Gürcüstanın sabiq müdafiə naziri Tinatin (Tina) Xidaşeli, eləcə də tarixçi-alim və müxalif siyasətçi Qubaz Sanikidze Dövlət Təhlükəsizlik Xidməti (DTX) tərəfindən dindirilməyə çağırılıblar.

“İki sahil” xəbər verir ki, hər iki siyasətçi İranın Gürcüstanda təsirinin artması ilə bağlı mətbuata verdikləri açıqlamalara görə dindiriləcəklər.

DTX-nın mətbuata açıqlamasında deyilir ki, son günlərdə müxtəlif şəxslər Gürcüstanda digər ölkələrdən işçilərin işə götürülməsi ilə bağlı bir sıra məlumatları, o cümlədən terrorizm ittihamlarını və ya işarələrini açıq şəkildə açıqlayıblar.

"DTX həm faktiki məlumatlara zidd olan bu ifadələrin məzmununu, həm də müəlliflərinin Gürcüstanı bu cür məsələlərdə ittiham etmək motivasiyasını, xüsusən də regionda davam edən hərbi əməliyyatlar fonunda və bu cür ifadələrin müəlliflərindən heç birinin hüquq-mühafizə orqanlarına heç bir məlumat vermədiyini nəzərə alaraq vəziyyəti diqqətlə izləyir və öyrənir. İstintaq başlayıb və ifadələrin müəllifləri bütün istiqamətlər üzrə dindiriləcək, o cümlədən istintaq çərçivəsində ən azı bəzi konkret faktları göstərmək imkanı veriləcək", - deyə qurumun açıqlamasında bildirilir.