Danışıqlar zamanı İran ABŞ-a Amerika istehsalı olan təyyarələrin alınmasını və neft-qaz layihələrində birgə investisiya imkanlarının nəzərdən keçirilməsini təklif edib.

“İki sahil” xəbər verir ki, bu barədə ABŞ-ın CBS News telekanalı diplomatik mənbələrə istinadla məlumat yayıb.

Məlumata əsasən, Tehran Vaşinqtona mümkün enerji yataqlarına çıxış və birgə sərmayə perspektivləri barədə siqnallar verib. Bu addım iki ölkə arasında gərgin münasibətlər fonunda iqtisadi əməkdaşlıq imkanlarının müzakirə oluna biləcəyinə işarə kimi qiymətləndirilir.

İranın xarici işlər naziri Abbas Araghchi daha əvvəl bildirib ki, Tehran amerikalıları düşmən hesab etmir, lakin ABŞ-ın siyasətini düşmənçilik xarakterli sayır.

ABŞ Prezidenti Donald Trump isə İranla razılaşmanın əldə olunması üçün 15 günlük müddət verəcəyini açıqlamışdı.

Bundan başqa, Financial Times qəzeti yazıb ki, İran ətrafında ABŞ hərbi qüvvələrinin sürətli və genişmiqyaslı şəkildə artırılması mümkün əməliyyat ehtimalının yüksək olduğunu göstərir.