Respublikamızda dövlət tərəfindən kənd təsərrüfatına göstərilən qayğı, yaradılan şərait Masallı rayonunda torpağı əsl sahibinə qaytarıb. İndi rayonda torpağın hər qarışından səmərəli istifadə etməklə, müxtəlif növ kənd təsərrüfatı məhsulları əkib-becərməklə özünə firavan gün-güzəran quranlar çoxdur.
Rayonun torpaqları o qədər bərəkətlidir ki, burada hər əkilən artıqlaması ilə bəhrəsini verir. Elə son illər zəhmət adamları arasında tütünçülüyə maraq da bu səbəbdən irəli gəlir. Dövlətin qayğısı da öz yerində. Bu sahədə əldə edilən ürəkaçan göstəricilər ilbəil yüksəlir. Ötən il rayonda 35 hektarda tütün əkən Masallı sakinləri yaxşı qazanc əldə ediblər. İstehsal etdikləri 57, 2 ton quru yarpağın keyfiyyəti məhsulu qəbul edənləri razı salıb.
Tütünçülər cari ilin bol və keyfiyyətli məhsulu üçün ilk gündən etibarlı təməl qoyublar. 50 hektar sahədə tütün plantasiyası salınıb. Plantasiyalarda əkilən tütünün çox hissəsini “İmunium” növü təşkil edir. Bu növ ətirli olmaqla bərabər, qiymətdə də üstündür. Becərilmə işləri yüksək aqrotexnika səviyyədə görüldüyü üçün nizamla cərgələnən kolların üstü yarpaqla doludur. Odur ki, tütünçülər yarpaq yığımına əvvəlki illərdən daha mütəşəkkil başlayıblar. Bunu ilk günlərin uğurlu nəticələri də təsdiq edir. Qısa müddətdə plantasiyalardan 7 tondan çox keyfiyyətli yarpaq dərilib. Mövsümün axırına kimi rayonda 60 ton quru tütün yarpağının istehsalı nəzərdə tutulub. Plantasiyalarda isə bu rəqəmdən artıq məhsul gözlənilir.
Zəfər Orucoğlu, Azərbaycan Jurnalistlər Birliyinin üzvü