Macarıstanın Baş naziri Viktor Orban miqrasiya əleyhinə ritorikanın üstünlük təşkil etdiyi növbəti bəyanat verib.

AZƏRTAC xəbər verir ki, parlamentin iclasında çıxış edən Baş nazir onun ölkəsinin əsas məqsədinin Avropa Parlamentində, sonra isə Avropa Komissiyasında miqrasiya əleyhinə çoxluğun təmini olduğunu bildirib. “Miqrasiya və immiqrasiya Qərbi Avropa ölkələri üçün mədəniyyətlərinin mövcudluğu məsələsidir. Biz digərləri ilə yanaşı deyil, özümüz üçün yaşamaq istəyirik”, -deyə V.Orban vurğulayıb.

Macarıstan hökumətinin rəhbəri etiraf edib ki, “miqrasiya tərəfdarlarının lideri” olan Fransa Prezidenti Emmanuel Makronla mübarizə aparmaq niyyətindədir.

Son aylar Budapeşt Vaşinqtonla birlikdə BMT-nin miqrasiya və qaçqınlar üzrə iki müqaviləsinə qoşulmaqdan imtina edib.