Cənubi Koreya və Amerika Birləşmiş Ştatları (ABŞ) qoşunları kəşfiyyat dronlarının iştirakı ilə birgə real döyüş atəş təlimi keçirib.

“İki sahil” Cənubi Koreya mediasına istinadla xəbər verir ki, bu barədə Birləşmiş Ştatların Koreyadakı hərbi qüvvələrinin komandanlığı açıqlama yayıb.

İki Koreyanı ayıran demilitarizasiya zonasından təxminən 30 kilometr cənubda yerləşəm poliqonda keçirilmiş təlim yeni texnologiyaların tətbiqi ilə qarşılıqlı fəaliyyəti gücləndirmək məqsədi daşıyıb. Təlimdə hər iki tərəfdən təxminən 900 hərbçi iştirak edib. Təlimdə iştirak edən şəxsi heyət arasında Alyaskada yerləşən 11-ci hava-desant diviziyasından paraşütçülər də olub.

Təlim ssenarisinə əsasən, kəşfiyyat dronları düşmənin şərti mövqelərini müəyyən edib, ardınca Cənubi Koreya ordusunun 81 millimetrlik minaatanlarının və ABŞ-nin 60 millimetrlik minaatanlarının, eləcə də ABŞ ordusunun “Apache” helikopterlərinin dəqiq zərbələrini əhatə edən çoxsahəli hücum həyata keçirilib. Cənubi Koreyanın K2 döyüş tankları və K21 piyada döyüş maşınları düşmənə yaxınlaşaraq hücumu dəstəkləyib.

"Pilotsuz uçuş sistemləri kimi ən son texnoloji tətbiqləri inteqrasiya etməklə və mürəkkəb, çoxsahəli əməliyyatlar həyata keçirməklə ABŞ və Cənubi Koreya ittifaqı Hind-Sakit Okean bölgəsində təcavüzün qarşısını almaq və sabitliyi təmin etmək üçün hazırlanmış daha öldürücü, çevik və qarşılıqlı fəaliyyət göstərən bir qüvvə yaradır", - deyə ABŞ hərbi bölməsinin açıqlamasında bildirilir.