Yanvarın 23-də futbol üzrə Türkiyə çempionatının XXI turu çərçivəsində keçirilən qarşılaşmada “Başakşəhər” doğma meydanda “Rizəspor”u qəbul edib.

"İki sahil" xəbər verir ki, qarşılıqlı hücumlar şəraitində keçən görüşdə qalib müəyyənləşməyib – 1:1. Meydan sahibinin qolunu Mehmet Topal, Rizə klubunun qolunu isə Samu vurub.

Günün digər matçında “Trabzonspor” səfərdə “Gənclərbirliyi”ni 2:1 hesabı ilə üstələyib.

Hazırda Türkiyə Superliqasının turnir cədvəlinə 41 xalla “Beşiktaş” başçılıq edir. Ondan iki xal geri qalan “Fənərbağça” ikinci, “Qalatasaray” isə 36 xalla üçüncü pillədə qərarlaşıb.

Turun növbəti oyunları yanvarın 24 və 25-də keçiriləcək.

Qeyd edək ki, yeni mövsümdə Superliqada 21 komanda yarışır. XXI turda “Ərzurumspor” istirahət edir.