Fevralın 16-da Yeni Azərbaycan Partiyası (YAP) Səbail rayon “Akademik Filarmoniya” ərazi ilk partiya təşkilatının təşəbbüsü ilə “Şəhid ailələrinə və Vətən müharibəsi qazilərinə dəstək” layihəsi çərçivəsində təşkilatın ən gənc üzvü, Vətən müharibəsi qazisi, Xocavəndin və Füzulinin azad olunmasına görə medalları ilə təltif olunmuş, Azərbaycan Dövlət Mahnı və Rəqs ansamblının rəqqası Eyvazov Firdovsi Təvəkkül oğlu ilə görüş keçirilib. “İki sahil” xəbər verir ki, görüşdə Filarmoniyanın direktoru Xalq artisti Murad Adıgözəl-zadə, direktor müavini Afət Mikayılov və təşkilatın sədri Elçin Abbasov iştirak ediblər.

Görüş zamanı Firdovsi müharibə xatirələrini bölüşərək, Azərbaycan Ordusunun Şanlı Qələbəsi, torpaqlarımızın işğaldan azad olunması və cəbhə yoldaşlarının döyüş meydanındakı şücaəti, qəhrəmanlığı haqqında danışıb.

Söhbət əsnasında qazinin səhhəti və gündəlik qayğıları ilə maraqlanılıb. Qəhrəman qazimiz, müharibədən qayıtdığı gündən hər zaman diqqət mərkəzində olduğunu, hər kəsin ona maddi və mənəvi dəstək olduqlarını vurğulayaraq hamıya öz təşəkkürünü bildirib.

Sonda gənc partiya üzvünə Fəxri Fərman və maddi yardım təqdim olunub.