17 may 2022 11:41
281

Xaricdəki azərbaycanlıların pul köçürmələri ilə bağlı işçi qrupu yaradılacaq

“Bir milyona yaxın Azərbaycan vətəndaşı xaricdə yaşayır, çalışır və ölkələrinə pul köçürmələri edir”.

“İki sahil” xəbər verir ki, bunu Beynəlxalq Miqrasiya Təşkilatının (BMqT) Azərbaycandakı nümayəndəliyinin rəhbəri Vladimir Gyorgiyev "Azərbaycanda pul köçürmələrinin sosial-iqtisadi təsirlərinin qiymətləndirilməsi" mövzusunda keçirilən tədbirdə deyib. Onun sözlərinə görə, ötən ilin yay aylarında bu pul köçürmələrinin təkmilləşdirmələri ilə bağlı layihə hazırlanıb:

"Bu gün layihənin işçi qrupu yaradılacaq. Pul köçürmələrinin müəyyən aspektləri var. Onları müzakirə etmək lazımdır. Müzakirələrə bankları da cəlb etmişik ki, vəsaitin yaxşı formada göndərilməsi üçün fikirlərini bildirsinlər".

Vladimir Gyorgiyev bildirib ki, 2020-ci ildə Azərbaycana köçürülən pulun həcmi ÜDM-nin 2,4 faizini təşkil edib.

"Bu rəqəm 1 milyard 240 milyon manatdır. 2019-cu ildə pandemiya səbəbindən bu rəqəmin azalacağını gözləyirdik, lakin 3 faiz artım olduğu müşahidə edilib" - deyə o qeyd edib.