2006-cu ildə əsası qoyulan BRICS formatı inkişaf etməkdə olan iqtisadiyyatlar üçün əməkdaşlıq platforması yaratmağı hədəfləyir. BRICS üzv ölkələr arasında iqtisadi əməkdaşlığın, ticarətin və investisiyaların gücləndirilməsinə diqqət yetirir. Bu format, həmçinin davamlı inkişafı gücləndirən və yoxsulluğu azaldan təşəbbüsləri dəstəkləyir. BRICS Beynəlxalq Valyuta Fondu və Dünya Bankı kimi qlobal təsisatlarda daha balanslı təmsilçiliyin tərəfdarıdır, məqsədi inkişaf etməkdə olan iqtisadiyyatların qlobal maliyyə qərarlarının qəbulunda iştirakını artırmaqdır.

BRICS Qərbin üstünlük təşkil etdiyi qlobal idarəetmə sistemlərini balanslaşdıraraq çoxqütblü dünya nizamını təşviq edir, həmçinin üzv ölkələrin suverenliyini qorumağa çalışır və qarşılıqlı hörmətə, müdaxilə etməməyə əsaslanan siyasəti dəstəkləyir. BRICS ölkələri, həmçinin bilik və texnologiyanın paylaşılmasına, mədəni mübadilənin təşviqinə, səhiyyə və təhsil təşəbbüsləri kimi vətəndaşlara fayda verən layihələr üzərində işləməyə diqqət yetirirlər.

Beləliklə, BRICS formatı inkişaf etməkdə olan iqtisadiyyatların davamlı inkişaf, iqtisadi dayanıqlıq və qlobal idarəetmə islahatları ilə bağlı məsələlərdə birgə işləmək üçün mühüm platformadır.

Oktyabrın 24-də Prezident İlham Əliyev Kazanda keçirilən XVI BRICS Sammitinin “Outreach/BRICS+” formatının ilk plenar iclasında çıxış edərək Azərbaycanın çoxtərəfli əməkdaşlığa dəstəyini və geosiyasi əhəmiyyətini vurğuladı. Dövlət başçısı Azərbaycanın 2020-2023-cü illərdə Qoşulmama Hərəkatına uğurlu sədrliyi dövründə çoxtərəfliliyi təşviq etdiyini vurğuladı və ölkəmizin Avrasiyanın mühüm nəqliyyat qovşağına çevrilməsi istiqamətində gördüyü işlərdən bəhs etdi. Xüsusilə Şərq-Qərb və Şimal-Cənub nəqliyyat dəhlizlərinin Azərbaycanın ərazisindən keçdiyini və bu dəhlizlərin genişləndirilməsinə yatırımların davam etdiyini bildirdi.

Prezident İlham Əliyev, həmçinin Bakıda keçiriləcək COP29 iqlim konfransının əhəmiyyətinə toxunaraq Azərbaycanın iqlim dəyişikliyi ilə mübarizə və qlobal təhlükəsizlik məsələlərində töhfə verməyə hazır olduğunu ifadə etdi. Bu çıxış Azərbaycanın beynəlxalq müstəvidə həm nəqliyyat və logistika, həm də ekoloji sahədəki rolunun gücləndirilməsi və BRICS+ formatında əməkdaşlıq perspektivlərini artırmaq istiqamətində siyasi niyyətlərini göstərdi.

Azərbaycan Prezidenti İlham Əliyev və Ermənistanın Baş naziri Nikol Paşinyan arasında oktyabrın 24-də Kazanda keçirilən BRICS sammiti çərçivəsində keçirilən görüş isə iki ölkə arasında sülh sazişinin irəliləyişinə dair öhdəliklərin bir daha təsdiqlənməsi ilə nəticələndi. Bu, Azərbaycanın regionda davamlı sabitliyin bərqərar edilməsinə sadiqliyi göstərir. Heç şübhəsiz, praktiki irəliləyiş gələcək danışıqlardan və diplomatik koordinasiyadan asılı olacaq.

Nurlan Həsənov,
​​Milli Məclisin deputatı