Şuşa, Azərbaycanın Qarabağ bölgəsində yerləşən qədim və tarixi bir şəhərdir. Qarabağın incisi sayılan Şuşa, tarixi və mədəni əhəmiyyətə malik olmaqla yanaşı, həm də Azərbaycanın memarlıq abidələrindən biridir. 1752-ci ildə Pənahəli xan tərəfindən əsası qoyulan bu şəhər, uzun illər boyu Qarabağ xanlığının mərkəzi olmuşdur. Şuşa, Azərbaycanın mədəniyyət paytaxtı kimi tanınır. Burada doğulmuş və yetişmiş çox sayda tanınmış şəxsiyyət – musiqiçi, şair və yazıçı – Azərbaycan mədəniyyətinə dəyərli töhfələr vermişdir. Məsələn, Azərbaycanın böyük bəstəkarı Üzeyir Hacıbəyli, məşhur şair Xurşidbanu Natəvan və tanınmış xanəndə Bülbül bu torpaqlarda yetişmiş sənətkarlardır. Şuşa, həmçinin Qarabağ xanəndəlik məktəbinin beşiyidir.

Əsrlər boyu Şuşa Azərbaycan memarlığı və mədəniyyəti üçün bir simvol olmuşdur. Şəhərdə bir çox məscidlər, karvansaralar və qalalar inşa edilmişdir ki, bunların arasında Yuxarı Gövhər Ağa və Aşağı Gövhər Ağa məscidləri xüsusilə tanınır.

1992-ci ildə erməni qüvvələri tərəfindən işğal olunan Şuşa, 2020-ci ildə Vətən müharibəsi zamanı Azərbaycan ordusu tərəfindən azad edildi. Bu qələbə, Azərbaycan xalqı üçün tarixi bir hadisədir və Şuşanın yenidən qurulması prosesi indi aktiv şəkildə davam edir. Şuşanın azad olunması ilə bu əziz torpaqlarımızda həyat yenidən canlanır və şəhər mədəniyyətimizin mərkəzinə çevrilir. Hazırda Şuşada bir çox tarixi və mədəni tədbirlər, festivallar və sərgilər təşkil olunur, şəhərin bərpası və qorunması üzrə layihələr həyata keçirilir.

Şuşa, həmçinin “Azərbaycanın Mədəniyyət Paytaxtı” elan olunmuş və 2022-ci ildə TÜRKSOY tərəfindən “Türk Dünyasının Mədəniyyət Paytaxtı” seçilmişdir. Bu, Şuşanın beynəlxalq səviyyədə tanınmasına və Azərbaycan mədəniyyətinin dünyada təbliğinə mühüm töhfədir.

E. Ağayeva,
YAP Xətai rayon təşkilatının “Q.Nəbi 6a” ünvanı üzrə ərazi partiya təşkilatının üzvü