"Naxçıvanın keçmişdə olan ipəkçilik şöhrətini özünə qaytaracağıq".

“İki sahil” xəbər verir ki, bunu Naxçıvan televiziyasına müsahibəsində Türkiyə Naxçıvandakı baş konsulu Asip Kaya deyib.

"Bu gün Naxçıvanda baramaçılığı və ipəkçiliyi inkişaf etdirmək üçün tut tingləri əkdik. Bu layihənin hazırlanmasında əməyi keçən hər kəsə təşəkkür edirəm. Bildiyiniz kimi Türkiyə, əsasən də Bursa bölgəsində baramaçılığın inkişafı əhəmiyyətli dərəcədə yüksəlib. Bu sahədəki təcrübəmizi Naxçıvanla paylaşırıq", - baş konsul bildirib.

Asip Kaya deyib ki, bundan sonra Naxçıvanda yeni bağlar salınacaq.

Qeyd edək ki, martın 29-da Naxçıvan Muxtar Respublikası Kənd Təsərrüfatı Nazirliyi ilə Türkiyə Kənd Təsərrüfatı və Meşə Nazirliyinin əməkdaşlığı çərçivəsində Ordubad rayonunun Əylis Düzü adlanan ərazisində Ümummilli Lider Heydər Əliyevin 100 illiyi münasibətilə “Azərbaycan – Türkiyə ipək bağı” salınıb. Əylis Düzündə 1,2 hektar ərazidə yeni salınan bağda Türkiyədən gətirilmiş 600-dən çox tut tingi əkilib.