bütöv bir millətdir-

Milləti şərdən qoruyaq!

Yaşasın müdrik Azərbaycan xalqı! Yaşasın əvəzedilməz Ali Baş Komandan cənab İlham Əliyev! Yaşasın şanlı Azərbaycan Ordusu! Yaşasın bir millət, iki dövlət – Azərbaycan-Türkiyə! Qoy ədalət zəfər çalsın! Qarabağ Azərbaycandır!

Həsən Şirinov