"Ən böyük bəla bala dağıdır. Bu gün oğlum başımı uca elədi. Mən oğlumla fəxr edirəm".

“İki sahil” xəbər verir ki, bu fikirləri Dövlət Sərhəd Xidmətinin şəhidi kapitan Xəyyam Əliyevin atası Əlixan Əliyev vida mərasimində deyib.

"Biz hamımız axirət günü bu şəhidlərə qibtə edəcəyik. Çünki onlar axirəti qazandılar. Mən ana-bacılarımdan xahiş edirəm ki şəhidlərimiz üçün ağlamasınlar. Vətənimiz sağolsun, Prezidentimiz sağ olsun ki, 30 illik qara ləkəni üstümüzdən sildilər.

Dünyanın bir çox ölkələrində olmuşam, Qarabağdan söz düşəndə başıma aşağı salırdım. İndi fəxr edirəm. Bunu sadəcə ürəkdən anlamaq lazımdır. Mənim balam şəhid oldu. Bu gün mənə təsəlli verən onun şəhidliyidir. Allah bütün şəhidlərimizə rəhmət eləsin, valideynlərə də səbr versin. Sözlərimi Mikayıl Müşfiqin şeri ilə bitirmək istəyirəm:

Vətən üçün yaşayan,

Vətən üçün ölən,

Səmimi bir insan nə bəxtiyardır".