Bakı Dövlət Universitetində (BDU) Kənd Təsərrüfatı Nazirliyinin təşəbbüsü, BDU, BMT-nin Ərzaq və Kənd Təsərrüfatı Təşkilatının (FAO) və Baytarlıq Elmi-Tədqiqat İnstitutunun dəstəyi, “Letgen Biotechnology” və “Bayramlı Group” şirkətlərinin tərəfdaşlığı ilə həyata keçirilən “Qarabağ və Dilbaz at cinslərinin genetik xəritəsinin hazırlanması” layihəsinə dair metodoloji müzakirələrlə bağlı görüş keçirilib.
“İki sahil” xəbər verir ki, açılış nitqi ilə çıxış edən BDU-nun rektoru Elçin Babayev layihənin milli və elmi əhəmiyyətindən danışaraq, BDU-nun bu təşəbbüsə göstərdiyi dəstəyin strateji xarakter daşıdığını qeyd edib. Bildirib ki, universitet alim və tədqiqatçılarının bu prosesdə iştirakı ölkənin elmi potensialını gücləndirir və layihənin nəticələri həm milli, həm də beynəlxalq əməkdaşlıqlar üçün yeni imkanlar yaradacaq.
Kənd təsərrüfatı nazirinin müşaviri Zaur Əliyev çıxışında dövlət və özəl sektor tərəfdaşlığının əhəmiyyətindən danışıb. Layihənin yalnız elmi nəticələri ilə deyil, həm də dövlət qurumları, universitetlər və özəl şirkətlər arasında qurulan əməkdaşlıq modeli ilə seçildiyini və bu yanaşmanın aqrar sektorda innovativ texnologiyaların tətbiqini daha da sürətləndirəcəyin bildirib.
FAO-nun Azərbaycandakı nümayəndəsi Muhammad Nasar Hayat layihənin beynəlxalq təsirindən söz açaraq, Qarabağ və Dilbaz at cinslərinin genetik xəritələndirilməsinin təkcə milli deyil, həm də qlobal əhəmiyyət daşıdığını deyib. Qeyd edib ki, layihənin nəticələrinin beynəlxalq elmi bazalarda paylaşılması Azərbaycanın dünya elmi ictimaiyyətində mövqeyini möhkəmləndirəcək və genetik irsin qorunmasına qlobal səviyyədə töhfə verəcək.
“Bayramlı Group” şirkətinin Elmi Araşdırmalar departamentinin müdiri Dürdanə Rəcili layihənin məqsədləri, ilkin mərhələdə görülmüş işlər və əldə olunan nəticələr barədə məruzə edib. O, xüsusilə Qarabağ və Dilbaz atlarından bioloji nümunələrin (qan və tük) toplanması, onların DNT izolyasiyası və ilkin analizlərin aparılması prosesinə diqqət çəkib. Eyni zamanda layihədə istifadə ediləcək metodologiyanın elmi əsasları barədə geniş təqdimatla çıxış edib.
Tədbirdə Kənd Təsərrüfatı Nazirliyinin “Heyvandarlığın təşkili və monitorinqi” şöbəsinin müdiri Bayandur Rzayev, Molekulyar Biologiya və Biotexnologiya İnstitutunun direktoru, akademik İradə Hüseynova, FAO nümayəndələri, Nazirliyin müxtəlif qurumlarının təmsilçiləri, Baytarlıq Elmi Tədqiqat İnstitutu əməkdaşları və BDU-nun professor-müəllim heyəti iştirak edib.
Müzakirə sessiyasında qonaqlar layihənin metodologiyası ilə bağlı fikir və təkliflərini səsləndirərək gedişat üzrə elmi müzakirələr aparıblar. Layihənin ekspertləri – KTN Baytarlıq Elmi Tədqiqat İnstitutunun direktoru Siyalə Rüstəmova və ADA Universitetinin dosenti Asəf Ömərov təqdim edilən metodoloji yanaşmalara dair elmi rəylərini bölüşüblər.
Qeyd edək ki, tədbirdə Türkiyə Kənd Təsərrüfatı və Meşəçilik Nazirliyinin nümayəndələri də onlayn formada iştirak ediblər. Onlar nümunə toplanması mərhələsində layihə komandasına dəstək göstərərək öz təcrübə və tövsiyələrini paylaşıblar.
Sonda BDU rektorunun strateji inkişaf və əlaqələr üzrə müşaviri Xalid Bayramlı layihənin yalnız elmi nəticələrinə görə deyil, həm də milli-mədəni irsimizin qorunması baxımından strateji əhəmiyyət daşıdığını vurğulayıb. Qeyd edib ki, Qarabağ və Dilbaz at cinslərinin genetik xəritələndirilməsi Azərbaycanın zəngin irsinin gələcək nəsillərə ötürülməsi və qlobal elmi ictimaiyyətə inteqrasiyası üçün mühüm rol oynayacaq.
