CSG konserninin sahibi Mixal Strnadın sərvəti 330 milyard kron (təxminən 13,5 milyard avro) olaraq qiymətləndirilir.

“İki sahil” xəbər verir ki, bu barədə “İrozhlas” portalı məlumat yayıb.

Son bir ildə onun aktivlərinin dəyəri xeyli artıb. Bu, dünyada hərbi münaqişələr fonunda silahlara artan tələbatla əlaqələndirilir.

Strnad sərvətinə görə PPF maliyyə holdinqinin sahibi Renata Kellnerovanı geridə qoyub. Onun və ailəsinin aktivləri 315 milyard kron (təxminən 12,8 milyard avro) təşkil edir. Enerji və sənaye qrupuna nəzarət edən Daniel Křetínský isə (təxminən 11,4 milyard avro) ilk üçlüyü tamamlayır.

Agrofert kənd təsərrüfatı holdinqinin sahibi, keçmiş baş nazir Andrey Babiş isə siyahıda səkkizinci pillədə qərarlaşıb (təxminən 3,5 milyard avro). O, oktyabrda keçiriləcək parlament seçkilərində qalib gəlmək şansı ən yüksək olan ANO hərəkatına rəhbərlik edir.