Rusiya Prezidenti Vladimir Putinin mətbuat katibi Dmitri Peskov Almaniyanın Ukrayna ilə bağlı danışıqlarda vasitəçi qismində çıxış etməsi məsələsinin hazırda gündəmdə olmadığını bildirib. Onun sözlərinə görə, bu mövzu Rusiya tərəfi tərəfindən müzakirə olunmur.

“İki sahil” xəbər verir ki, bu barədə RİA Novosti məlumat yayıb.

“Hazırda Almaniyanın danışıqlar prosesində hər hansı vasitəçiliyindən söhbət getmir”, - deyə Peskov qeyd edib.

Qeyd edək ki, bundan əvvəl Almaniya kansleri Fridrix Merts Ukrayna münaqişəsi ilə bağlı Rusiya Prezidenti Vladimir Putinlə danışıqlar aparılmasına qarşı çıxış etmişdi. Bu mövqe Berlinin mövcud siyasi xəttinin Moskva ilə birbaşa dialoqa ehtiyatla yanaşdığını göstərir.

Bundan başqa, Rusiya Prezidentinin köməkçisi Yuri Uşakov daha əvvəl bəyan etmişdi ki, Vladimir Putinlə Ukrayna Prezidenti Vladimir Zelenski arasında mümkün təmaslar konkret və real nəticələrə gətirib çıxarmalıdır. Onun fikrincə, danışıqlar yalnız formal xarakter daşımamalı, praktiki irəliləyişlərə xidmət etməlidir.