Baş nazirin müavini, YAP Sədrinin müavini-icra katibi Əli Əhmədov bildirdi ki, yaxşı yaşamağın, layiqli vətəndaş olmağın yeganə yolu zəngin, etibarlı, dərin biliklərə yiyələnməkdir
Dünən Bakı Biznes Mərkəzində məktəblilər arasında ulu öndər Heydər Əliyevə həsr olunmuş «Ən yaxşı təqdimat» inşa-yazı müsabiqəsinin qalibi olaraq ali məktəblərə qəbul olunmuş və Yeni Azərbaycan Partiyasının təqaüdünü alan bir qrup tələbə ilə görüş keçirildi.
Baş nazirin müavini, YAP Sədrinin müavini-icra katibi Əli Əhmədov bildirdi ki, bu gün ölkədə təhsilin inkişafına əhəmiyyətli yer verilməsi, bu sahədə genişmiqyaslı islahatların həyata keçirilməsi Azərbaycanın uğurlu gələcəyinin təminatına xidmət edir.
«Ən yaxşı təqdimat» müsabiqəsinin əhəmiyyətini qeyd edən Ə.Əhmədov ümummilli lider Heydər Əliyevin Azərbaycan xalqı və dövləti üçün göstərdiyi misilsiz xidmətlərdən danışdı: «Artıq 15 ildir ki, Yeni Azərbaycan Partiyası bu müsabiqənin qaliblərinə təqaüdlər verir. Hesab edirəm ki, siz gənclərin ulu öndər Heydər Əliyevin irsinə, şəxsiyyətinə, siyasətinə münasibəti müsabiqələr zamanı yazılan inşa yazılarında ifadə olunub. Siz gənclər tələbə adını qazanaraq həyatınızda yeni mərhələyə qədəm qoymusunuz. Universitetlərdə təhsil alır, zəngin biliklərə yiyələnir, Azərbaycanın gələcək mütəxəssisləri kimi hazırlanırsınız.»
Ə.Əhmədov bildirdi ki, bu günümüzün gəncliyi Azərbaycanın ictimai, siyasi, iqtisadi həyatını düzgün təhlil etmək üçün daha dərin biliklərə malikdir: «Gənclərimiz həyatlarının ən gözəl anlarını Azərbaycanın müasir tarixində yaşayırlar. Onlar, eyni zamanda, çox xoşbəxtdirlər ki, Azərbaycanın sürətli inkişafının bələdçiləridirlər. Doğrudan da Azərbaycan tarixinin çox möhtəşəm dövrünü yaşayır. Müasir dövrün gəncliyi sizsiniz. Azərbaycanın bugünkü gəncliyi ilə qürur duyuruq. Güman edirəm ki, biliklərə dərindən yiyələnməklə, potensial imkanlarınızdan səmərəli istifadə etməklə Azərbaycanın davamlı inkişafına böyük töhfələr verəcəksiniz.»
Tədbirdə ulu öndər Heydər Əliyevin həyat və fəaliyyətinə həsr olunan kitabın həddiyyə olaraq veriləcəyini qeyd edən Ə.Əhmədov vurğuladı ki, məqsədimiz budur ki, bu nəşr stolüstü kitabınız olsun: «Tələbənin ən əsas məsuliyyəti kitab oxumaq, biliklərini daha da zənginləşdirməkdir. Kitabda ulu öndər Heydər Əliyevin düşünülmüş və məqsədyönlü siyasətinin Azərbaycana qazandırdığı uğurlar öz əksini tapıb. Azərbaycan gənc dövlətdir. Bəlkə də siz gənclərin yaşı imkan vermir ki, Azərbaycanın öz dövlət müstəqilliyini yenidən bərpa etdikdən sonra hansı faciələrlə üzləşdiyi barədə məlumatınız olsun. Hesab edirəm ki, yaşananları valideynlərinizin dilindən eşitmisiniz, yaxud kitablardan oxumusunuz. Azərbaycan 1993-cü ildə ulu öndər Heydər Əliyevin xalqın təkibli tələbi ilə hakimiyyətə qayıdışından sonra çox böyük inkişaf mərhələləri keçib. Çox əzəmətli yüksəlişə nail olub. Bakının gözəlliyi, regionlaımızın dəyişən siması hər bir Azərbaycan vətəndaşında xoş təəssürat yaradır. Paytaxt Bakımızın, bölgələrimizin, kənd və qəsəbələrimizin müasir siması ulu öndər Heydər Əliyevin gələcəyə hesablanmış inkişaf strategiyası barədə aydın təsəvvür yaradır. Son 15 ildən artıq dövr ərzində Heydər Əliyev siyasi kursunun Prezident İlham Əliyev tərəfindən uğurla davam etdirilməsi Azərbaycana daha möhtəşəm uğurlar qazandırıb.»
Azərbaycanın 90-cı illərin əvvəllərində tamamilə başqa bir vəziyyətdə olduğunu qeyd edən Ə.Əhmədov vurğuladı ki, müstəqilliyimizin ilk illərində ölkəmiz parlçalanmaq, bir dövlət olaraq dünyanın siyasi xəritəsindən silinmək təhlükəsi ilə üz-üzə qalmışdı: «İqtisadiyyat bərbad vəziyyətdə idi. İnflyasiya 1600 faizə çatmışdı. Bu rəqəmi təsəvvür etməyin nə qədər çətin olduğunu geniş şərh etməyə ehtiyac yoxdur. Bu, o demək idi ki, insanların aldığı əməkhaqqı hər an qiymətdən düşürdü. Bu da maddi çətinlikləri daha da dərinləşdirirdi. Əhalinin üzləşdiyi problemlər təkcə iqtisadi çətinliklərlə tamamlanmırdı. Eyni zamanda, özbaşınalıq hökm sürürdü. Sabitlikdən, təhlükəsizlikdən danışmaq mümkünsüz idi. Ermənilərin Azərbaycana müdaxiləsi davam edirdi. Torpaqlarımız işğal edilirdi. Digər bir tərəfdən ölkənin daxilində parçalanma prosesi gedirdi. Separatizm geniş vüsət almışdı. Başqa problemlər də mövcud idi. Ölkə təcridolunmuş vəziyyətə düşmüşdü. Azərbaycan həyatın bütün sahələri üzrə ağır dövrünü yaşayırdı. İnsanlar gələcəyə inamlarını tamamilə itirmişdilər.»
Ə.Əhmədov qeyd etdi ki, 1993-cü ildə ulu öndər Heydər Əliyevin xalqın təkidli tələbi ilə hakimiyyətə qayıdışından sonra Azərbaycan inkişaf, tərəqqi yoluna qədəm qoydu: «Ölkədə sabitlik, təhlükəsizlik təmin edildi. 1994-cü ildə ulu öndər Heydər Əliyevin gərgin səyləri nəticəsində cəbhə xəttində atəşkəs sazişi imlazandı. İqtisadi böhran aradan qaldırıldı. İslahatlar həyata keçirildi. Həyatmızın hərtərəfli dəyişməsinə imkan verən neft sazişi imzalandı. Bir neçə gündən sonra «Əsrin müqaviləsi»nin imzalanmasının 25 illiyini qeyd edəcəyik. Ölkədə sabitliyin və normal biznes mühitinin yaradılması investisiya axınını sürətləndirdi, Azərbaycana yeni-yeni dostlar, tərəfdaşlar qazandırdı.»
YAP Sədrinin müavini onu da vurğuladı ki, Azərbaycandan da zəngin neft və qaz ehtiyatlarına malik ölkələr var: «Amma dövlətimizin başçısı İlham Əliyevin çıxışlarında da qeyd etdiyi kimi, bu təbii resurslar heç də həmin ölkələrə uğur gətirməyib. Həmin ölkələrdə əhali arasında təbəqələşmə prosesi sürətlə gedir. Lakin Azərbaycanın inkişaf strategiyasını dünyanın qabaqcıl ölkələrin təcrübəsinə istinadən hazırlaması bu problemlərin yaşanmamasını təmin etdi. Neft-qaz gəlirlərinin idarə olunmasında şəffaflıq prinsipinin qorunması əhalinin yüksək rifahının təmin edilməsinə xidmət edən davamlı addımlara yol açdı.»
«1993-2003-cü illər Azərbaycan tarixinə inkişaf, tərəqqi dövrü kimi yazıldı» söyləyən Ə.Əhmədov bildirdi ki, Ümummilli Liderin Azərbaycan tarixində müstəsna xidmətlərinin miqyası o qədər böyükdür ki, onların ümumiləşdirilmiş ifadəsi bugünkü Azərbaycandır. İllər keçdikdə onun bu günümüz üçün gördüyü işlərin əhəmiyyəti daha aydın görünür və yüksək dəyərləndirilir. Ulu öndər Heydər Əliyevin bütün həyatı, fəaliyyəti, ideyaları özü-özlüyündə islahatçılıq məktəbi, fəlsəfəsi idi. Heydər Əliyevin ideyaları nəinki insanların qəlbində yaşayır, eyni zamanda, həyata keçirilən siyasətdə özünün aydın ifadəsini tapır. Onun ideyaları sayəsində Azərbaycan daim inkişaf edir, yüksəlir, həyatımızın bütün sahələrində inkişaf sürətli xarakter alır. Bugünkü Azərbaycan Heydər Əliyev ideyalarının təntənəsinin bariz ifadəsidr. Bugünkü Azərbaycan inkişaf, tərəqqi, yüksəliş, sabitlik, təhlükəsizlik deməkdir. Azərbaycanın bugünkü reallıqlarının böyük mənası var: Gələcəyə ümid, gələcəyə nikbinliklə baxmaq, sabahımızın daha da yaxşı olacağına inam.
«Təhsili millətin gələcəyi kimi dəyərləndirən ulu öndər Heydər Əliyevin siyasi kursunu bütün istiqamətlərdə uğurla davam etdirən Prezident İlham Əliyevin bu istiqamətdə atdığı addımlar davamlılığı ilə diqqət çəkir» söyləyən Ə.Əhmədov qeyd etdi ki, savad, bilik, müasir dünyagörüşü hər bir cəmiyyətin uğurlu gələcəyini müəyyən edən amillərdir: «Dövlətimizin başçısı İlham Əliyevin «neft kapitalını insan kapitalına çevirək» tezisi artıq reallıqdır. Bu istiqamətdə atılan addımlar gələcəyə ünvanlanıb. Dövlət nə qədər zəngin təbii resurslara malik olsa da, onların bitib- tükənməsi qaçılmazdır.»
Heydər Əliyev Fondunun təhsilin inkişafı istiqamətində atdığı addımların təqdirəlayiq olduğunu xüsusi qeyd edən Ə.Əhmədov bildirdi ki, Fondun istər məktəb tikintisi, istər təhsilin inkişafı istiqamətində
gördüyü işlərin miqyası genişdir. Azərbaycanın Birinci vitse-prezidenti, Heydər Əliyev Fondunun prezidenti Mehriban xanım Əliyevanın «Yeniləşən Azərbaycana yeni məktəb» layihəsi çərçivəsində tikilən, yaxud yenidən bərpa olunaraq istifadəyə verilən məktəblərin sayına diqqət yetirmək kifayətdir.
«Təbii ki, Azərbaycanın bugünkü reallıqları bunlarla yekunlaşmır» söyləyən Ə.Əhmədov qeyd etdi ki, gələcəyə böyük inamla baxırıq: «Azərbaycanın gələcəyi daha gözəl olacaq. İqtisadiyyatımız daha da inkişaf edəcək. Bu günümüzün təkmil sosial-iqtisadi islahatları davamlı uğurları şərtləndirir. İqtisadiyyatın şaxələndirilməsi siyasəti uğurla həyata keçirlir. İqtisadiyyatın inkişafı dövləti daha da güclü edir. İqtisadi tərəqqi güclü sosial siyasətlə tamamlanır. 2019-cu il xüsusi mərhələ kimi qeyd olunmalıdır. Cari ilin arxada qalan dövründə dövlətimizin başçısı İlham Əliyev tərəfindən iki sosial paketin təsdiqlənməsi əhalinin sosial müdafiəsinin daha da gücləndirilməsini stimullaşdırır. Minimum əməkhaqqının, pensiyaların, ayrı-ayrı kateqoriyalardan olan şəxslərin, xüsusilə tələbələrin təqaüdlərinin artırılması insan amilinə verilən dəyəri bir daha nümayiş etdirir. Güman edirəm ki, təqaüd bir tərəfdən tələbələrin sosial durumunun yaxşılaşdırılmasına köməklik göstərir, digər tərəfdən onların daha dərin biliklərə yiyələnmələrini stimullaşdırır. Azərbaycan hökuməti bundan sonra da digər sahələr kimi, təhsilin də inkişafına diqqət və qayğısını artıracaq. İldən-ilə daha təkmil islahatlar həyata keçiriləcək.»
O da vurğulandı ki, yeganə problemimiz Ermənistan-Azərbaycan Dağlıq Qarabağ münaqişəsidir: «Təəssüf hissi ilə qeyd etməliyik ki, münaqişə bu günə qədər öz ədalətli həllini tapmayıb. İşğalçı Ermənistanla işğala məruz qalan Azərbaycan fərqli səviyyələrdə yaşayır. Azərbaycan sürətlə inkişaf edir. Ermənistan iqtisadi böhran içərisində çabalayır. Azərbaycan güclü, qüdrətli orduya malikdir. Ermənistanın isə güclü ordudan danışması qeyri-mümkündür. İşğalçı dövlət bütün enerji layihələrindən kənarda qalıb. Ən vacib resurslardan biri olan insan resursu baxımından da Azərbaycan və Ermənistan tamamilə fərqli vəziyyətlərdədir. Azərbaycan müstəqilliyə qovuşanda əhalisinin sayı 7,2 milyon idi. Bu gün əhalinin sayı 10 milyondan çoxdur. Ermənistanın əhalisi isə müstəqillik dövrü ilə müqayisədə daha da azalıb. Baxmayaraq ki, rəsmi staitistikada fərqli rəqəmlər səsləndirirlər. Reallıq budur ki, əhali təxminən 2-2,5 milyondur. Göründüyü kimi, Azərbaycanın inkişafı üçün böyük insan potensialımız mövcuddur. Gənclər Azərbaycanın inkişafının əhəmiyyətli potensialını təşkil edir.»
Qeyd edildi ki, harada yaşamasından asılı olmayaraq hər bir Azərbaycan vətəndaşı ulu öndər Heydər Əliyevin xidmətlərini yüksək dəyərləndirməli, Heydər Əliyev irsinin təbliğatçısına çevrilməlidir. Gənc nəsil Heydər Əliyev irsini, ideyalarını dərindən öyrənməlidir.
Heydər Əliyevin ideyaları Azərbaycanın dünəninin, bu gününün və gələcəyinin əsasıdır. Bu ideyaların reallığa çevrilməsi fonunda Azərbaycan daha da qüdrətlənir, zənginləşir, ən yüksək zirvələri fəth edir.
Heydər Əliyev ideyalarının təbliğatçısı olan Yeni Azərbaycan Partiyasının müxtəlif layihələr həyata keçirdiyini söyləyən YAP Sədrinin müavini vurğuladı ki, ən əhəmiyyətli layihələrdən biri məhz gənclərin ulu öndər Heydər Əliyevlə bağlı düşüncələrinin təqdimatında əhəmiyyətli rol oynayan müsabiqədir: «Müsabiqənin iştirakçısı olan və ali məktəblərə daxil olan tələbələrə partiyamız tərəfindən təqaüd verilir. Həmin tələbələrdən bir çoxu artıq ali təhsillərini başa vurublar, hazırda da xeyli sayda təqaüd alanlar var. Bu il isə həmin müsabiqənin qaliblərindən olan gənclərdən 40 nəfəri ali məktəblərə qəbul olunduğu üçün YAP-ın təqaüdünü alacaqlar. Bundan sonra da hər il keçirilən müsabiqədə qalib gələn şagirdlər gələcəkdə ali məktəbə qəbul olunarsa, dördillik təhsil müddətində YAP-ın təqaüdünü alacaqlar. Bu gün Azərbaycan hökumətinin əsas məqsədi gənc nəslin arzuladığı cəmiyyəti gələcəkdə onlara təqdim etməkdir. Bu ümumi məqsədə nail olmaq üçün var gücümüzlə çalışırıq.»
Ə.Əhmədov bildirdi ki, bunun üçün gənc nəslin daha yaxşı təhsil alması və zəngin biliklərə yiyələnməsi tələb olunur: «Yaxşı yaşamağın, cəmiyyətin layiqli vətəndaşı olmağın yeganə yolu zəngin, etibarlı, dərin biliklərə yiyələnməkdir. Qeyd etdiyimiz kimi, Azərbaycanın gələcəyi daha parlaq olacaq. Çünki bu parlaq gələcəyi yaratmağa qadir olan çox ləyaqətli gənclərimiz yetişib. Onlar gələcəkdə ulu öndər Heydər Əliyevin ideyalarını, eləcə də onun layiqli davamçısı Prezident İlham Əliyevin həyata keçirdiyi siyasətə dəstək olacaq, səylə çalışacaqlar.»
Tədbirdə çıxış edən Azərbaycan Respublikası Prezidenti yanında Dövlət İdarəçilik Akademiyasının tələbəsi Aytəkin Hacıyeva, ADA Universitetinin tələbəsi Fatimə Kisirovskaya və başqaları göstərilən diqqət və qayğıya görə ölkə Prezidenti, Yeni Azərbaycan Partiyasının Sədri İlham Əliyevə minnətdarlıqlarını bildirdilər. Qeyd etdilər ki, dövlətin bu diqqət və qayğısını biliklərini daha da zənginləşdirməklə, Azərbaycanın davamlı inkişafına töhfələri ilə doğruldacaqlar.
Sonda xatirə şəkli çəkdirildi.
Yeganə Əliyeva,
Vüsal Cahanov (foto),
«İki sahil»
