14 may 2022 11:47
229

Vidadi İsayev Mirzəcəfərlidə səyyar qəbul keçirib

Qəbulda rayon İcra Hakimiyyətinin,  hüquq-mühafizə orqanlarının, təhsil, səhiyyə, mədəniyyət, xidmət təşkilatlarının rəhbərləri və kənd sakinləri iştirak etmişlər.
“İki sahil” xəbər verir ki, Rayon İcra Hakimiyyətinin başçısı Vidadi İsayev çıxış  edərək respublikamızda gedən sosial-iqtisadi inkişafın xalqımızın  rifah halının yaxşılaşmasına təsirindən,  ölkəmizin ərazi bütövlüyünün təminindən, işğaldan azad olunmuş ərazilərdə həyata keçirilən sosial-iqtisadi layihələrdən, həmçinin rayonumuzda, o cümlədən Mirzəcəfərli kənd inzibati ərazi dairəsinin əhatə etdiyi kəndlərdə, o cümlədən Mirzəcəfərli kəndində görülən işlərdən, sakinlərinin məşğuliyyətindən, kənddə mövcud olan sosial obyektlərin vəziyyətindən danışmış, bütün rayon sakinləri adından ölkə Prezidentinə dərin minnətdarlığını bildirmişdir.  Bərdənin sosial-iqtisadi inkişafı, əhalini narahat edən problemlərin həlli istiqamətində həyata keçirilən tədbirlərdən danışmış, əhalinin rahat yaşaması üçün həyata keçirilən tədbirlər barədə məlumat vermişdir.
Son illər Mirzəcəfərli kənd inzibati ərazi dairəsinin əhatə etdiyi Mirzəcəfərli, Qarağacı və Mollagüllər kəndləri qazlaşdırılıb, kəndlərin 20 km daxili yolları, Mirzəcəfərli-Qarağacı-Mollagüllər kəndlərarası 6 km yol qum-çınqılla əsaslı təmir edilib,  Qarağacı və Molagüllər kəndlərinin bir hissəsinin içməli su şəbəkəsi tikilib, Mollagüllər qəbirstanlığı abadlaşdırılıb, Mirzəcəfərli kənd Elektron ATS-nə optik kabel çəkilərək inzibati ərazi dairəsinin hər 3 kəndinə internet verilmiş, ərazidə 10 km açıq dren kanallar lildən təmizlənib, 4 km beton kanal tikilmiş,  mövcud xidmət obyektləri müasir memarlıq üslubunda yenidən qurulmuş, 30 fərdi yaşayış evi tikilib, Qarağacı və Mollagüllər kənd məktəbləri, Qarağacı kənd körpələr evi-uşaq bağçası cari təmir edilib, kəndlərin təsərrüfat arxlarının lildən təmizlənməsi, ərazilərin yaşıllaşdırılması üçün ardıcıl tədbirlər görülmüş, yaşayış məntəqələri daima məişət tullantılarından təmizlənir, kəndlərin elektrik şəbəkəsinin yenidən qurulması və elektrik xətlərinin kabelləşdirilməsi işi davam etdirilir, hazırda 8 km uzunluqda Mirzəcəfərli-Qarağacı-Mollagüllər kəndlərarası yolu yenidən qurulur və asfaltlaşdırılır.
2021-ci ildə ərazidə 197 hektar sahədə pambıq əkilmiş, hər hektardan 25 sentner olmaqla 492,5 ton məhsul istehsal edilmiş, 24 qutu barama bəslənmiş, hər qutudan orta hesabla 36 kq olmaqla 864 kq barama istehsal edilmişdir. 2022-ci ildə ərazidə 142 hektar sahədə pambıq əkilməsi üçün fermerlərlə müqavilə bağlanmış və artıq səpin başa çatdırılmış, hazırda 20 qutu barama bəslənir.
Sonra vətəndaşların müraciətləri dinlənilmişdir. Mollagüllər kənd sakini Əhməd Cəbrayılov evinə gələn qaz xəttindəki sızmanın qarşısının alınması, Qarağacı kənd sakinləri Kəmalə Ağayeva növbədə olduğu özünəməşğulluq proqramı əsasında mal-qara verilməsinin sürətləndirilməsi, Gövhər Muradova yeni tikilən Mirzəcəfərli-Qarağacı-Mollagüllər kəndlərarası yolun tikintisi ilə bağlı yolun kənarındakı suvarma arxının 2 km hissəsinin betonla tikilməsi, Kifayət Hüseynova kənd məktəbində işlə təmin, Nazim Nəbiyev həyətyanı torpaqların suvarılma suyunun ərazidə olan arxa axıdılması  üçün boru xəttinin yeni tikilən kəndlərarası yoldan keçən 10 metr hissəsində keçid tikilməsi, Mollagüllər kənd sakinləri Mahmud Mahmudov icarəsinə 1,5 hektar bələdiyyə mülkiyyətində olan torpaq sahəsi verilməsi, Cəvahir Göyüşov birinci Qarabağ müharibəsi şəhidi əmisi Göyüşov Natiq Əbülfət oğlunun adının əbədiləşdirilməsi üçün portretinin qoyulması, Qarağacı kənd sakini Əfsun Vəliyev sahibkarlıqla məşğulluq üçün torpaq ayrılması barədə müraciət etmişlər.
Qaldırılan məsələlər barədə aidiyyəti qurumlara müvafiq tapşırıqlar verilmiş vətəndaşlara hüquqi yardım göstərilmişdir. Kənd sakinləri kənddə aparılan tikinti-abadlıq işlərinə, pambıqçığıın, baramaçılığın inkişafına göstərilən diqqət və qayğıya görə respublika Prezidentinə minnətdarlıqlarını bildirmişlər.
Səyyar qəbuldan sonra rayon İcra Hakimiyyətinin başçısı və rayonun hüquq-mühafizə orqanlarının, qəbulda iştirak edən xidmət təşkilatlarının rəhbərləri şəhid ailələri, Vətən müharibəsi əlilləri və iştirakçıları ilə söhbət etmiş, Mirzəcəfərli kənd sakini, hərbi əlil Səlimov Arzu Rəhim oğlunun ailəsini ziyarət etmişlər.