ABŞ-da alimləri koronavirus peyvəndlərini sınaqdan keçirmək üçün üçün meymunlardan istifadə edirdilər. NYT yazır ki, bu məqsədlər üçün ən çox müəyyən növlər seçilirdi. Onlar əvvəllər Çindən gətirilsə də, son zamanlar vəhşi heyvanların satışına qoyulan qadağa səbəbi ilə meymunların tədarükü ilə bağlı problemlər yaranıb.
Alimlərin fikrincə, insan və meymunların DNT-si 90% bənzəyir və bu səbəbdən aparılan tibbi sınaqlar üçün məhz onlar seçilir. Üzərində ən çox test aparılan yava və rezus meymunlarıdır. Lakin son zamanlar yaranan problem ilə əlaqədər həmin meymunların qiyməti artıb. Bir meymunun qiyməti təxminən 10 min dollar olub.
Yeni koronavirus ştammlarının meydana çıxması ilə əlaqədər vəziyyət daha da çətinləşdiyinə görə, indi ABŞ-ın tibbi laboratoriyaları təcili olaraq ölkəyə meymun tədarükünün yeni mənbələrini tapmağa çalışırlar. Xəstəliklərə Nəzarət və Profilaktika Mərkəzinin analitiklərinin sözlərinə görə, hələ keçən əsrin 80-ci illərində tibbi təcrübələr üçün heyvanların əsas tədarükçüsü Hindistan idi.
Hal-hazırda tədqiqat üçün heyvan çatışmazlığı artıq dövlət səviyyəsində problemə çevrilib. Alimlər bu məsələdə onlara dəstək olmaları üçün ABŞ hökumətinə müraciət ediblər. Onların qeyd etdiyi kimi, əks təqdirdə yeni peyvəndlərin sınaqlardan keçirilməsi və köhnələrinin təkmilləşdirilməsində qlobal problemlər yarana bilər.
Samirə Tağıyeva, "İki sahil"