44 günlük Qarabağ müharibəsində torpağı qanı bahasına Vətən edən qəhrəman oğullardan biri də şəhid Sadiq Şahin oğlu Bağırzadədir. Bu, Vətən aşiqi Astara rayonu, Ərçivan qəsəbəsində dünyaya göz açıb. İndi burada böyük də, kiçikdə Sadiqin adını fəxrlə çəkir, onunla qürur duyurlar.
Evin tək oğlu olan Sadiq hələ uşaqlıqdan idmanın boks növü ilə məşğul olub. Boks üzrə Azərbaycan komandasının üzvü kimi yarışlara qatılıb medallar qazanıb, diplomlarla təltif edilib, respublika birincisi olub...
Qəlbi torpaq, Vətən eşqi ilə döyünən Sadiq 2020-ci il ordu sıralarına yollanıb. Vətən müharibəsi başlanan gündən döyüşlərə qatılıb. Xüsusi Təyinatlı Kəşfiyyatçı kimi ön cəbhədə vuruşub. Murovdağ yüksəkliyinin azad edilməsi uğrunda haqq savaşımızda xeyli erməni dığasını məhv edib. Elə burada düşmən gülləsinə tuş gələrək, gənc ömrünü Vətən yolunda fəda edib.
Azərbaycan Respublikası Prezidentinin müvafiq Sərəncamları əsasında Sadiq Şahin oğlu ölümündən sonra “Azərbaycan Bayrağı” ordeni, “Vətən uğrunda”, “Cəsur döyüşçü” və digər medallara layiq görülüb.
44 günlük Vətən müharibəsinin ölməz qəhrəmanı Sadiq Şahin oğlu indi üç ildir şəhidlik adını daşıyır. Bu münasibətlə Astara Tarix-Diyarşünaslıq Muzeyinin əməkdaşları şəhidin uyuduğu müqəddəs torpağı ziyarət edib, ona ehtiram əlaməti olaraq məzarına təzə güllərdən çələng hörüblər. Mədəniyyət işçiləri daha sonra şəhidin ailəsi və ev muzeyində olublar.
Bəli, Vətən bölünməz olduğu kimi, onun müqəddəsliyinə tapınıb və canını ona şüurlu sürətdə qurban verənlər də ürəklərə köçməklə əbədi bir ömür qazanırlar...
Zəfər Orucoğlu,
Azərbaycan Jurnalistlər Birliyinin üzvü
