2020-ci il 10 noyabr Bəyannaməsinin 4-cü bəndinə müvafiq olaraq erməni hərbi birləşmələri ölkəmizin ərazilərini tərk etməli olduqları halda üzərindən 3 il keçməsinə baxmayaraq hələ də Azərbaycanın Qarabağ inzibati ərazi vahidində öz mövcudluqlarını saxlamaqdadırlar. Qanunsuz fəaliyyət göstərməklə yanaşı, Azərbaycanın həm mülki, hərbi vətəndaşlarına, mülki və digər obyektlərinə qarşı təxribat və hətta terror aktları həyata keçirməkdədirlər.  Bu, terror aktları son dönəmlərdə xüsusilə aktivləşdirilib. Bu gecə həm mülki vətəndaşlarımız, həm də Daxili İşlər Nazirliyinin əməkdaşlarının terror qurbanı oldular. Bunun müqabilində Azərbaycan təbii olaraq öz ərazisində konstitusiya quruluşunu bərpa etmək və terrorçulara qarşı antiterror tədbirləri həyata keçirmək hüququnu əsas tutaraq  həmin ərazilərdə antiterror tədbirlərinə başlayıb.

Bu fikirləri “İki sahil”ə açıqlamasında Azərbaycan Milli İstiqlal Partiyasının sədri Arzuxan Əlizadə bildirib. 

Onun sözlərinə görə bu prosesdə təbii ki, hər bir vətəndaş dövlətimizin və ordumuzun yanında olmalıdır. 2020-ci ilin 27 sentyabrında başlannan Vətən müharibəsi zamanı Azərbaycan fəaliyyət göstərən siyasi partiyaların mütləq əksəriyyəti Ali Baş Komandanın, Ordumuzun, əsgərimizin yanında olduğunu bəyan etdilər. İndi də ordumuz antiterror tədbirləri həyata keçirir və ölkədə fəaliyyət göstərən 23 siyasi  partiya birgə bəyanat qəbul edib və  Azərbaycan Ordusunun, dövlətinin və əsgərinin yanında  olduğunu bir daha  bəyan edib.

Arzuxan Əlizadə AXCP, Müsavat Partiyası və REAL Partiyasının həmin bəyanatı imzalamaması ilə bağlı bildirib ki, təəssüflər olsun ki, o zaman olduğu kimi, indi də bəzi siyasi təşkilatlar bu prosesə qoşulmadılar: "Bu dəfə də biz 3 siyasi partiyanın ümumi  prosesə qoşulmamasının və bəzilərinin sonradan hansısa mövqe ilə çıxış etdiyinin şahidi olduq. Buna yalnız təəssüflənmək olar. Hesab edirəm ki, Vətənin  belə  günündə  bütün siyasi, şəxsi və digər partiya  maraqları arxa plana keçməlidir.  Dövlət və milli maraqlar  olan  yerdə heç bir  digər maraqlardan söhbət  gedə bilməz. Hansısa bir cümləyə, sözə istinad edərək, bəhanə gətirməklə  ümumi prosesə qoşulmamaq təbii ki, heç bir siyasi  təşkilata başucalığı gətirmir. Azərbaycanın ərazi  bütövlüyü, ölkəmizin ərazisində olan terrorçuların  zərərsiləşdirilməsi prosesinə dəstək verilməsinə qoşulmamaq heç bir ictimai-siyasi şəxsə və siyasi  təşkilata, partiyaya başucalığı  gətirə bilməz. Burada məsələ dövlət və milli maraqlardır. Dövlət və milli  maraqlar olan yerdə digər bütün məsələlər arxa plana keçməlidir və hər kəs bir nəfər kimi  dövlətin, ordunun, əsgərin yanında olmalıdır."

Arzuxan Əlizadə qeyd edib ki, Milli İstiqlal Partiyası olaraq da biz  hər  zaman bu mövqedən çıxış  etmişik, bu gün  də o mövqedəyik: "Bəyanatı imzalamaqla bir daha bundan  sonrakı proseslərdə dövlətimizin, ordumuzun, əsgərimizin yanında olacağımızı bəyan etmişik  və əlimizdən gələn istənilən dəstəyi  də bundan sonra da verməyə hazırıq."

Yaqut Ağaşahqızı, “İki sahil”