Son zamanlar ixtira olunan və mətbəxinizdə sizin üçün faydalı olacaq bəzi cihazlar haqqında topladığımız məlumatları təqdim edirik.
“Whirpool” qadınların arzusunu necə reallaşdırır?
Bu sistem bütün mətbəx cihazlarını idarə etməyə imkan verir. Evdar qadınlar yəqin ki, nə vaxtsa arzulayıblar ki, mətbəxdə bütün əşyalar çaydan, qəhvədan və s. “ağıllı” olsun. “Whirlpool” şirkəti bu arzunu reallaşdırıb. Brend bir sistemlə bütün mətbəx cihazlarının inteqrasiyasını hazırlayıb. Bu platforma hətta soyuducuda xarab olmaq üzrə olan qidalar haqqında məlumat verir, yemək çatdırılmasına nəzarət edir, bütün cihazların işini diqqətdə saxlayır.
"Ağıllı" doğrama taxtası
Düzgün qidalanma həvəskarları və ya tez-tez pəhriz saxlayan insanlar üçün həqiqətən əvəzolunmaz bir cihaz - kaloriləri hesablayan doğrama taxtasıdır. Bu cihaz, həmçinin ərzaqların çəkisini də dəqiqliyi ilə göstərir. Hər hansı ərzaq haqqında ətraflı məlumatlar almaq istəyirsinizsə, o zaman mütləq bu cihazı iPad-a qoşmalısınız. Qeyd etmək lazımdır ki, "ağıllı" cihazın daxili tərəzisi də mövcuddur. Həmin tərəzi yeməkdəki komponentlərin lazımi nisbətlərini hesablayan və eyni zamanda, yemək prosesini sürətləndirmək üçün faydalı məsləhətlər verir.
Çay hazırlayan maşın
Bu "ağıllı" cihaz çayınızı istədiyiniz zaman dəmləmək üçün bir zamanlama funksiyasına malikdir. Çayınızın hazır olmasını istədiyiniz vaxtı əlavə edə və maşındakı toxunma panelindən dəmləmə metodunu seçə bilərsiniz. Proqramlaşdırılmış maşın çayınızı avtomatik olaraq hazırlayacaqdır. Sizə isə bu prosesdən zövq almaq qalacaq.
"Ağıllı" tava
Smartypan “ağıllı” tavaları sizə tərəvəz, balıq və ya ət bişirmək üçün hansı temperaturun lazım olduğunu söyləyəcək maddələrin nə vaxt qarışdırılacağını və ya içindəki maddələrin çəkisini də dəqiqliyi ilə qeyd edəcək. Bu tövsiyələr sayəsində yeməkləriniz həmişə mükəmməl hazırlanacaq və ən əsası yanmayacaq.
Ölçmə qaşığı
Bu qaşıq əsasən yeniliyə üstünlük verən insanlar tərəfindən seviləcək, çünki bu cihaz insanlar üçün daha kompakt, daha rahatdır və əlavə cihazların istifadəsinə ehtiyac yoxdur.Onun köməyi ilə istənilən məhsulların çəkisini öyrənmək olar. Bütün məlumatlar ekranda göstərilir. Həmçinin qeyd edək ki, ölçmə qaşığı yalnız yemək hazırlamaq üçün mətbəxdə deyil, həm də maskalar, kosmetik qarışıqlar və müxtəlif dərmanlar hazırlamaq üçün də istifadə edilə bilər.
Yeməkləri yoxlayan “Peres”
İstehsalçılar artıq qidaların yararlı olub-olmadığını göstərən xüsusi bir cihaz icad ediblər. Son illər ərzində icad olunan "Peres" cihazı vasitəsi ilə smartfon və ya tabletdən istifadə edərək yeməyin son istifadə tarixini təyin etmək mümkündür. Cihaz rütubətə, istiliyə və məhsulda ammonyak varlığına cavab verən, həmçinin parçalanma prosesini müşayiət edən dörd sensora malikdir. "Peres"cihazından istifadə etməzdən əvvəl "bluetooth" bağlantısı vasitəsilə bir smartfona qoşulmalı və cihaza işin nəticəsini göstərən xüsusi bir tətbiq qurmalısınız. Sonradan cihazı məhsula doğru yönəldib ,düyməni basmalısınız.
“ Miito” müasir suqızdırıcıdır
Başqa cihazlardan fərqli olaraq, ölçüsü və çəkisi baxımından çox kiçikdir, mətbəxdə qaşıq və ya çəngəldən daha çox yer tutmur. "Miito" su qızdırıcısı adi bir çubuğa bənzəyir, bunun sayəsində o, ya masa üstündə kiçik bir yer tuta bilər və ya əl çantasında sizinlə birlikdə səyahətə çıxa bilər. Hər hansı bir mayeni bir neçə saniyə içində qaynadan bu "ağıllı" cihaz Jasmin Greys və Danimarkanın dizayn studiyası "Niels Tschudi" tərəfindən istehsal olunub.
“Milkmaid” südün keyfiyyətini yoxlayır
"Milkmaid"adlı yeni cihaz vasitəsi ilə südün xarab olub, olmadığını asanlıqla müəyyən edə bilərsiniz. Bu cihazdan istifadə edərkən, telefonunuza quraşdırılmış xüsusi tətbiqdən südün tükəndiyini və ya xarab olmağa başladığına dair bir bildiriş alacaqsınız. Tətbiqdə, həmçinin müxtəlif yeməklərin reseptlərini tapa və ya internetdən istifadə edərək bir məhsul sifariş edə bilərsiniz.
Elektron çəngəl
Artıq çəkidən azad olmaq istəyən insanlar mütləq "HAPIfork" elektron çəngəldən istifadə etməlidirlər. Çünki o, yeməyin miqdarına nəzarət etmənizə kömək etmək üçün hazırlanmışdır. Cihaz hətta nahara nə qədər vaxt ayırdığınızı göstərərək,artıq qida qəbul etməyinizə də mane olur. İstehsalçıların düşüncələrinə görə, çəngəlin bu funksiyaları yemək prosesini daha faydalı edir. Nəticələri görmək üçün telefonunuza xüsusi bir tətbiq yükləməlisiniz və “bluetooth” vasitəsilə cihaza qoşulmalısınız.
“Herb Savor” konteynerə bənzəyir
Yalnız yayda deyil, ilin istənilən vaxtında yeməkləri daha dadlı və təravətli etmək üçün onlara təzə göyərtilər əlavə edirik . Təzə şüyüd və cəfəri saxlamaq üçün müxtəlif faydalı vasitələr işə yaramırsa, onda mütləq "Herb Savor"cihazını almaq barədə düşünün. Bu cihaz, göyərtini daha uzun müddət saxlayan, bir şüşə qaba bənzəyir. Qeyd edək ki, burada orta hesabla üç həftəyə qədər müxtəlif göyərtiləri saxlamaq olar. Göyərtiləri cihazın içinə qoyduqdan öncə onları mütləq yuyaraq qurutmaq lazımdır.
Samirə Tağıyeva, “İki sahil”
