Şimali Avropa ölkələri Arktika bölgəsi və Rusiya sərhədləri üzərində müşahidə imkanlarını fəal şəkildə genişləndirərək ABŞ üçün strateji əhəmiyyətlərini nümayiş etdirməyə çalışırlar.

“İki sahil” xəbər verir ki, bu barədə The Financial Times qəzeti mənbələrə istinadla yazır.

Nəşrdə qeyd olunur ki, ABŞ-ın diqqətini yenidən Rusiyaya yönəltməyə çalışmaqla yanaşı, Şimali Avropa ölkələri Arktikada təhlükəsizlik məsələlərinə artan maraq fonunda Vaşinqton üçün nə dərəcədə faydalı olduqlarını göstərmək niyyətindədirlər.

Bildirilir ki, Vaşinqtonun Arktika regionuna diqqətinin güclənməsi fonunda Skandinaviya ölkələri, ilk növbədə Norveç, genişmiqyaslı müşahidə sistemi qurublar. Bu sistemə kəşfiyyat təyyarələri, peyklər, uzaqmənzilli pilotsuz uçuş aparatları, sualtı qayıqlar və hərbi freqatlar daxildir.

Norveçin müdafiə naziri Ture Sandvikin sözlərinə görə, bu tədbirlər eskalasiyanın qarşısının alınmasına və Rusiyanın “cilovlanmasına” yönəlib.

Skandinaviya ölkələrindən olan yüksək vəzifəli rəsmi şəxs Financial Times-a bildirib ki, ABŞ birbaşa onların topladığı kəşfiyyat məlumatlarından asılıdır. Çünki Şimali Avropa dövlətləri Rusiya sərhədləri yaxınlığında baş verən proseslər barədə “dərin anlayışa” malikdirlər. Bundan əlavə, ABŞ öz kəşfiyyat fəaliyyətini həyata keçirmək üçün bu ölkələrin hava məkanından da istifadə edə bilər.

Daha əvvəl The Times nəşri ABŞ hərbçilərinin Arktikada əməliyyatlar aparmağa tam hazır olmadığını yazmışdı.