Prezident İlham Əliyevin və birinci xanım Mehriban Əliyevanın, qızları Leyla Əliyevanın şanlı qələbəmizin mədəniyyət marşrutu olan Şuşaya səfərləri çərçivəsində tarixi və dini abidələrə göstərdikləri ehtiram islamofobiyadan yararlanaraq xof yaradan, milli münaqişələri gücləndirən qüvvələrə multikulturalizm dərsidir
Böyük qəhrəmanlıq, peşəkarlıq tələb edən, milli ruhumuzu yaşadan, özü boyda tarixi abidə olan Şuşanın işğaldan azad edilməsi ilə parlaq qələbə qazanan Azərbaycan üçün 44 günlük müharibənin hər günü zəfər salnaməsidir.
Bugünlərdə mədəniyyətimizin paytaxtı Şuşaya qələbə yolu ilə gəldiyini fəxrlə bildirən, Şuşanın işğaldan azad edilməsini düşmənə vurulan ən böyük zərbə adlandıran Prezident İlham Əliyevin vurğuladığı kimi, Azərbaycanın qəhrəman övladlarının mükəmməl hərbi əməliyyatlarının beynəlxalq ekspertlər tərəfindən təhlil edilib , öyrənilməsi xalqımız üçün qürurdur .«Biz buraya qalib kimi gəlmişik, bayrağı da qaldırmışıq, azad edilmiş bütün torpaqlarda Azərbaycan bayrağı dalğalanır. Döyüşə-döyüşə gəlmişik…Bütün dünyaya gücümüzü sübut etdik, göstərdik, düşmənin başını əzdik. Düşməni məcbur etdik ki, qabağımızda diz çöksün, kapitulyasiya aktına imza atsın. Belə də oldu və alçaldıcı kapitulyasiya aktı tarixdə əbədi qalacaq. Bütün dünya bizim Qələbəmizdən danışır» söyləyən Prezident İlham Əliyevin şanlı ordumuzun 44 günlük savaşını XXI əsrin müharibəsi adlandırması, ölkəmizin müdafiə qüdrətinin beynəlxalq səviyyədə etirafı göstərdi ki, qalibiyyəti qanı, canı bahasına qazanmaq qüdrətinə malik, düşmənin belini qıran övladlar yetirən Azərbaycan xalqı babalarından miras qalan qəhrəmanlıq ənənələrinə sadiqdirlər. Döyüş meydanında, informasiya müharibəsində, diplomatiyada qalib olduğunu düşmən üzərində qələbəsi ilə bəyan edən Azərbaycan fərqli dövlət olduğunu multikultural dəyərlərə sadiqliyi, tolerant ölkə olması ilə də təsdiqlədi.
İşğaldan azad olunmuş torpaqlarımızda olarkən erməni vandallarının 30 ildə dağıtdıqları şəhər və kəndlərimizin qısa müddətdə bərpa olunacağını söyləyən Prezident İlham Əliyev bərbad hala salınan bütün tarixi abidələrimizin də əvvəlki görkəminə qaytarılacağını bildirdi.
Biabırçı kapitulyasiyadan dərs almayan Ermənistanda başqa xəyallara düşənlərə « Bu dəmir yumruq onların belini qırdı, onların başını əzdi. Əgər bizə qarşı hər hansı bir təxribat törədilərsə, cavabımız çox sərt olacaq, çox peşman olacaqlar və yenə də acı məğlubiyyətlə üzləşəcəklər. Heç kim bizim qabağımızda dura bilməz. Bundan sonra həmişə belə olacaq» sözləri ilə xəbərdarlıq edən Prezident İlham Əliyev düşməni qorxudan ifadələrini bir daha səsləndirdi.
44 gün davam edən döyüş meydanında düşmənə tarixi dərs verən Azərbaycan daha bir cəbhədə qalib gəldi. Mənfur niyyətlərini həyata keçirmək üçün islamofobiyadan istifadə edərək milli münaqişələr yaradanlara milli ruhun ən böyük silah olduğu göstərildi. Qələbənin mədəniyyət marşrutu olan Şuşaya səfəri zamanı Saatlı, Aşağı Gövhər ağa, Yuxarı Gövhər ağa məscidlərini ziyarət edən, dini ocaqlarımıza müqəddəs «Qurani- Şərif» bağışlayan, erməni vandallarının güllələdiyi Xurşudbanu Natəvanın, Üzeyir Hacıbəylinin, Bülbülün qəribsəyən büstlərini illərdən bəri həsrətində olduqları doğma yerlərinə qaytaran dövlət başçımız xalqımıza məxsus mənəvi sərvətlərimizə sahiblik ruhunun əbədiliyini göstərdi.
İşğal edilmiş Azərbaycan torpaqlarında məscidləri dağıdaraq, müqəddəs ocaqlarımızda donuz saxlayaraq İslam dinini təhqir edən ermənilər vəhşi xalq olduqlarını əməlləri ilə təsdiqlədilər. Amma vurulan yaralar tezliklə sağalacaq. Ağdam Cümə məscidi kimi yararsız hala salınmış digər dini ocaqlarımızda da təmir- bərpa işlərini həyata keçirəcək Heydər Əliyev Fondu bu missiyanı yerinə yetirəcək. Əsas məsələ isə müsəlman aləmində, İslami dəyərlərə kölgə salanlara qarşı mübarizədə etiqada, milli birliyə, həmrəyliyə nail olunmasıdır. Şuşada, Ağdamda, Füzulidə, Cəbrayılda, Zəngilanda, Qubadlıda ümumiyyətlə, işğaldan azad edilmiş torpaqlarımızda dini ocaqlarımızı dağıdan Ermənistanla yaxınlıq edən müsəlman dövlətlərini sərt tənqid edən Prezident İlham Əliyev bu hərəkətləri riyakarlıq adlandırdı: «Minarənin dağıdılması düşmənin islamofob xislətini göstərir. Ermənistan daim çalışır ki, müsəlman ölkələri ilə münasibətlər qursun, bəzi ölkələrlə münasibətləri inkişaf etdirsin, özünü sanki müsəlman xalqlarına müsbət münasibət bəsləyən bir ölkə kimi qələmə versin. Hamısı yalandır. Əgər buna kimsə bu günə qədər inanıbsa, gəlsin, görsün ki, Ermənistan rəhbərliyi nə günə salıb müsəlman məscidlərini. Hər bir müsəlman üçün müqəddəs olan məbədlərimizi nə günə salıb. Dağıdıb, təhqir edib, donuz saxlayıb, inək saxlayıb, məscidlərimizin üzərində təhqiramiz ifadələr yazdırıb. Belə bir ölkə müsəlman ölkələri ilə dost ola bilərmi? Əlbəttə ki, yox. Mən bunu dəfələrlə bütün beynəlxalq kürsülərdən bəyan edirdim, müsəlman ölkələrinin liderlərinə müraciət edərək həm ikitərəfli formatda, həm çoxtərəfli görüşlər əsnasında, beynəlxalq tədbirlərdə deyirdim ki, Ermənistan müsəlman ölkələri üçün dost ola bilməz, məscidləri bu günə qoyan ölkə müsəlman ölkələri ilə dost ola bilməz. Bu, riyakarlıqdır və Ermənistanı dost ölkə kimi qəbul etmək də riyakarlıqdır, Allahsızlıqdır. Bunu dağıdanla müsəlman ölkələrinin liderləri necə dost ola bilərlər? Cavab versinlər buna. Mənə yox, öz xalqlarına cavab versinlər.» İşğaldan azad olunmuş torpaqlarımızda təkcə məscidlərdə deyil, sinaqoqlarda, kilsələrdə, müxtəlif millətlərə məxsus dini məbədlərdə vandalların apardığı erməniləşdirmə siyasətini mənəvi riyakarlıq adlandıran dövlət başçımızın tapşırığı əsasında udinlərə məxsus Xudavəng kimi digər dini abidələr də bərpa olunacaq. Tarixi abidələrin erməniləşdirmə cəhdlərinə son qoyulacaq.
Azərbaycan əsrlərboyu müxtəlif mədəniyyətlərin və sivilizasiyaların təmas və ünsiyyət mərkəzi olmuşdur. Asiya ilə Avropa arasında yerləşən ölkəmizin mədəni müxtəlifliyə hörmət və ehtiramı beynəlxalq səviyyədə etiraf olunan həqiqətdir. İşğaldan azad edilmiş torpaqlarda dini mənsubiyyətindən asılı olmayaraq bütün müqəddəs ocaqlara xalqımız tərəfindən qayğı göstərilməsi Azərbaycanın humanitar siyasətinin bəşəri prinsiplərə əsaslandığını göstərir. «Azərbaycan bu gün çoxmillətli, çoxkonfessiyalı ölkədir və yenə də tolerantlıq və dözümlülük ideyaları cəmiyyətdə çox güclüdür» söyləyən, işğaldan azad olunan torpaqlarımızdakı məscidləri ziyarət edərək milli ruhumuzun zənginləşməsində ədalət və humanizmin ön sıralarda dayandığını ölkə daxilində, beynəlxalq səviyyədə həyata keçirilən təşəbbüsləri ilə təsdiqləyən Mehriban xanım Əliyevanın narahatlığı ilk baxışdan hiss olunurdu. Şuşa səfəri zamanı yararsız hala salınan məscidlərimizin görkəmindən sarsılan Mehriban xanım eyni zamanda, Azərbaycan qadınına yaraşan təmkini, dini və milli adət- ənənələrimizə hörməti ilə də diqqəti cəlb etdi. Görüləcək işlərin xəritəsi bu görüşlərdə müəyyənləşdirildi. İslamı dəyərlərə sadiqliyin, saflıq və şəffaflığın rəmzi olan mənəvi keyfiyyətləri ilə də nümunə olan Mehriban xanımın başçılıq etdiyi Heydər Əliyev Fondunun xətti ilə həyata keçiriləcək, insanları xeyirxahlığa, birliyə, humanizmə çağırış simvolu olan layihələrin tezliklə reallaşacağı bildirildi. «Qadının gücü, güc mənbəyi ilk baxışdan çox sadə görünən xeyirxahlıq, sevgi və mərhəmət kimi əbədi duyğulardır. Bu gücün, bu qüvvənin qüdrətini və təsir dairəsini nəzərə almamaq mümkün deyil. Belə bir qüdrətli amilin mədəniyyətlər və sivilizasiyalararası dialoqa ayiqli töhfə verməsi bizim özümüzdən asılıdır» söyləyən Mehriban xanım Əliyeva sözlərini, xeyirxahlığını mənəvi dəyərlərimizə diqqətini işğaldan azad olunan ərazilərdə aparılacaq bərpa işləri ilə davam etdirəcək. Erməni vandallarının dağıtdıqları şəhər və kəndlərimiz, tarixi abidələrimiz əvvəlkindən də görkəmli vəziyyətə salınacaq. Prezident İlham Əliyevin «Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik! Bu gün eyni sözləri təkrarlayıram. Şuşa bizimdir! Qarabağ Azərbaycandır!» sözlərinin real həyatda təsdiqini görəcəyimiz vaxt uzaqda deyil.
Xuraman İsmayılqızı, «İki sahil»