İtaliyanın cənubundakı Puglia bölgəsində yerləşən Alberobello 1996-cı ildən bəri YUNESKO-nun Dünya İrsi Siyahısında yer alır.

“İki sahil” xəbər verir ki, pandemiyadan əvvəl ulduzu parıldayan bu şəhər, İtaliyanın cənubuna gələn turistlərin tez-tez ziyarət etməyi üstün tutduğu yerlərdən birinə çevrilməyi bacarıb. Bənzərsiz konik damları ilə diqqət çəkən Alberobellodakı bütün evlər demək olar ki, eynidir. Beləliklə, bu kiçik italyan qəsəbəsi bu xüsusiyyətinə  görə digərlərindən fərqlənir. Xarici turizm xidmətində bir il səssiz qalan bu şəhərlə daha yaxından tanış olaq.

İtaliya Avropanın ən diqqətçəkən şəhərlərinə ev sahibliyi edən ölkələrdən biridir. Fransadan sonra qitədə ən çox turizm ölkəsi olan İtaliya eyni zamanda tarixi və təbii gözəllikləri ilə turistlərin dünyada ən çox görmək istədiyi yerlərdən sayılır. Ölkənin hər bölgəsində təbii gözəlliklərlə bərabər fərqli bir tarixin və mədəni təbəqənin şahidi ola bilərsiniz. Alberobello da bunlardan biridir.

Rəsmə bənzəyən bu gözəl coğrafiyanın cənubunda  olan Puglia İtaliyanın ən məşhur şəhərlərindən birinə ev sahibliyi edir. Son illərdə dünya səviyyəsində nüfuz qazanan Alberobello Bari əyalətində kiçik bir yaşayış məntəqəsidir. Əlbətdə ki, bu kiçik qəsəbənin qazandığı şöhrətdə sosial media paylaşımları böyük rol oynayır.

Xüsusilə “İnstagram”dakı foto paylaşımları ilə geniş kütlələrin diqqətini çəkən Alberobello pandemiyadan əvvəl hər il on minlərlə turisti qəbul edib. Trulli adlanan konik konstruksiyalı dam örtüklü evlər, Alberobellonun ən xarakterik xüsusiyyətini təşkil edir. Şəhərdəki bütün mülki memarlıq nümunələri bu tip damdan tikilib. Adı İtalyanca "gözəl ağac" mənasını verən Alberobello İtaliyanın məşhur liman şəhəri Bari ilə bağlılığı var. Təxminən 11 min insanın yaşadığı şəhərin yerli adı Ajarubbeddir. 1996-cı ildə UNESCO-nun Dünya Mədəni İrs Siyahısına daxil olan Alberobello 25 ildir ortaq bir miras kimi tanınır. Bu məqam sevimli şəhəri daha da xüsusi edir. 2013-cü ildən bəri Şanlıurfada tarixi Harran bölgəsi ilə qardaşlaşan şəhər olan Alberobello ilk baxışdan bu yeri xatırladan bir memarlıq üslubuna malikdir. Bununla birlikdə, əlbəttə ki, bəzi fərqləri var. Alberobelloda trulli adlanan bu dam örtükləri daşlarla tikilib. Üstəlik Harranla müqayisədə Alberobellonun tarixi tamamilə yenidir. Alberobelloda şəhərin kilsəsi xaricində demək olar ki, bütün evlər eyni şəkildə tikilir. Üstəlik, hamısı ağ tonlarda. XVII əsrə qədər tamamilə meşə olan bu coğrafi ərazi bölgənin hakimi olan II Kont Giangirolamonun əmri ilə kiçik evlər qurmaq məqsədi ilə yaradılıb. Napoli Krallığından asılı olan və İspaniyaya vergi ödəyən həmin bölgə zamanla inkişaf edib.

18-ci əsrin sonunda - 1797-ci ildə hökmdar təyin olunan 4-cü Kral Ferdinand tərəfindən rəsmi olaraq şəhər statusu almış olan Alberobello o zamandan bəri eyni tip evlərlə xarakterik görünüşünü yaratmağa başlayıb. 1797-ci ildə ilk bələdiyyə başçısını seçən qəsəbə bu baxımdan köhnə bir demokratik ənənəyə sahibdir. Günümüzdə meşəçiliklə bərabər, həm də turizmlə məşğul olan Alberobello hər il çox sayda turist qonaq qəbul etməsinə baxmayaraq Çində başlayan və İtaliyada böyük itkilərə səbəb olan koronavirus epidemiyasından ciddi ziyanla qarşılaşıb. Bu məşhur və füsunkar qəsəbəni bir ildən çoxdur ki, heç bir turist ziyarət etməyib. Bölgə xalqı, bütün dünya kimi, bu pis günlərin ən qısa zamanda geridə qalacağını gözləyir.

Ancaq peyvənd işlərinə hazırkı şərtlər altında başlansa da, ən azı bu yaya qədər bölgədə hər hansı bir turistik fəaliyyətin həyata keçirilməsinin çox çətin olduğu bildirilir.

Qeyd edək ki, bu müddətdə İtaliya dünyanın ən yüksək turizm gəlir itkisi olan ölkələrindən biridir.

Vüsal Cahanov, “İki sahil”