Cənub mirvarisi Lənkəranda Azərbaycan Respublikası Gənclər və İdman Nazirliyinin, Azərbaycan Respublikası Təhsil Nazirliyinin, Azərbaycan İdman Könüllüləri ictimai birliyinin birgə təsdiq etdiyi əsasnaməyə uyğun olaraq yeniyetmə və gənclər arasında sağlam həyat tərzinin, idmanın təbliğ edilməsi, qalib idmançıları cəmiyyətdə tanıtmaq məqsədi daşıyan “Çempionumuz” sosial idman layihəsi çərçivəsində tədbirlər davam edir.
Növbəti belə bir tədbir Lənkəran şəhər 8 saylı tam orta məktəbdə baş tutdu. Şagirdlərin görüşünə gələn qonaqlar isə taekvando idman növü üzrə yeniyetmələr və gənclər arasında Respublika çempionu, beynəlxalq yarışın qalibi, yeniyetmələr və gənclər arasında Avropa birinciliyinin iştirakçısı, yeniyetmələr arasında dünya üçüncüsü, taekvando idman növü üzrə milli komandanın kapitanı Nizami Hacıyev, taekvando idman növü üzrə yeniyetmələr və gənclər arasında Respublika çempionu və beynəlxalq yarışın qalibi, yeniyetmələr və gənclər arasında Avropa birinciliyinin, eləcə yeniyetmələr arasında Dünya birinciliyinin iştirakçısı, taekvando idman növü üzrə milli komandanın üzvü Fərid Əliyev idi. 90 nəfərin iştirak etdiyi tədbir öz maraq dairəsinə görə yaddaşlara yazıldı.
Məktəbin direktoru İlqar Paşayev tədbirin açılışında dövlətin idmana olan diqqət və qayğıya, insan həyatında idmanın əhəmiyyətinə geniş toxundu, sağlam həyat tərzinin təbliğinə həsr olunan belə maarifləndirici tədbirdən şagirdləri faydalanmağa çağırdı. Daha sonra Lənkəran Gənclər və İdman İdarəsinin əməkdaşları Sadiq Həmidov, Yusif Xamiyev çıxış etdilər. Onlar tədbirin keçirilmə məqsədindən, layihənin əhəmiyyətindən, idmanla məşğul olmağın faydasından ətraflı danışdılar, şagirdlərə zərərli vərdişlərdən uzaq durmağı, idmanla məşğul olmağa, sağlam həyat tərzi keçirməyi məsləhət bildilər . Söz idmançılara da verildi. Nizami Hacıyev və Fərid Əliyev, eləcə taekvando idman növü üzrə məşqçi-müəllim Əfqan Rzayev tədbir iştirakçılarına öz həyatlardan, idmanla məşğul olaraq əldə etdiyi yüksək nəticələrdən söhbət aşdılar , sağlam həyat tərzi naminə hamını idmanla yaşamağa çağırdılar.
Çıxışlardan sonra idmana aid video çarx nümayiş olundu. Qonaq idmançılar şagirdləri düşündürən suallara da həvəslə cavab verdilər. İdmançılarla çəkilən xatirə şəklilər lap yerinə düşdü.
Zəfər Orucoğlu,
Azərbaycan Jurnalistlər Birliyinin üzvü