Hindistan vətəndaşı Dxaniya Ravi adlı qız 27 il müddətində 300 sümük sınığından əziyyət çəkib və  vaxtının çoxunu yataqda keçirir. Dxaniya çox nadir rast gəlinən irsi xəstəlikdən əziyyət çəkir. Onun sümük toxumaları həddindən artıq nazikdir və hər hansısa bir narahat hərəkət sınıq ilə nəticələnə bilər.

Bu nadir rast gəlinən xəstəlikdən əziyyət çəkən insanların sümük toxumalarında yetərincə kollagen zülalının olmaması sümüklərin çox zəif olmasına səbəb olur və bu da insanın həyatına maneə törədir.

Dxaniya bəstəboy olduğuna görə hamı ona uşaq kimi baxır. Lakin onun artıq 27 yaşı var. Bu cür diaqnoz  Dxaniya iki aylıq olan zaman qoyulub. Uşaq yaşlarından  balaca qız hər ay bir neçə sınıq xəsarətləri alırdı və o,  bununla  mübarizə apara bilmirdi. Dxaniyanı ən çox üzən onun bu xəstəliyinin anasını çox kədərləndirməsidir.

Baxmayaraq ki, sümük sınığı çox ağrı verir, qəhrəmanımız artıq buna öyrəşdiyini bildirib. Bu cür xoşagəlməz ağrılar onun həyatının ayrılmaz hissəsi olub.

Artıq bir neçə ildir ki, bu qız əlil arabasında gəzir.  Dxaniyanın uşaqlığı əyləncəsiz və dostlarsız keçib. O, heç vaxt hərəkətli oyunları oynaya bilməyib və  vaxtının çoxunu qardaşı ilə bir yerdə keçirib.

Dxaniyanı məktəbə qəbul etməyiblər və onun təhsilini evdə təşkil ediblər. Ətrafındakı qohumlarının onu dəstəkləməsinə baxmayaraq, Dxaniya özünü çox tənha hiss edir. O, ətrafındaki insanların ona yad planetdən gəlmiş birinə bənzəyən kimi baxmaqlarına görə çox narahat olur. Lakin bütün bunlara baxmayaraq o, çox mehriban, gülərüz və mərhəmətlidir.

Belə ki, 19 yaşlı yerlisinin təcili əməliyyət olunması üçün lazımi məbləği toplamaq üçün Dxaniya onun haqqında məlumat yaymağa başlayır və tez bir zamanda əməliyyat həyata keçirilir. Bu gün Dxaniya fəal şəkildə xeyirxahlıq işləri ilə məşğul olaraq bir çox insanlara kömək edir.

Könül Əliyeva, “İki sahil”