Psixoloqlar açıqlayır: Qar yağarkən hiss edilən sakitlik təsadüfi deyil

Qar yağması bir çox insanlar üçün sadəcə mövsümi təbiət hadisəsi deyil, eyni zamanda, emosional təcrübə kimi qiymətləndirilir. Küçələrin səssizləşməsi, şəhərin ritminin yavaşlaması və ətrafın ağ örtüyə bürünməsi gündəlik qayğılardan qısamüddətli də olsa uzaqlaşmağa imkan yaradır. Mütəxəssislər bildiriblər ki, qar dənələrini izləyərkən yaranan rahatlıq hissinin psixoloji izahı var.

Psixoloq Ketrin Hallisi qeyd edib ki, bu hiss beynin işləmə mexanizmi ilə birbaşa əlaqəlidir. Onun sözlərinə görə, insan özünü isti və təhlükəsiz mühitdə hiss etdiyi zaman qar yağışını izləmək son dərəcə sakitləşdirici təsir göstərir. Qarın yavaş-yavaş yerə enməsi diqqəti gündəlik stress faktorlarından yayındırır və insanın təbiətin estetikasını dərk etməsinə şərait yaradır.

Araşdırmalara əsasən, qarın yaratdığı “heyranlıq hissi” psixoloji baxımdan mühüm rol oynayır. Bu duyğu insanın diqqətini indiki ana yönəltməyə kömək edir, diqqət səviyyəsini artırır və stress, narahatlıq, hətta tənhalıq hissinin azalmasına dəstək ola bilər. Qar örtüyünün ətrafdakı səsləri zəiflətməsi və vizual mühiti sadələşdirməsi də zehni sakitliyi gücləndirən amillər sırasında göstərilir. Mütəxəssislər bildiriblər ki, qar yağışı zamanı gündəlik həyat axınının dəyişməsi və gözlənilməz təbiət mənzərəsinin formalaşması beyində yenilənmə effekti yaradır. Bu dəyişiklik insanlarda həm maraq, həm də müsbət gözlənti hissini artırır. Eyni zamanda, qar çox vaxt uşaqlıq xatirələrini canlandırır və təhlükəsizlik, rahatlıq duyğusu ilə assosiasiya olunur.

Psixoloqlar vurğulayıblar ki, qarın sakitləşdirici təsirini hiss etmək üçün xüsusi fəaliyyət tələb olunmur. Sadəcə pəncərədən qar yağışını izləmək belə zehni rahatlama yarada bilər. Bu səbəbdən qar yağışı intensiv gündəlik tempoda qısa fasilə verərək zehni dincəltməyin ən təbii vasitələrindən biri kimi dəyərləndirilir.

Şahnigar Əhmədova, “İki sahil”