Təhlükəsizlik insan həyatının ən vacib qoruyucu amilidir. Hər birimizin gizli qalmasını istədiyi bilgiləri, özəl həyatına dair materialları, məxfi hesab etdiyi məlumatları var. Reallıqdan fərqli olaraq, virtual aləmdə bu təhlükəsizliyi qorumaq üçün müvafiq şifrələrin müəyyənləşdirilib tətbiq edilməsi qənaətbəxş hesab olunur.
Şifrənin təhlükəsizlik baxımından güclü olması labüddür. Nə qədər “möhkəm” şifrə olarsa sizin məlumatlarınız bir o qədər etibarlı mühafizə edilər.
Şifrələr telefona, kompyuterə, sosial şəbəkə hesablarımıza, elektron poçtumuza, şəxsi materiallarımıza (sənəd, şəkil, video) başqalarının icazəsiz, xəbərsiz daxil olmasının qarşısını almaq üçün görülən kütləvi tədbirdir. İnsanlar özəl hesab etdiklərinin ictimailəşməsini istəmirlər. Şifrə qoruyucu funksiya daşıyır, təhlükəsizliyin ən əsas simvoludur.
Parollar adətən rəqəm, hərf, şərti işarələrdən ibarət olan xüsusi məxfilik kodlarıdır. Bu, hər subyektə görə dəyişir. Adətən təvəllüd, ardıcıl rəqəmlər, təkrar eyni rəqəm, oxşar hərf təkrarlanması, adı, soyadı şifrə üçün seçilir. Bəzən şifrəni müəyyən etdikdən sonra sistem parolun təhlükəsizlik dərəcəsini (aşağı, orta, güclü) istifadəçiyə xəbərdarlıq mənasında bildirir. Bu parolun başqaları, xüsusilə xakkerlər tərəfindən qırılmasının qarşısını almaq üçündür. Xüsusilə də tanınmış insanların, bankların, güclü şirkətlərin hesabları tez-tez xakker hücumuna məruz qalır. Bunun qarşısını almaq üçün isə xüsusi seçilmiş, bir az mürəkkəb parollar seçilsin.
Araşdırma nəticəsində, insanların ən çox istifadə etdiyi şifrələrin siyahısı müəyyənləşib. Ən “populyar” parol (123456) müəyyənləşdirilib. İnanmaq çətin olsa da, şifrə problemi ilə çox məşğul olmamaq üçün bu asan üsula əl atıblar.
Ən rahat və tez qırıla bilən şifrələrin siyahısı:
123456789
12345678
12345
111111
1234567
sunshine
qwerty
Iloveyou
Bəzən insanlar yaddaş zəifliyini, şifrələdiyi məlumatların çoxluğunu və ya sadəcə bu məsələyə xüsusi diqqət etmədiyini bəhanə edərək çox sadə, standart, zəif parollardan istifadə edirlər.
Güvən baxımından yuxarıda adları qeyd olunan bu parollardan istifadə etmək münasib deyil. Daha sonra isə şifrəmizin uzun olmasına diqqət etməli, hərf və rəqəm birləşmələrindən, şərti işarələrdən, standart olmayan, qeyri-adi sözlərdən istifadə etməliyik.
Unutmamalıyıq ki, deşifrə olmaq bir çox məqamlarda sizin üçün ürəkaçan olmaya bilər. Ona görə də diqqətli olun.
Yaqut Ağaşahqızı, “İki sahil”