Əbu-Dabi görüşünün Azərbaycan tərəfindən konstruktiv əsasda keçdiyi hesab olunur və bu formada qiymətləndirilib. Bu görüşün digər xarakterik xüsusiyyəti ondan ibarət idi ki, danışıqlar prosesində hər hansı bir vasitəçi və üçüncü tərəfin iştirakı faktı yox idi. Bu, Ermənistan və Azərbaycanın sülh prosesinin tam şəkildə, ikitərəfli əsasda aparılan danışıqlar prosesinin bir göstəricisi idi ki, son iki ildən artıq bir dövrdə iki ölkə arasında da danışıqlar məhz bu müstəvidə aparılır.

“İki sahil” xəbər verir ki, bunu Azərbaycan Respublikası Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev jurnalistlərə açıqlamasında deyib.

Prezidentin köməkçisinin sözlərinə görə, bunun tərkib hissəsi olaraq ikitərəfli müstəvidə sülh gündəliyinin irəli aparılması üçün yaxşı nailiyyətlər əldə olunub. “Buraya sülh müqaviləsinin mətninin razılaşdırılması, sərhədlərin delimitasiyası və bütövlükdə regionda sülhün tam təsbit olunması, Ermənistan- Azərbaycan münasibətlərində hərbi konfrantasiya elementinin gündəlikdən çıxarılaraq və müxtəlif mübahisə səviyyəsinə endirilməsi daxildir. Hesab edirik ki, bu da regional sülh gündəliyi baxımından vacibdir. Görüşdə müzakirə olunan mövzulardan biri sülh müqaviləsi ilə əlaqədar olan məsələlər olmuşdur və Prezidentin qeyd etdiyi kimi, Azərbaycan müvəqqəti bir keçid vasitəsi kimi, həmçinin kreativ diplomatik yanaşmadan çıxış edərək sənədin paraflanması təklifi ilə çıxış edib. Belə ki, Ermənistanın konstitusiyası ilə əlaqədar olan məsələlər, həmçinin Minsk qrupunun ləğv edilməsi ilə əlaqədar olan addımlar həyata keçirilənə qədər bu çərçivədə keçid bir addım kimi sənədin paraflanması müzakirə mövzusudur”.