Azərbaycan Respublikası Ulu Öndər Heydər Əliyev ideyalarının işığında sosial-iqtisadi, siyasi, mədəni inkişaf yollarında inamla addımlamaqdadır. Tarixi Zəfərimiz sayəsində ərazi bütövlüyümüzü təmin etməklə ölkəmiz yeni qlobal reallıqlar fonunda növbəti, daha böyük transformasiya astanasına keçid edir. Uzun illər ölkəmizdə uğurla həyata keçirilən sosial-iqtisadi islahatlar milli iqtisadiyyatımızın davamlı inkişafını, maliyyə dayaqlarımızın güclənməsini təmin etmişdir. Azərbaycan Respublikası dünyada öz dayanıqlı iqtisadiyyatı, böyük maliyyə resursları olan, mühüm geosiyasi və geoiqtisadi mövqe tutan dövlətə çevrilmişdir. Ölkəmiz həmçinin müasir dövrdə Avropanın enerji təhlükəsizliyinin təmin edilməsinə  əvəzsiz töhfələr verir. Artıq Azərbaycan dövləti postpandemiya və postkonflikt dövründə keyfiyyətcə yeni olan 2022-2030-cu illəri əhatə edən strateji inkişaf mərhələsinə daxil olub.

Müzəffər Ali Baş Komandan Cənab İlham Əliyev 26 sentyabr 2024-cü il tarixində iqtisadi məsələlərə həsr olunmuş müşavirədəki çıxışında ölkəmizin iqtisadi inkişafda qazandığı uğurlar, eyni zamanda qarşıda duran prioritetlərlə bağlı bir çox vacib və maraqlı açıqlamalar verdi. Dövlət başçımız qeyd etdi ki, gələn ilin əsas xərcləri artıq müəyyən edilib. Büdcə dövlətimizin imkanlarını əks etdirir. Ölkəmizin hərbi potensialının gücləndirilməsi, təhlükəsizliyin təmin edilməsi, dövlət sərhədlərinin qorunması, hərbi sənaye kompleksinin inkişafı, təhsil xərcləri, Qarabağın, Şərqi Zəngəzurun bərpası və digər layihələr əsas prioritetlərdir. Həm sosialyönümlü layihələr, sosial infrastrukturla bağlı olan layihələr, həm də ümumi infrastrukturla bağlı olan layihələr – bütün bunlar bizim Dövlət İnvestisiya Proqramında öz əksini tapacaq. Elə etməliyik ki, biz gələn il imkan daxilində bütün əsas vəzifələri icra edək. Artıq Azərbaycanın iqtisadi inkişaf modeli dünyada özünü təsdiqləyib. Biz öz resurslarımıza arxalanaraq güclü iqtisadiyyat qurmuşuq, müstəqil iqtisadiyyat qurmuşuq, heç kimdən asılı deyilik. İqtisadi müstəqillik təbii olaraq Azərbaycana beynəlxalq müstəvidə böyük imkanlar qazandırır ki, uğurla, inamla, şərəflə, ləyaqətlə müstəqil xarici siyasət aparaq.

Müasir Azərbaycan iqtisadiyyatı neft və qeyri-neft sektorunun balanslaşdırılmış nisbəti əsasında uğurla inkişaf edir. Bu amil öz növbəsində ölkəmizin beynəlxalq nüfuzunu yüksəltməklə yanaşı, regionun lideri kimi geosiyasi mövqelərini də möhkəmləndirir. Ölkəmizin mövqeyi bölgədə getdikcə daha da artır və güclənir. Mühüm geosiyasi məkan kimi regionun özündə sülh və təhlükəsizliyin təmin edilməsi üçün dayaq nöqtəsi və ən perspektivli tərəfdaş hesab edilir. Azərbaycan artıq praktik olaraq bütün regional məsələlərin əsas iştirakçısıdır və regionda strateji əhəmiyyətli bütün layihələrin həm onun razılığı, həm də iştirakı olmadan gerçəkləşdirilməsi mümkün deyil. Dünya birliyi tərəfindən Cənubi Qafqazın ən güclü dövləti kimi qəbul edilən Azərbaycanın qonşuları ilə qarşılıqlı anlaşma əsasında qurulan xarici siyasət kursu ölkəmiz üçün iqtisadi inkişafla yanaşı, təhlükəsizlik baxımından da mühüm rol oynayır.

Emin Əliyev,

YAP Sumqayıt şəhər təşkilatının məsləhətçisi