"Patriot" sisteminin yaradıcıları olan Amerikanın "Raytheon" və "Lockheed" hərbi-sənaye şirkətləri Ukraynanın raket kompleksini təkmilləşdirərək onu daha ucuz qiymətə istehsal etməyə başlaya biləcəyindən narahatlıqlarını ifadə ediblər.

“İki sahil” xəbər verir ki, bu barədə "The Atlantic" nəşri amerikalı rəsmi şəxsə istinadla məlumat yayıb.

Nəşrin həmsöhbəti bildirib ki, şirkətlər əqli mülkiyyətin mənimsənilməsi və texnologiyaların ötürülməsi ilə bağlı narahatlıqlarını rəsmi şəkildə ifadə edəcəklər. Onları həqiqətən narahat edən məsələ ukraynalıların 'Patriot'u təkmilləşdirmək, daha sonra isə onu daha böyük miqyasda, daha sürətlə və xeyli ucuz qiymətə istehsal etmək üçün yol tapmaları ehtimalıdır.

"The Atlantic" qeyd edir ki, Ukrayna artıq Amerikanın "Hornet" dronlarını modernləşdirib. Kommersiya məqsədli "Starlink" peyk terminallarının köməyi ilə ukraynalı mütəxəssislər bu cür dronların fəaliyyət radiusunu genişləndirib və onların radioelektron maneələrə qarşı həssaslığını azaldıblar. Ukrayna Prezidenti Volodimir Zelenski ölkənin hazırda ildə təxminən 10 milyon dron istehsal etdiyini bildirib. Nəşrin yazdığına görə, ABŞ-də bu göstərici cəmi 100 min ədədə çatır. Bununla belə, Ukrayna Silahlı Qüvvələrinin istifadə etdiyi bir çox PUA-lar, məsələn, "Dart" kamikadze dronları xeyli ucuz başa gəlir — təxminən 1 min dollar. "The Atlantic" yazır ki, buna baxmayaraq, onlar "milyonlarla dollar dəyərində olan" hədəfləri məhv edirlər.

Nəşr vurğulayır ki, Ukrayna dron sahəsində istehsalı və texnologiyaları fəal şəkildə inkişaf etdirir. O, öz texnoloji işləmələri ilə digər ölkələrlə, o cümlədən ABŞ-lə bölüşür. Floridada yerləşən "Powerus" şirkəti artıq Ukrayna avadanlıqlarını və lisenziyalarını almağa başlayıb. Bu şirkətin investorları arasında Erik Tramp və kiçik Donald Tramp da var.