Qrant mənimsəmə “aksiyası”
Azərbaycanın İkinci Qarabağ müharibəsində qazandığı tarixi Qələbənin, işğaldan azad edilmiş ərazilərdə aparılan bərpa-quruculuq işlərinin sürətlə davam etdiyi bir məqamda gözlərinin qarşısındakı reallıqları görmək istəməyən erməni xislətli «Milli Şura» antimillilərinin, AXCP sədri Əli Kərimlinin kurasiyasında olan «beşinci kolon»un xəyanətkarlarının qrant xəstəlikləri yenidən baş qaldırır. Ölkə daxilində agentura şəbəkəsi olan, əmrlərinə tabe olduqları xarici ağalarının mənafelərini təmin edən, birbaşa və ya dolayısı ilə beynəlxalq təşkilatlar üçün işləyən və niyyətləri qərəzli, milli maraqlarımıza müxtəlif üsullar və metodlarla ziyan vurmaq olan agent şəbəkəsinin xəyanətləri üçün «münbit şərait» Azərbaycanın beynəlxalq tədbirlərə hazırlaşdıqları məqamlardır.
Bəllidir ki, Azərbaycan Formula 1beynəlxalq yarış ərəfəsindədir. Həmişə olduğu kimi, Azərbaycan haqqında mənfi imic formalaşdırmaq, aldıqları sifarişlər və ayrılan qrantlar hesabına ölkədə qarışıqlıq yaratmaq istəyən radikal qüvvələr yenə də çirkin niyyətlərini həyata keçirməyə çalışırlar. İnsan azadlıqlarının və hüquqlarının müdafiəsi bəhanəsi ilə maraqlarına uyğun siyasi və iqtisadi səmərə əldə etmək üçün bu və ya digər dövləti güzəştlərə məcbur etmək üçün əliaçıqlıq edərək həmin ölkələrdəki agentura şəbəkəsinə qrantlar paylayan Qərbin geosiyasi maraqlarını həyata keçirən «Milli Şura»nın antimilli ünsürləri çirkin məqsədlərini həyata keçirmək üçün qeyri- hökumət təşkilatlarını da «beşinci kolon»a cəlb edir.
Azərbaycanda «beşinci kolon»un yaradılması üzrə müxtəlif QHT-lərin fəaliyyətinin maliyyələşdirən ABŞ Dövlət Departamenti USAİD (ABŞ Beynəlxalq İnkişaf Agentliyi) üçün pul ayırır. USAİD də öz növbəsində «rəngli inqilablar»ın «mühəndisi» rolunda çıxış edən NED (Milli Demokratiya Fondu), İRİ (Beynəlxalq Respublika İnstitutu) və NDİ (Milli Demokratiya İnstitutu) kimi təşkilatçılarını maliyyələşdirir. Bundan əlavə, USAİD yerli QHT-lərə və xarici təşkilatların Azərbaycandakı digər nümayəndəliklərinə də «əl tutur.» Vətəndaş cəmiyyəti ilə bağlı istəklərini «yumşaq güc»” sxemi üzrə, özlərinə məxsus «kodlaşdırılmış dildə» həyata keçirən Qərb institutları özlərinin pullu nökərlərini qrantları ilə şirnikləndirirlər. Vicdanlarını dollarlara dəyişən ünsürlər isə pozucu hərəkətlərini bu cür maliyyələr hesabına həyata keçirməyə çalışırlar. İnsanların onlara qarşı nifrətindən radikallaşan, təhrikçilərin və intriqabazların, hərc-mərclik və dağıdıcılıq ehtirası ilə yaşayanların yuvasına çevrilən Azərbaycan Xalq Cəbhəsi Partiyası (AXCP) ölkəmizə qarşı yönələn «qara piar» kampaniyasının önündə gedənlərdir. Qərbin qərəzli təşkilatlarının əlində vasitəyə çevrilən, sivilizasiya və demokratik qaydalar haqqında elementar təsəvvürü olmayan AXCP sədri Əli Kərimlini və onun agent şəbəkəsini düşərgədə «qrantyeyənlər dəstəsi» adlandırırlar. AXCP daxilində daim müşahidə olunan parçalanmaların, istefaların əsas səbəbi partiyada yaranan hərc-mərclik, sədr Əli Kərimlinin ayrılmış qrantları fərdi qaydada mənimsəməsi, partiyalararası münaqişələrin təşkilində katalizator rolunu oynamasıdır. Bu baxımdan AXCP, «Milli Şura» kimi «beşinci kolon» da sosial bazadan məhrum olub.
Bu günlərdə paytaxtımızın Fəvvarələr meydanında aksiya təşkil etməklə, dövlətçilik əleyhinə əsassız şüarlar səsləndirməklə nəyəsə nail olmağa çalışanlar yenə də istəklərinə nail ola bilmədilər. Düşərgədə aqressiv, korrupsionerlər kimi tanınan və çıxdaş siyasətçi adlandırılan Əli Kərimli və Cəmil Həsənli kimi xəyanətkarlar özlərini cəmiyyətin təmsilçiləri hesab etsələr də həmişə ictimai qınağa məruz qalan, özlərinin neqativ əməllərini ört-basdır etməyə çalışan milli xəyanətkarlardır.
Azərbaycanın uğurlarına, ölkəmizin dünyada möhkəmlənən nüfuzuna, Avropa üçün əhəmiyyətinə kölgə salmağa çalışan bu radikalların daimi iş prinsipləri biri-birilərinə qarşılıqlı nifrət, söyüş və iyrənc təhqirlər yağdırmaq və bütün bunların hesabına aldıqları qrantların sayını artırmaqdır.
Korporativ maraqlarını dövlət mənafeyindən üstün tutan, daim qisasçılıq duyğuları ilə yaşayan Əli Kərimlinin konstruktiv dialoqdan və siyasi mübarizənin sivil metodlarından yayınması da onun və təhrikçi dəstəsinin çirkin niyyətlərindən, xəyanətlərindən qaynaqlanır. Bu radikallar cəmiyyətə faydalı ideyalar və real proqramlar təklif etmək, vətəndaşların etimadını qazanmaq iqtidarında olmadıqlarına görə ölkədən kənarda formalaşdırdıqları dəstələri belə hakimiyyətə qarşı ambisiyalarını təmin etmək naminə xəyanətlərinə cəlb edirlər.
«Nə qədər pis olsa, bizim üçün bir o qədər yaxşıdır”» prinsipi ilə ölkəmizdə siyasi sabitliyin pozulmasına cəhd göstərən radikallar bütün Azərbaycan xalqı tərəfindən dəstəklənən iqtidarın siyasətini hər vasitə ilə hörmətdən salmağa çalışsalar da cılız resursları ilə istəklərinə nail ola bilməyəcəklərini də aydın başa düşürlər. Bu baxımdan istər paytaxtın mərkəzində, istərsə də başqa ərazilərdə nə qədər mitinq, aksiya təşkil etsələr də, əvvəlcədən araqarışdıran pullu dəstələr formalaşdırsalar da, qazanılmış uğurlara və müsbət dəyişikliklərə qara yaxmağa çalışsalar da niyyətlərinə çata bilməyəcəklər. Çünki bütün Azərbaycan xalqı işğaldan azad edilmiş ərazilərimizdə aparılan bərpa-quruculq işlərində çalışmaq həvəsindədir. Ölkəmizdə keçirilən, milli birlik və həmrəyliyimizin nümunəsi olan «Xarıbülbül» festivalı kimi tədbirlərin sevincini yaşayan insanlar Əli Kərimli kimilərin şousunun çirkin məqsədini bildikləri üçün milli xəyanətkarlara birdəfəlik «yox» deyiblər. Buna görə də pullu mitinq iştirakçılarının canfəşanlığı yalnız «Milli Şura»da, AXCP-də, Əli Kərimlinin əhatəsində qəbulediləndir.
Xuraman İsmayılqızı, «İki sahil»