Astarada ənənəvi kənd təsərrüfatı sahəsi hesab olunan çəltikçiliyə maraq böyükdür. Burada yetişdirilən düyü keyfiyyətli olur, gətirdiyi gəlirlə zəhmət adamların güzəranına yaxşı təsir göstərir. Bu yandan dövlət də çəltik əkininə görə hər hektar üçün 80 manat subsidiya ayırır. Rayonda gəlirli və gərəkli sahənin inkişafı bütün imkanlarda vardır. Ötən il 204,6 hektar sahədə çəltik əkək astaralılar yetişdirdiyi məhsulun gətirdiyi qazancdan olduqca razı qalmışlar.
Hazırda rayonda çəltik əkinin qızğın vaxtıdır. Artıq 130 hektar sahədə əkin keçirilib. Havaların əlverişli keçməsi, torpaq adamların işə ürəklə yanaşması kinin optimal müddətdə başa çatmasından xəbər verir. Rayonun Artupa, Səncərədi, Suparibağ, Kakalos, Ərçivan kəndlərinin təsərrüfatlarında daha çox çəltikçiliklə məşğul olurlar. Əkin zamanı isə əsasən “Haşımı”, “Sədri”, “Daştəsə”, “Şabani”, “Züdrəst” və “Həsəni” kimi toxum növlərinə üstünlük təşkil edir. Astaralılar ümumilikdə 250 hektar sahədə çəltik yetişdirməyi nəzərdə tutublar.
Yeni əkin mövsümündə Astarada çəltik əkini kampaniyasına Türkiyənin iş adamları da cəlb olunublar. Bu məqsədlə rayonun Artupa, Səncərədi kəndlərində və Ərçivan qəsəbəsində 40 hektara yaxın pay torpaqlarında, eləcə də dövlət fond torpağında çəltik əkilir.
Zəfər Orucoğlu,
Azərbaycan Jurnalistlər Birliyinin üzvü