“Nokia” brendi altında rekord tutumlu batareyaya malik düyməli telefon təqdim olunub.

“İki sahil” xəbər verir ki, bu barədə “Notebookcheck” nəşri məlumat yayıb.

“Nokia 300 Power Bank” modeli Filippində təqdim edilib. Mobil cihaz uzun illərdir əfsanəvi Finlandiya brendi altında klassik düyməli telefonları yenidən istehsal edən HMD Global şirkəti tərəfindən hazırlanıb.

Qurğunun əsas fərqləndirici xüsusiyyəti 3700 milliamper-saat (mAh) tutumlu rekord göstəriciyə malik batareyadır. HMD-nin məlumatına görə, telefon gözləmə rejimində 45 günədək, danışıq rejimində isə 26 saatadək işləyə bilir.

Bundan əlavə, cihaz USB-C portu ilə təchiz olunub ki, bu da ona digər qurğuları enerji bankı (power bank) kimi qoşaraq enerji ilə doldurmağa imkan verir.