Məktəblilər arasında «Heydər Əliyev və Azərbaycan tarixi» mövzusunda keçirilən müsabiqənin qalibi Dilşad Məmmədəliyeva arzularını «İki sahil» qəzetinin oxucuları ilə bölüşür
Məəktəblilər arasında əlamətdar günlər, hadisələrlə bağlı müsabiqələrdə iştirak etmək hər bir şagirdin arzusudur. Görkəmli dövlət xadimi, xalqımızın Ümummilli Lideri Heydər Əliyevin anadan olmasının 100 illik yubileyi münasibətilə Binəqədi rayon məktəbliləri arasında keçirilən müsabiqədə iştirak etmək istəyənlərin say çoxluğu təsadüfi hadisə deyildi. Hələ ibtidai siniflərdə müəllimlər kiçik həcmli yazılarla bildirirdilər ki, gənclərin və yeniyetmələrin təhsili ilə daim maraqlanan Ulu Öndərin həyatı və siyasi fəaliyyəti hər bir vətəndaş üçün örnəkdir. «Əvvəllər müəllimlərimizdən eşitdiyimiz vətəndaşlıq borcu sözünün mahiyyətini o qədər dərk etməsək də sonrakı illərdə bu müdrik insan haqqında eşitdiklərimizdən öyrəndik ki, əsl vətəndaş sözü müdrik insan Heydər Əliyevin simasında əbədiləşib» sözləri ilə müsabiqədə iştirakını Ulu Öndərə hörmət və ehtiramı kimi dəyərləndirən, müsabiqədə «Şuşa Əməliyyatı – musiqi beşiyinin azad olunması» başlıqlı yazısı ilə fərqlənən, mükafatla təltif olunan Binəqədi rayonu Rüstəm Əliyev adına 3 nömrəli məktəbin 10-cu sinif şagirdi Məmmədəliyeva Dilşad Rövşən qızı “İki sahil”ə açıqlamasında bu müsabiqənin keçirilməsində əməyi olan hər kəsə təşəkkür etdi:
-Müsabiqəyə hazırlıq ərəfəsində bu dahi insan haqqında yazılan kitablara müraciət etdim. Ulu Öndər haqqında dərc olunan yazıları oxudum. Onda bildim ki, qüdrətli dövlətin varlığını qorumaq üçün ilk növbədə Heydər Əliyev kimi Vətəninə bağlı olmalısan. Ayaq basdığın, böyüyüb boya-başa çatdığın torpağı, yurdunu, insanları sevməlisən. Daim yenilik həvəsi ilə yaşayıb yaratmalı, təcrübə toplamalısan. Ulu Öndərin həyatı ilə bağlı yazılanları oxuduqca gördüm ki, gələcək həyatını xalqımızın tarixinin öyrənilməsi yolunda sınayan Ulu Öndərin tarixçi olmaq həvəsi bu dahi şəxsiyyətin vətəndaşlıq duyğularından qaynaqlanır.
Dilşad onu da bildirdi ki, bu günədək Ulu Öndərlə bağlı öyrəndiklərimdən məndə yaranan təəssürat budur ki, respublikamıza rəhbərliyi illərində Azərbaycan naminə gördüyü işlər mənim kimi məktəblilərin, gənclərin, bütünlükdə Azərbaycanın qüdrətlənməsi, xalqımızın firavanlığı naminə göstərilən xidmətlərdir:
- Ulu Öndərin hər anı Vətənə, xalqa xidmətlə dolu həyatı boyu Azərbaycan üçün göstərdiyi fədakarlıqların təkcə ensiklopedik sıralaması, xronologiyası bir insan həyatına sığmayacaq qədər mənalı və dəyərlidir. Onun dövlətçilik təcrübəsi özündən sonrakı illər üçün bələdçi olub. Biz məktəblilər bu yolla irəlilədikdə xüsusilə müstəqillik illərində müasir Azərbaycan tarixinin müəllifi olan müdrik şəxsiyyətin həyatını, siyasi fəaliyyətini öyrənir, gələcəkdə onun irsinə daha dərindən bələd olmaq, xalqımıza layiq vətəndaş kimi yetişmək üçün çox oxumalı, həyat yolumuzu seçərkən onun vətəndaşlıq təcrübəsindən çox faydalanmalıyıq.
Dünyanın dövlətçilik tarixində şöhrət qazanan həmkarlarının Ulu Öndərlə bağlı dedikləri qiymətli sözlərdə Azərbaycan xalqının çoxəsrlik tarixinin əks olunduğunu söyləyən Dilşad bildirdi ki, müasirləri arasında Lider kimi tanınması dahi rəhbərin xalqına bağlılıq məsuliyyətindən qaynaqlanan vətəndaşlıq borcuna sadiqliyidir. Paytaxt məktəbliləri arasında elmə, maarifə çağırış olan «Heydər Əliyev və Azərbaycan tarixi» mövzusunda referat müsabiqəsinin keçirilməsi Ulu Öndərin siyasi irsinin gənclər arasında təbliğidir.
- Bu sahədə məktəbimizin direktoru, Əməkdar müəllim Almaz Həsrətə və sinif rəhbərim Səbinə İmanovaya xüsusi minnətdarlığımı bildirmək istəyirəm. Onlar bizim layiqli vətəndaş kimi yetişməyimiz üçün əllərindən gələni əsirgəmirlər. Yeri gəlmişkən qeyd edim ki, bu müsabiqə dahi şəxsiyyətin həyat yolunu aydınlaşdıran parlaq bir işıq idi. Bu işığın izi ilə axtarış aparan biz məktəblilər belə mötəbər müsabiqədə iştirak etmək imkanı qazandığımıza görə ilk növbədə məktəbimizin direktoruna və müəllimlərimizə minnətdarıq. Bu müsabiqə qazandığım mükafat məsuliyyətimi daha da artırdı. Artıq gələcək həyat yolumu da müəyyənləşdirmişəm. Hansı sahədə çalışmağımdan asılı olmayaraq Ulu Öndərin irsinə sadiqlik, Vətənə layiq övlad kimi etimadı doğrultmaq hədəfimdir.
Bu cür müsabiqlərin təşkilini şagirdlərin bilik və bacarıqlarını artırılması yolunda sınamış təcrübə kimi dəyərləndirən Dilşad bildirdi ki, şagirdlərdə müstəqil araşdırma aparmaq, sərbəst düşüncə vərdişləri formalaşdırmaq baxımından önəmlidir.
Bir mühüm məqamı da qeyd etməliyik ki, tarixən hər bir xalq özünün xoşbəxt gələcəyə olan ümidlərini ilk növbədə gənc nəslə bağlayır. Savadlı, geniş dünyagörüşünə malik gənclərin yetişdirilməsi hər bir ölkə üçün çox önəmli məsələdir. Ölkənin gələcəyinin asılı olduğu hər bir gənc dövlətin daha da güclənməsinə öz töhfəsini verməlidir. Nəsillər dəyişir, ölkələr inkişaf edir, ancaq ənənələr, milli dəyərlər dəyişməz qalır və insanlıq var olduqca yaşayır. Gənc nəslin vətənpərvərlik, Vətənə sevgi ruhunda tərbiyə olunması dövlərin gələcəyi üçün vacibdir. Bu gün iftixarla demək olar ki, müasir Azərbaycan gəncliyi milli-mənəvi dəyərləri, doğma ana dilini, ata-babalardan qalan adət-ənənələrimizi göz bəbəyi kimi qoruyur və yaşadır. Sirr deyil ki, ölkəmizdə uğurlu dövlət gənclər siyasətinin əsası xalqımızın Ümummilli Lideri Heydər Əliyev tərəfindən qoyulub. Ulu Öndər hər zaman gənclərə xüsusi qayğı ilə yanaşmış, onların problemləri hər an dahi rəhbərin diqqət mərkəzində olmuş, yüksək intellektual səviyyəyə, müasir dünyagörüşünə malik gənc nəslin yetişməsinə olduqca böyük əhəmiyyət vermişdir. Təqdirəlayiq haldır ki, Ümummilli Liderin əsasını qoyduğu gənclər siyasətini uğurla davam etdirən Prezident İlham Əliyev dövlət başçısı kimi fəaliyyətinin ilk dövrlərindən başlayaraq gənclərə xüsusi diqqət göstərir. Gənc istedadların aşkar edilməsi, onların potensial imkanlarının inkişaf etdirilməsi və yüksək səviyyəli təhsil almaları üçün əlverişli şəraitin yaradılması da gənclər siyasətinin prioritet istiqamətlərindən biridir.
Dilşad Məmmədəliyeva bununla bağlı fikirlərini bildirdi:
- Azərbaycanın tarixinə həkk olunan şanlı Zəfərdən, mədəniyyətimizin beşiyi, Zəfərimizin tacı olan Şuşadan yazmaq bir şagird kimi məni çox qürurlandırıb. Ömürlük yaddaşımıza həkk olunan «Əziz Şuşa, sən azadsan ! Əziz Şuşa, biz qayıtmışıq ! Əziz Şuşa, biz səni dirçəldəcəyik! Şuşa bizimdir ! Qarabağ bizimdir! Qarabağ Azərbaycandır !!!» sözləri qələbə müjdəsi oldu. Xalqımızın Qarabağ, Şuşa həsrəti bitdi. Artıq Vətən bağı al-əlvandır, var içində xarı bülbül! Biz şagirdlər hər zaman təhsilimiz, təlim-tərbiyəmizlə, seçəcəyimiz peşə ilə Vətənə, dövlətə, xalqa layiqli vətəndaş olacağıq. Bu çağırışı gələcəkdə bir vətəndaş kimi doğrultmaqla Ulu Öndərə layiq vətəndaşlıq borcumuzu yerinə yetirəcəyimizə əminik.
Yeganə Əliyeva, “İki sahil”
