Rusiyada Macarıstan Baş naziri Viktor Orbanın parlament seçkilərində məğlubiyyətinin əhəmiyyətini açıq şəkildə azaltmağa çalışırlar, amma bu, Kreml üçün ciddi geosiyasi zərbədir.

“İki sahil” xəbər verir ki, bu barədə ABŞ-nin Müharibə Araşdırmaları İnstitutunun (ISW) təhlilində deyilir.

Amerikalı analitiklərin fikrincə, Rusiya Prezidenti Vladimir Putin şəxsən Viktor Orbanı dəstəkləyib, onun məğlubiyyəti Moskvanın Avropa İttifaqındakı (Aİ) əsas tərəfdaşlarından birini itirməsi deməkdir.

Kremlin sözçüsü Dmitri Peskov bildirib ki, Moskva parlament seçkilərində qalib gələn müxalif “Tisa” partiyasının sədri Peter Madyarı təbrik etməyəcək. O, həmçinin Rusiyaya qarşı sanksiyalara dəstəyə görə Macarıstanı “dost olmayan ölkə” adlandırıb və Aİ ilə münasibətlərin ən aşağı səviyyədə olduğunu vurğulayıb.

Rusiya xarici işlər naziri Sergey Lavrov isə Macarıstanın yeni hökuməti ilə işləməyə hazır olduqlarını bildirib. O hesab edir ki, bu, həmin hökumətin öz milli maraqlarını necə başa düşəcəyindən asılı olacaq.

Rusiyanın bəzi mənbələri vəziyyəti fərqli qiymətləndirirlər. Bəziləri Orbanın məğlubiyyətinin əhəmiyyətini kiçildir və ya onun Kremlə real yaxınlığını şübhə altına alır, digərləri isə açıq şəkildə etiraf edirlər ki, Moskva əvvəllər Aİ-də Rusiyaya uyğun olmayan qərarların qarşısını alan mühüm müttəfiqini itirib.

ISW hesab edir ki, Kreml bu hadisənin əhəmiyyətini qəsdən aşağı göstərir, bununla vəziyyətə nəzarət etdiyini göstərməyə çalışır: “Moskva Orban olmasa belə, Ukraynanın müharibənin dayandırılması üçün Rusiyanın şərtlərini qəbul etməsi istiqamətində guya təzyiq altında qalacağı təəssüratını yaratmağa çalışır”.