Sentyabrın 11-də Yeni Azərbaycan Partiyası (YAP) Zaqatala rayon təşkilatının XII konfransı keçirilib.

“İki sahil” xəbər verir ki, əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

Konfransda YAP Zaqatala rayon təşkilatının sədri Fərid Ramazanov hesabat məruzəsi ilə çıxış edib. O, Yeni Azərbaycan Partiyasının ölkəmizin ictimai-siyasi həyatında mühüm rol oynadığını vurğulayıb. F.Ramazanov partiyanın cəmiyyətin böyük etimadını qazandığını və dövlətçilik prinsiplərinin möhkəmləndirilməsinə böyük töhfələr verdiyini bildirib.

Zaqatala Rayon İcra Hakimiyyətinin başçısı Mübariz Əhmədzadə Ulu Öndər Heydər Əliyevin müəyyənləşdirdiyi siyasi kursun Prezident İlham Əliyev tərəfindən uğurla davam etdirilməsi nəticəsində Azərbaycanın mühüm nailiyyətlər qazandığını bildirib. O, “Xalqın YAP-a göstərdiyi etimad partiyanın dövlətçilik prinsiplərinə sadiq fəaliyyətinin nəticəsidir”, - deyə vurğulayıb.

Milli Məclisin deputatı Asif Əsgərov çıxışında Prezident İlham Əliyevin rəhbərliyi ilə həyata keçirilən dövlət siyasətinin ölkənin hərtərəfli inkişafına verdiyi töhfələrdən danışıb. O, xalq-iqtidar birliyi nəticəsində Azərbaycanın tarixi nailiyyətlər əldə etdiyini diqqətə çatdırıb.

Partiya veteranları Tahir Məmmədov və Elmira Hacıyeva Yeni Azərbaycan Partiyasının keçdiyi şərəfli yoldan, partiyanın fəaliyyətində veteranların rolundan söz açıblar. Onlar gənc partiya üzvlərinin dövlətçilik ənənələrinə sədaqət ruhunda fəaliyyət göstərməsinin vacibliyini vurğulayıblar.

Çıxış edən Kəpənəkçi kənd ərazi partiya təşkilatının sədri Xuraman Şabanova və Təhsil ərazi partiya təşkilatının sədr müavini Rəcəb Əlizadə ərazi partiya təşkilatlarının fəaliyyətindən, partiya üzvlərinin rayonun ictimai-siyasi həyatında fəal iştirakından söz açıblar.

YAP Mərkəzi Aparatının Təşkilat şöbəsinin baş məsləhətçisi Xəqani Tağıyev Yeni Azərbaycan Partiyasının VII qurultayından sonra fəaliyyətin daha səmərəli qurulması istiqamətində görülən işlərdən danışıb.

Konfransda YAP Zaqatala rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.

Sonda Yeni Azərbaycan Partiyasının Himni səsləndirilib.