Münaqişədən sonra Azərbaycanın qarşısında bir sıra məsələlər durur.

“İki sahil” xəbər verir ki, bunu Beynəlxalq Münasibətlərin Təhlili Mərkəzinin (BMTM) sədri Fərid Şəfiyev jurnalistlərə bildirib.

Onun sözlərinə görə, Azərbaycan Vətən Müharibəsində qazandığı qələbəyə görə paradiqmanı dəyişdirə bilib.

“Artıq Ermənistanın Baş naziri soruşur ki, Azərbaycan Ermənistanın ərazi bütövlüyünü tanıyırmı? Bu illər ərzində bizim torpaqlarımız işğal altında idi. Bizim üçün əsas məsələ Azərbaycanın ərazi bütövlüyünün təmin olunması, işğal olunmuş ərazilərimiz azad olunması idi. Artıq biz bu paradiqmanı dəyişdirmişik. Biz post-münaqişə dövründə görürük ki, ABŞ və Fransa proseslə fəal şəkildə məşğul olmağa çalışır. Biz Ermənistanla olan prosesi daha çox Avropa İttifaqı platforması çərçivəsində davam etdirməyə çalışırıq, ancaq Azərbaycan digər ölkələrlə də müzakirələrə hazırdır. Əgər hər hansı ölkə prosesə töhfə vermək istəyirsə, biz bunu alqışlayırıq. Azərbaycanın isə proseslə bağlı mövqeyi bəllidir: biz beş bəndlik prinsipləri fevral ayında açıqlamışıq, bu, Ermənistan tərəfinə təqdim olunub. Lakin təəssüflər olsun ki, Ermənistan tərəfi bu məsələni təxirə salır və biz bu fonda hətta təxribatları da görürük. Sonuncu təxribat sentyabr ayında oldu və təəssüf biz yenə şəhid verdik. Cəmiyyətdə sonuncu təxribatlarla bağlı bir sıra suallar var. Biz bunu müzakirə etdik. Bizim baxışımız odur ki, Azərbaycan münaqişəni həll edib, biz post-münaqişə dövrünə qədəm qoymuşuq. Lakin bu o demək deyil ki, post-münaqişə dövründə hər hansı itki və ya problem olmayacaq”, - Fərid Şəfiyev qeyd edib.

O vurğulayıb ki, Ermənistanın daxilində və xaricində onun bəzi havadarları Azərbaycana qarşı təxribatlar törətməyə çağırışlar edirlər, silahlanmanı, hücumu təşviq edirlər: “Biz buna hazır olmalıyıq. Ümumiyyətlə regionumuzda – İranda və Rusiyada mürəkkəb proseslər gedir. Azərbaycanın təhlükəsizliyi həmişə prioritetdir və hökumət də bununla bağlı müvafiq addımlar atır. Bizim müdafiə sistemimiz güclü olmalıdır. Təbii ki hamımız ümidliyik ki, daha şəhid verməyəcəyik, itkimiz olmayacaq. Ancaq bu cür şəraitdə belə bir qonşu ilə çətindir. Onun daxilində bir çox revanşist, irqçi qüvvələr var və buna görə də biz hər şeyə hazır olmalıyıq”.