İkinci Qarabağ müharibəsində Ələkbər Musayev canını Vətənə fəda edəndə ömrünün 21-ci baharını yaşayırdı. Doğma Azərbaycanın hər qarış torpağına, daşına ürəkdən bağlanan bu gənc yağıya qarşı son damla qanına qədər döyüşərək ölümsüzlüyə qovuşdu. Bununla da böyük bir xalqın qəhrəmanlıq simvoluna döndü Ələkbər. Dünyaya göz açdığı Cəlilabad rayonu, Mollalı kəndində kiçik də, böyükdə adı yeni, şanlı tariximizə qəhrəman kimi həkk olunan Ələkbəri özlərinə iftixar mənbəyi, qürur yeri bilir, onun keçdiyi həyat yolunu örnək sayırlar. Eləcə dövlət də Cəlilabad elinin qəhrəman oğlunu daim ucalıqda, yüksəklikdə saxlamaqdan ötrü ölümündən sonra onu 3-cü dərəcəli “Vətənə xidmətə görə” ordeninə, "Vətən uğrunda" və digər medallara layiq görüb.

Əzəl gündən ürəyi doğma Vətəninə, xalqına sevdalanan Ələkbərin atası Əlövsət Musayev də Birinci Qarabağ müharibəsində hər qarış torpaq uğrunda mərdliklə döyüşüb və yağıya qan qusdurub. Hər an erməni dığalardan qisas almaq arzusunda olan Ələkbər məktəbi bitirib ordu sıralarına yollanıb. Cəbhə bölgəsində Vətənin keşiyində durmaqla, həm də məqamı gələndə düşmənlə sona kimi vuruşub qisas alacağına and içib.

Xidmət zamanı Ələkbər Musayevin mərdliyi, cəsurluğu, vətənpərvərliyi ona əsgər və zabitlərin sevgisini qazandırıb. Vətən qarşısında oğuluq borcunu şərəflə yerinə yetirən gənc əsgərin ağır təlimlərdə əldə etdiyi uğurlar həmişə nümunə göstərilib. Başlıca istəyi döyüş meydanında yağını məhv edib, uzun illər işğala məruz qalan müqəddəs yurd yerimiz Qarabağın azadlığı olub. Və həmin günü görmək üçün əsgərlikdən sonra həyatını tam hərbiyə bağlayıb. 2020-ci il sentyabrın 27-də İkinci Qarabağ müharibəsi başlanan gündən ürəyində Vətən məhəbbəti, əlində silah müharibə meydanında odun-alovun içinə girib.

Ən ağır döyüşlərdə Ələkbər rəşadətlə, qəhrəmancasına vuruşub. Gündən-günə savaş zamanı düşmənə vurduğu zərbələrin sayı artıb, qazanılın zəfərlərin hesabına Qarabağımızın çox yerində üçrəngli bayrağımız dalğalanıb. İgid döyüşçü Murovdağ istiqamətində gedən ölüm-dirim savaşda düşmənin kabusuna çevrilməklə tarix yazıb. Yaşının çərçivəsinə sığmayan hünəri hesabına 30 il əsir düşən Vətən torpağımızda daha bir qələbə bayrağımız ucalıb. Təəssüf ki, bu, Ələkbərin son döyüşü olub.

Ələkbər Musayev canını Vətənin yaşaması naminə qurban verməklə əbədi Günəş ömrü qazanıb. Milyonların ürəyinə köç edən Cəlilabadın qəhrəman oğlu qərinələr boyunca hər an ehtiramla xatırlanar.

Zəfər Orucoğlu,
Azərbaycan Jurnalistlər Birliyinin üzvü