Minalardan Təmizləmə Gündəliyimizdə dost tərəfdaşlarımızın bu sahədəki töhfəsi və dəstəyi var. Xüsusilə Avropa İttifaqını, Böyük Britaniyanı, Səudiyyə Ərəbıstanını, İtaliyanı, Birləşmiş Ərəb Əmirliklərini və bir çox başqa ölkələri vurğulaya bilərəm. Onlar bu səydə bizim dostlarımız və tərəfdaşlarımız olacaqlar.

“İki sahil” xəbər verir ki, bu barədə Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Xankəndi şəhərində Mədəniyyət Mərkəzindəki çıxışı zamanı söyləyib.

H.Hacıyev bildirib ki, bu, humanitar addımdır və Azərbaycanın minalardan təmizlənməsi əməliyyatlarına belə bir dəstək gələcəyə, Avropanın və dünyanın bir çox hissəsinin təhlükəsizliyinin gələcəyinə yatırılan investisiyadır.

“Çünki Azərbaycan da özünəməxsus imkanlar və unikal təcrübə qazanır. Hesab edirik ki, gələcəkdə digər minalardan təmizləmə məqsədlərinə də töhfə vermək iqtidarında olacağıq. Lakin hələ də qarşımızda çağırış var və bu davam edir, sahədəki mina operatorlarımız ərazini təmizləmək və əhalimizin mülki istifadəsinə vermək üçün öz üzərilərinə düşəni edirlər. Bir daha sizə təşəkkür edirəm və komandamıza yeni qoşulan səfirləri də salamlayıram, çünki biz bu cür səfərləri müntəzəm olaraq təşkil edirik. Diplomatik korpusumuz da müntəzəm olaraq yenilənir. Bu, diplomatik həyatdır və biz bunu bilirik. Yeni səfirlərimizin təcrübəsini səbirsizliklə gözləyirik, çünki bu, onların Qarabağa ilk səfəridir”, - deyə Prezident Administrasiyasının Xarici siyasət məsələləri şöbəsinin müdiri əlavə edib.

“Diplomatik korpusumuzdan tezliklə Naxçıvana səfər təşkil edəcəyimiz barədə elanla bağlı sorğu almışıq. Prezident İlham Əliyevin qeyd etdiyi kimi, Naxçıvan regionu əlçatandır, lakin uzun illərdir təcrid olunub. Lakin Naxçıvan da inteqrasiya olunmuş regional nəqliyyat, logistika və bəzi digər layihələrin hissəsinə çevrilir və Qarabağ-Şərqi Zəngəzur inkişaf parkının da ayrılmaz tərkib hissəsinə çevrilir”, - deyə Prezidentin köməkçisi diqqətə çatdırıb.