«2020-ci il tarixdə qalır. 2020-ci il tarixdə bizim şanlı Qələbəmiz ili kimi qalacaqdır. Azərbaycan Ermənistanı 44 gün ərzində məğlub edərək öz doğma torpaqlarını işğaldan azad etmişdir. Bu Qələbə Azərbaycan xalqının yaddaşında əbədi yaşayacaqdır. Bu, tarixi Qələbədir. Biz tarixi ədaləti bərpa etdik.» Dünya Azərbaycanlılarının Həmrəyliyi Günü və Yeni il münasibətilə xalqımızı təbrik edən Prezident İlham Əliyevin bu sözləri Prezident seçilərkən söylədiyi «2003-cü ildə mən birinci dəfə Azərbaycan Prezidenti vəzifəsinə seçiləndə bəyan etmişdim ki, mənim üçün Prezident kimi əsas vəzifə torpaqlarımızı işğaldan azad etməkdir» sözlərinin təsdiqi, xalqına verdiyi vədinə sadiqliyidir. 17 illik prezidentliyi dövründə dövlətin xarici siyasətinin əsas istiqamətləri kimi diqqətdə saxladığı ərazi bütövlüyümüzün bərpası məsələsi ilə bağlı bütün müzakirələrdə, danışıqlarda münaqişənin Azərbaycan xalqının mənafeyi naminə həlli üçün siyasi qətiyyət göstərən Prezident İlham Əliyev dəyişilməz mövqeyini «Azərbaycan heç vaxt işğalla barışmayacaq. Deyirdim ki, Azərbaycan heç vaxt imkan verməyəcək ki, tarixi, əzəli Azərbaycan torpaqlarında ikinci erməni dövləti yaradılsın» sözləri ilə bildirirdi.
Cənab İlham Əliyevin Azərbaycana rəhbərliyinin ilk dövründə respublikamızın siyasi, iqtisadi vəziyyəti, ordu quruculuğu ilə bağlı görüləcək işlərin mürəkkəbliyi, Ermənistana havadarlıq edənlərin ölkəmizə qərəzli münasibəti, erməni lobbisinin əlində oyuncağa çevrilən daxili düşmənlərimizin xəyanətləri nəzərə alınsa görüləcək işlərin necə böyük qətiyyət tələb etdiyini və qarşıda duran vəzifələrin mürəkkəbliyini təsəvvür etmək o qədər də çətin deyildi. Strateji əhəmiyyətli Şuşanın, Laçının, Kəlbəcərin işğal altına düşməsi, ermənilərin əsas məqsədləri olan Dağlıq Qarabağla Ermənistan arasında coğrafi bağlantının yaradılması vəziyyəti daha da gərginləşdirdi. İşğalçıya siyasi, hərbi dəstək göstərən, münaqişənin həllinə ikili standartlardan yanaşanların artdığı bir məqamda torpaqlarımızın işğaldan azad olunması böyük siyasi iradə, dövlətçilik təcrübəsi tələb edirdi. «Gücümüz yox idi. Ona görə güc amili ön plana çıxdı. Bu gün artıq dəyişən dünyada güc amili demək olar ki, rəsmi qaydada ön plana çıxıbdır. Mən isə bunu hələ 10 il bundan əvvəl proqnozlaşdırırdım, ona görə güc toplamaq üçün bütün imkanlar səfərbər edildi» söyləyən Prezident İlham Əliyev ölkə iqtisadiyyatının inkişafı, maliyyə imkanlarımızın möhkəmlənməsi naminə önəmli islahatlar apardı. Azərbaycan xalqının maraqlarını ifadə edən siyasi müstəqilliklə iqtisadi müstəqilliyin birgə inkişafı Azərbaycanın digər dövlətlərdən, beynəlxalq təşkilatlardan asılılığını minimuma endirdi. Ölkəmiz qlobal enerji, nəqliyyat layihələrinin təşəbbüskarı kimi tanındı. Multikulturalizm ənənələrinə sadiqliyi ilə sivilizasiyalararası mərkəz, xalqlar arasındakı körpü rolunu qətiyyətlə doğrultdu. Dünyanın siyasi müstəvisində azlıq təşkil edən tam müstəqil dövlətlərin ön sırasında yer aldı.
«Son 17 il ərzində mənim fəaliyyətimdə ölkəmizin gücləndirilməsi, beynəlxalq müstəvidə mövqelərimizin möhkəmləndirilməsi, ölkə daxilindəki proseslərin müsbət məcrada getməsi əsas vəzifə idi. Heç bir təzyiq, heç bir təhdid məni bu yoldan döndərə bilmədi. Çünki bir amalım var idi – güclü Azərbaycan qurmaq, torpaqlarımızı işğaldan azad etmək!» söyləyən Prezident İlham Əliyev Vətən müharibəsində düşmən üzərində çaldığı qələbə ilə müzəffər bir xalqın lideri olduğunu təsdiqlədi. Dövlət siyasətimizin əsasını təşkil edən Ermənistanı zəiflətmək, Azərbaycanın təşəbbüsü ilə həyata keçirilən qlobal layihələrdən kənarda saxlamaq istəkləri də gerçəkləşdi. Başqalarının ianələri hesabına dolanan, şəxsi maraqlarını dövlətçilikdən üstün tutan Ermənistanı idarə edən kriminal rejimin qeyri-demokratik hərəkətləri üzündən dalana dirənən Dağlıq Qarabağ münaqişəsinin həlli üçün sülh danışıqlarına sadiq qalan Azərbaycan qüdrətləndi. Başqalarının maraqlarına uyğun işğalçılıq siyasətinin əsiri olan Ermənistan isə Avrasiya üçün önəmli olan enerji, nəqliyyat, kommunikasiya layihələrindən kənarda qaldı.
Arxada qalan 17 ildə Ermənistanı beynəlxalq arenada ifşa etmək, işğalçılıq siyasətini dünya ictimaiyyətinə çatdırmaq üçün diplomatik səylərini artıran Azərbaycan ermənipərəst dairələrin apardıqları anti-Azərbaycan təxribatlarına qarşı mübarizədə də qətiyyət göstərdi. BMT-nin, 120 ölkənin birləşdiyi Qoşulmama Hərəkatının üzvü kimi beynəlxalq hüquqa sadiqliyini əməli işi ilə dünya ictimaiyyətinə çatdırdı. İslam Əməkdaşlıq Təşkilatı ilə əlaqələri gücləndirdi. Erməni mifini darmadağın etdi.Qonşu dövlətlərin iştirak etdiyi ikitərəfli, üçtərəfli əməkdaşlıq formatının möhkəmləndirilməsi istiqamətində önəmli təşəbbüsləri ilə fərqləndi.
44 gün davam edən Vətən müharibəsindəki Qələbəmiz göstərdi ki, Prezident İlham Əliyev siyasi iradəyə malik dövlət başçısı olmaqla yanaşı, həm də müharibə elmini, təcrübəsini dərindən mənimsəyən qətiyyətli Ali Baş Komandandır. Müharibənin davam etdiyi qısa müddətdə özünü təsdiqləyən siyasətini döyüş, informasiya müharibəsində, diplomatiyada bir daha doğruldan Prezident İlham Əliyev münaqişənin hərbi yolla həlli olmadığını iddia edənlərin səhvlərini korrektə etdi. İkili standartlardan qaynaqlanan, dünyanın müxtəlif guşələrində davam edən ərazi münaqişələrinin həlli yollarını göstərdi. Qərbin siyasi texnologiyalarından dərs alan qüvvələrə diplomatiya dərsi verdi. Əsl demokratiyanın nə olduğunu dünya ictimaiyyətinə göstərdi. Status-kvonun əbədi, dəyişilməz qalmasına çalışanlara iradənin, düşünülmüş siyasətin, xalq-iqtidar-ordu birliyinin gücü ilə cavab verdi.
Aprel döyüşlərindən, Günnüt əməliyyatından dərs almayan, 30 ilə yaxın Azərbaycan torpaqlarını işğal altında saxlayan terrorçu Ermənistanın «qüdrətli ordusu» 44 gündə məhv edildi. «Bizim qəhrəman əsgər və zabitlərimiz Azərbaycanın gücünü göstərdi. Düzgün planlaşdırılmış və həyata keçirilmiş əməliyyatlar sayəsində, texniki imkanlardan istifadə edərək, qəhrəman övladlarımızın qəhrəmanlığına, rəşadətinə söykənərək biz mümkün olmayanı etdik, düşməni məhv etdik, düşmən ağ bayraq qaldırdı, düşmən diz çökdü» söyləyən Prezident İlham Əliyev bu Qələbəni Azərbaycan xalqının gücünün, qüdrətinin məntiqi nəticəsi adlandırır. İllərdən bəri Ermənistanı dəstəkləyən qüvvələrin Bakını tarazlaşdırılmış siyasətindən döndərmək naminə hazırladıqları məkrli planları, ərazi bütövlüyümüzü təhlükə, şübhə altına alan qərəzli sazişləri qətiyyəti ilə pozan Prezident İlham Əliyev 44 gündə həmin niyyətləri məhv etdi. Hərblə başlayan, diplomatiya ilə davam edən müharibədə düşmənə ağır zərbə vuran beşinci nəsil silahlar, ən müasir texnikalar olsa da, sonrakı mərhələdə düşməni ağ bayraq qaldırmağa məcbur edən ağıl, zəka, düşünülmüş siyasət öz sözünü dedi. Bütün dünya gördü ki, Azərbaycan əsgəri artıq 1990-cı ildə olduğu kimi cəbhə xəttində, döyüş meydanında avtomatın ümidinə qalmır. Ölkəmizdə yeni modern ordu formalaşıb. Müasir dövrün tələblərinə uyğun, hər kəsi heyrətə salan «formalaşma» təkcə orduda deyil, dövlətin bütün strukturlarında, fundamental islahatların həlli ilə diqqəti çəkdi. Enerji, nəqliyyat layihələrini reallaşdıran Azərbaycan qlobal məsələlərin həllində siyasətini paralellik əsasında tarazlaşdırmaqla postmüharibə dövrü üçün etibarlı mənbə formalaşdırdı. Artıq işğaldan azad olunmuş, erməni vandallarının dağıtdığı ərazilərə yeni həyat verilir. İqtisadi baxımdan beynəlmiləl mühitin yaranması üçün ölkəyə ən tanınmış xarici şirkətləri cəlb olunur. Azərbaycan bölgədə baş verən hadisələrə az- az ölkələrə nəsib olan «kosmik gözü» ilə nəzarət edir. Yeni sərhədlər dar çərçivədə deyil, azad olunmuş zirvələrdən ən güclü radiolakasiya sistemlərinin yaradıldığı aydın müşahidə olunur. Qubadlıdan Zəngəzura gedən yola «yaşıl işıq» yandırılır. Tuneldən çox siyasi mahiyyət daşıyan, dövlətləri birləşdirən Naxçıvana uzanan dəhlizin bərpası, Şuşanın alınması o deməkdir ki, Azərbaycan yeni ərazilər əldə edir, sərhədlərə qovuşur. Ermənilər isə əsl boyunlarına uyğun çərçivələrə sıxlaşır. Hər daşa, divara yazılan «Azərbaycan» kəlməsindən, respublikanı, demək olar ki, hər evi bürüyən üçrəngli bayrağımızın dalğalanmasından, «türk» sözündən vahiməyə düşən ermənilər qorxudan ilan kimi qıvrılırlar. Xalqımızın şüurunda müqəddəs, genetik hiss kimi qorunub saxlanılan, nəsillər boyu yaşadılan İrəvan xanlığı sevgisi oyanır, milli yaddaş zühur edir. Azərbaycan Ordusunun gücünü, qüdrətini görən Ermənistan işğal altında saxladığı ərazilərdən geri çəkildi, torpaqları öz sahibinə qaytardı. Kökü olmayan ağac kimi quruyan, beynəlxalq aləmdəki dayaqlarını, müttəfiqlərini itirən Ermənistanın taleyi artıq nə Fransanın prezidenti Makronu, nə də Benilüks parlamentlərinin deputatlarını düşündürür. Ermənistanın yaratdığı mifə imza atan erməni ideoloqlarının, onların havadarlarının yaratdıqları xofu əridən Azərbaycan Ordusunun əsgər və zabitlərinin gücü qarşısında ağ bayraq qaldıran Ermənistan məğlubiyyətini etiraf etdi. Paytaxtımızda keçirilən Zəfər paradı Qələbəyə aparan «Qarabağ Azərbaycandır!» şüarının təsdiqi oldu.
Xuraman İsmayılqızı, «İki sahil»