YAP Yasamal rayon təşkilatında Yasamal Rayon İcra Hakimiyyətinin və YAP Yasamal rayon təşkilatının birgə təşkilatçılığı ilə Xocalı soyqırımın 30-cu ildönümünə həsr edilmiş “Faciələrimizdən dərs alaq” mövzusunda tədbir keçirilib.

“İki sahil” xəbər verir ki, tədbirdən öncə Xocalı soyqırımına həsr olunan rəsm sərgisi nümayiş olunub.

İlk öncə Xocalı soyqırımı və Azərbaycan Respublikasının müstəqilliyi və ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

Sonra Xocalı soyqırımı haqqında hazırlanmış qısa videoçarx nümayiş olunub.

Çıxış edən Xocalı şəhid ailələri cəmiyyətinin sədri Mehriban Əliyeva Xocalı soyqırımı haqqında qəhərə boğularaq o günləri xatırlatdı. Mehriban xanım ailəsinə, yaxınlarına qarşı törədilən vəhşiliklərdən danışıb, həmin günlərin xalqımızın qan yaddaşında silinməz izlər qoyduğunu və heç zaman unudulmayacağını bildirib.

Milli Məclisin deputatı, professor Anar İsgəndərov 1992-ci il fevralın 25-dən 26-na keçən gecə baş vermiş Xocalı faciəsinin təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır soyqırımı cinayətlərindən biri olduğunu vurğulayıb. Bu soyqırımın Azərbaycan tarixinin ən dəhşətli və faciəli səhifələrdən biri kimi xalqımızın qan yaddaşına əbədi həkk olunduğunu deyən deputat 44 günlük Vətən müharibəsində Azərbaycan Prezidenti, Ali Baş Komandan İlham Əliyevin qətiyyətli rəhbərliyi ilə müzəffər Ordumuzun Xocalı qurbanlarının qisasını aldığını, onların qanının yerdə qalmadığını diqqətə çatdırıb.

Sonra çıxış edən Respublika Xatirə kitabı redaksiyasının baş redaktoru Nəzakət Məmmədova Azərbaycan Milli Qəhrəmanı Füzuli Salah oğlu Rüstəmovun əziz xatirəsinə həsr edilmiş “İgid Ömrü” kitabının təqdimatı haqqında danışıb. O qeyd edib ki, İnsanlığa qarşı öz vəhşiliyinə və qəddarlığına görə ən dəhşətli kütləvi terror hadisələrindən biri kimi tarixə düşmüş Xocalı soyqırımının törədilməsindən 29 il keçir. Xocalı faciəsi Azərbaycan xalqının heç vaxt unudulmayacaq və ibrət dərsi götürüləcək qan yaddaşıdır.

Daha sonra çıxış edən Xocalı şəhəri 2 saylı tam orta məktəbin direktoru, Xocalının Milli Qəhrəmanı Füzuli Rüstəmovun bacısı, Fiqurə Rüstəmova söyləyib ki, Xocalı qurbanlarının xatirəsini yad etmək, böyüməkdə olan nəslə XX əsrin ən dəhşətli hadisələrindən olan Xocalı soyqırımı haqqında ətraflı məlumat vermək, məktəblilərdə düşmənə qarşı barışmazlıq hissi, Vətənə, doğma torpağa sədaqət və məhəbbət duyğularını gücləndirmək, ən əsası tariximizi unutmamaq üçün əhəmiyyətlidir.

Daha sonra tədbirin bədii hissəsi başlayıb. Respublika İncəsənət Gimnaziyasının şagirdləri Xocalı soyqırımı faciəsinə həsr etdikləri kompozisiyanı təqdim ediblər.

Sonda xatirə şəkli çəkilib.