Qərbin, Minsk qrupunun həmsədr dövlətlərinin yenidən «masa», «danışıqlar» tələbini səsləndirməsi, Gəncə soyqırımına biganəliyi Ermənistan faşizminə «yaşıl işıq»dır
Ötən əsrlərdən başlayaraq müxtəlif illərdə Azərbaycana qarşı soyqırımı törədən, torpaqlarımızı qarış-qarış işğal edən, deportasiya nəticəsində azərbaycanlıları ata-baba ocağı Qərbi Azərbaycandan çıxaran, ən acınacaqlısı isə törətdiyi cinayətlərə, vəhşiliklərə görə ittiham olunmaq əvəzinə başı sığallanan Ermənistanın başladığı Dağlıq Qarabağ münaqişəsinin 30 ildə həllini tapmaması təcavüzkara dəstəkdir. Dağlıq Qarabağın Azərbaycanın əbədi və əzəli torpağı olduğunu qəbul etdikləri qətnamələrlə, verdikləri bəyanatlarla rəsmən bildirən BMT də daxil olmaqla sənədlərdə nəzərdə tutulan şərtlərə əməl etməyən, işğal altında saxladığı Azərbaycan torpaqlarında xalqımıza məxsus tarixi abidələri, milli-mənəvi dəyərlərimizi dağıtmaqla bu əraziləri özününküləşdirməyə çalışan, ekoloji terrorlar törədən Ermənistanın təcavüzkarlığına « dur!» deyən «tapılmadı.» Dağlıq Qarabağ münaqişəsinin sülh yolu ilə həllinə çalışan, danışıqlarda beynəlxalq hüquq normalarına istinad edən Azərbaycandan fərqli olaraq Ermənistan ən həlledici məqamlarda müxtəlif bəhanələrlə əsas məsələdən yayınmağa çalışır və istəyinə də nail olurdu. Çünki bu «qeyb olma» üsulunu havadarları onlara əvvəlcədən diktə edirdi. İllərdən bəri Azərbaycan torpaqlarını işğal altında saxlayan Ermənistan başqa ölkələrdən gətirilən erməniləri Dağlıq Qarabağda yerləşdirməklə də beynəlxalq hüququn ziddinə hərəkət edir. Bağlanmış atəşkəsə belə əhəmiyyət verməyən işğalçı eyni zamanda, törətdiyi təxribatlarla, əsassız iddiaları ilə Azərbaycana qarşı ideoloji mübarizəsinə də haqq qazandırırdı.
Aprel döyüşlərində, Günnüt əməliyyatında Ermənistana ciddi qulaqburması verən Azərbaycan Ordusunun xəbərdarlığından nəticə çıxarmayan Ermənistanın işğalçılıq siyasətini davam etdirməsi xalqımızın səbir kasasını daşırdı. İyulda Azərbaycan –Ermənistan dövlət sərhədinin Tovuz istiqamətində təxribatlar törədərək, eyni zamanda, «yeni ərazilərə sahib olmaq» iddiasını səsləndirərək daha irəli gedən Ermənistan hazırda layiqli cavabını alır. Sentyabrın 27-dən başlayaraq düşmənə ağır zərbələr endirən, illərdən bəri işğal altında qalan torpaqlarımızı azad edən Milli Ordumuzun gücü, qüdrəti, rəşadəti qarşısında diz çökən Ermənistan, bu ölkənin baş naziri Nikol Paşinyan tələyə düşmüş siçan kimi çıxış yolları axtarır, qapılara düşərək kömək diləyir.
Siyasi savadsızlığını heç bir beynəlxalq hüquq normalarını tanımamaqla bəyan edən, Sorosun dəstəyi ilə hakimiyyətə gələn Nikolun « qüdrətli Ermənistan ordusu» ilə bağlı illüziyalarını 15 gündə darmadağın edən, Cəbrayılda, Ağdamda, Füzulidə, Tərtərdə uğurlu hərbi əməliyyatlar apararaq xeyli ərazimizi işğaldan azad edən Azərbaycan Ordusunun gücü qarşısında özünü itirən Nikol cabalayır. Çıxış yolu kimi Azərbaycanın mülki əhalisini hədəfə alır. Ordumuzun strateji əhəmiyyətə malik Hadrutu və bir neçə yüksəkliyi azad etməsi ilə daha da quduran Nikolun göstərişi əsasında qədim tarixə malik, Azərbaycanın böyük şəhərlərindən olan Gəncəni davamlı atəşə tutulması nəticəsində 10 dinc əhalinin qətlə yetirilməsi, 16-sı qadın, 6-sı azyaşlı olmaqla 34 sakinin yaralanması, 10-dan artıq çoxmənzilli binaya, 100-dən çox müxtəlif təyinatlı obyektə ziyan vurulması beynəlxalq ictimaiyyət tərəfindən də vandalizm adlandırılır.
Gəncədə baş verənlərlə hadisə yerində tanış olan Azərbaycandakı diplomatik korpusların rəhbərləri, hərbi attaşelər, beynəlxalq təşkilatların ölkəmizdəki nümayəndələri erməni vəhşiliyinin günahsız qurbanlarının dəhşətini gözləri ilə gördülər. 1949-cu il Cenevrə konvensiyalarının və onların Əlavə protokollarının, Ermənistanın yalvarışları əsasında Moskvada keçirilmiş görüşün yekunu olaraq razılaşdırılmış humanitar atəşkəs rejiminin tələblərini pozan Ermənistanın dinc əhalini bilərəkdən hədəfə alması erməni faşizminin dəyişilməyən genosidə sadiqliyidir. Əhalinin sıx yaşadığı və təmas xəttindən xeyli aralıda yerləşən Gəncəyə, sənaye şəhəri olan Mingəçevirə, bu şəhərdə yerləşən «Azərbaycan» İstilik Elektrik Stansiyasına, Mingəçevir Su Elektrik Stansiyasına Ermənistan ərazisindən «Toçka-U» «Smerç», «Skad» və digər raketlərlə atəşlərin açılması humanitar yardımı «hərbi cinayət»lə, terrorla əvəzlədi. Oktyabrın 12-nə olan məlumata görə Ermənistanın son təxribatları nəticəsində 41 mülki şəxs qətlə yetirilmiş, 207 nəfər yaralanmış 1185 fərdi ev, 57 çoxmənzilli yaşayış binası dağıdılmışdır. «Bu, erməni faşizminin eybəcər sifətinin növbəti təzahürüdür. Artıq dünya erməniliyi, Ermənistanın havadarları, onların hamiləri və islamofob dairələr bu cinayəti gizlədə bilməyəcəklər. Çünki artıq hər şey göz qabağındadır. Dünən o hadisə yerində təşkil olunan mətbuat açıqlamaları və bu gün oraya gedən xarici səfirliklərin nümayəndələri öz gözləri ilə hər şeyi görürlər. Bir daha görürlər ki, bu münaqişənin səbəbkarı kimdir. Kim təcavüzkar siyasət aparır, kim mülki əhaliyə qarşı cinayət törədir. Ermənistan dövləti terror dövlətidir, faşist dövlətidir və insanlığa qarşı törədilmiş bu cinayət bunu bir daha göstərdi» söyləyən Prezident İlham Əliyev dünya birliyini haqqı, ədaləti müdafiə etməyə çağırır.
Törətdiyi bu vəhşiliyə baxmayaraq, bəzi qüvvələrin Ermənistanı müdafiə etmələri, cinayətlərinə etinasız qalmaları bağışlanmazdır. Moskvada keçirilən görüşlərdə razılaşdırılan «humanitar atəşkəs»in erməni xisləti baxımından açıqlaması Gəncədə törədilən vəhşilik idi. İşğalçıya vaxt, silah-sursat tədarükü qazandıran bu «humanitar» addım bir gün də olsun susmayan silahların daha çox dağıdıcı gücə malik, uzaqməsafəli raketlərlə əvəzlənməsini təmin etdi. Ermənistanın törətdiyi cinayətlərə, terrora, soyqırımlarına əsrlərlə susan, yeri gəldikdə dəstək verən ermənipərəst dairələr kimi, Dağlıq Qarabağ münaqişəsinin həlli tapşırılmış ATƏT-in Minsk qrupunun həmsədr dövlətləri də loyal yanaşmaları ilə ərköyünləşdirdikləri Ermənistana təsir və təzyiq göstərmək əvəzinə, yenidən «masa», «danışıq» tələbi irəli sürürlər. Soruşmaq lazımdır ki, 30 ildir bölgəyə turist səfərləri edən, məsul olduqları vəzifələri yerinə yetirməkdən başqa hər cür istirahət edən və bu gün də eyni siyasətlərinə sadiq qalan Rusiya, Fransa, ABŞ Ermənistana hansı təsir və təzyiqləri göstərdilər? Qeyd edək ki, qrupun tərkibində bu bölgədən uzaqlarda yerləşən ölkələrin olması özlüyündə ATƏT-in formal, məqsədli məramını göstərir. Rusiya Federasiyası Dövlət Dumasının ermənipərəst deputatı, Ermənistan –Rusiya «Lazarev» klubunun yaradıcısı Konstantin Zatulinin « Ermənistan Rusiyanın müttəfiqidir və nöqtə. Dağlıq Qarabağ isə öz kilsələrinə və xristian mədəniyyətinə sahib bir erməni torpağıdır. Bizim mənafeyimiz Dağlıq Qarabağın müstəqilliyinin tanınmasını tələb edir» sözlərinin izahına ehtiyac yoxdur. Bu «tanınmanın» ilkin şərti isə işğalçını silahlandırmaqdır. Məntiqli suallar yaranır. Dağlıq Qarabağ münaqişəsinin sülh yolu ilə həlli tapşırılan ABŞ, Rusiya, Fransa Minsk qrupu həmsədrləri kimi daim Ermənistanı müdafiə etmişlər. Münaqişənin illərdən bəri uzadılmasının ən başlıca səbəbi bu «üçlüyün» təcavüzə məruz qalan, Xocalı soyqırımını yaşayan, milli-mənəvi, təbii sərvətləri ermənilər tərəfindən talan edilən Azərbaycana qarşı qərəzli mövqe tutmasıdır. Dünyanın bir çox dövlətləri Gəncə terrorunu pisləsə də, «Qarabağın zəncirvari oyunu»nun əsas «iştirakçıları» hələ də erməniliyi dəstəkləyir, səsi kəsilməyən atəşkəsə əməl olunmasını tələb edirlər. Əsas hədəf Azərbaycanı ləkələmək, Azərbaycan haqqında yalanlar yaymaq, ölkəmizin imicinə zərbə vurmaqdır.
Dini radikalizmdən özlərinin maraqları naminə istifadə edən, islamofobiya ilə bağlı təbliğat aparanlar, o cümlədən Minsk qrupunun həmsədr dövlətləri nədənsə daim Azərbaycanın yanında olduğunu bəyan edən, ölkəmizə mənəvi dəstək göstərən Türkiyənin Dağlıq Qarabağ münaqişəsi ilə bağlı danışıqlarda iştirakına veto qoyurlar.
Ermənistanın dövlət siyasətinin terror mahiyyətini görsələr belə, bölgədə sabitliyin yaranmasında aparıcı rola malik Türkiyənin antiterror əməliyyatlarını da istəmirlər. Qardaş ölkənin Suriyada, Liviyada, Orta Şərqdə PKK kimi digər terrorçu qruplara qarşı apardığı mübarizənin Qərbin Yaxın Şərq siyasətlərinə zidd olduğunu düşünən həmin qüvvələr Cənubi Qafqazda geosiyasi üstünlüyə malik olmaq, mövqelərini itirməmək, Türkiyənin Azərbaycanla həmrəyliyinə zərbə vurmaq üçün hər vasitədən istifadə edirlər. Onları narahat edən isə Ermənistanın məğlub olmasıdır.
Ermənilərin törətdikləri Gəncə terrorunun nəticələrini müşahidə etmək üçün hadisə yerinə gələn diplomatların münaqişənin əsl mahiyyəti ilə bağlı suallara cavab veriləcəyi bildirilsə də, uzun illər ərzində həqiqəti eşitmək istəməyən, reallığı təhrif edərək pərdələyənlər azərbaycanlı olduqları üçün faşist erməniləri tərəfindən öldürülən insanların faciəsini də sadəcə səssiscə izlədilər. Bu ağır günlərdə təkcə Türkiyə ölkəmizə mənəvi dəstək göstərməklə Azərbaycanın yanında olduğunu bildirdi. «Mən bunu bir neçə dəfə açıqlamışam. Bir daha demək istəyirəm ki, mütləq Türkiyə bu məsələnin siyasi yollarla həll olunmasında fəal rol oynamalıdır… Nə üçün Türkiyə də həmsədr olmasın, onsuz da Minsk qrupunun üzvüdür. Ona görə bizim siyasətimizdə tam məntiq və nəticəyə hesablanmış yanaşma var» söyləyən Prezident İlham Əliyev bildirir ki, Qərbdə bir çoxları qəbul etməsə də, Türkiyə nəinki bölgədə, dünya miqyasında güc mərkəzidir. Bizim bölgədə Türkiyə söz sahibidir və bu, reallıqla hesablaşmaq lazımdır.
Xuraman İsmayılqızı, «İki sahil»
