Göz ətrafındaki dəri zərif və həssasdır. Həyat tərzimizdə etdiyimiz yalnışlar özünü göz altlarında biruzə verir. Yaranan göz altı torbalar insanı yorğun və qeyri-sağlam göstərir. Amma üzünüzə təravəti qaytarmaq üçün effektiv vasitələr mövcuddur.

Su için

Göz altında yaranan torbaların başlıca səbəblərindən biri orqanizmin susuz qalmasıdır. Orqanizm susuz qalarsa, duzlar və toksinlər ixrac olmaz və göz ətrafında özünü göstərər.

Soyuq kompreslər edin

Cərrahların məsləhət gördüyü üsullardan biri qaşıqları buzlu suda isladıb, daha sonra torbaların üzərinə qoymaqdır. Digər bir üsul pambığı soyuq su və ya süddə isladaraq torbaların üstündə 10-15 dəqiqə saxlamaqdır.

Təbbi vasitələrdən maskalar hazırlayın

Aloe bitkisinin geli göz altları üçün mükəmməldir. O, göz altı torbalarını aradan qaldırmaqla yanaşı, həm də qırışları hamarlaşdırır və dərini nəmləndirir.

Bu problemin öhdəsindən gələn ikinci təbii vasitə yumurta ağıdır. Onu göz altlarına tətbiq edin və 15 dəqiqə sonra soyuq su ilə yuyun. Göz altında dəri dartılacaq və şişlər aradan qalxacaq.

1 yumurta ağına 2 qaşıq təbii kofe qataraq da mükəmməl gözəllik vasitəsi əldə edə bilərsiniz. 10 dəqiqə saxlayıb soyuq su ilə yuduqdan sonra effekti görəcəksiniz.

Bundan başqa yaşıl çay paketi, xiyar və kartof dilimi də göz altı torbalarla mübarizə aparmağa kömək edir.

Yuxusuz qalmayın

Göz altı torbalarına son qoymaq üçün 8-9 saat yatmaq şərtdir. Bundan əlavə, yatarkən aldığınız poza da önəmlidir. Üzü üstə yatdığınız halda torbalardan qaçış yoxdur.

Həkimə müraciət edin

Bəzən şişginliklər və göyərmələr xəstəliklərdən xəbər verir. Düzgün qidalandığınız və sağlam həyat tərzi sürdüyünüz halda, torbalar göz altarından çəkilmirsə, müayinə şərtdir.

Röya Rasimqızı, "İki sahil"